Домогт Grand Theft Auto (GTA) цувралын өмнөх анги гарснаас хойш 13 жилийн дараа зургаа дахь анги нь дэлхийн видео тоглоомын салбарт шинэ дээд амжилт тогтоожээ.

Тоглоомыг хөгжүүлэгч АНУ-ын Rockstar Games компани 2026 оны арваннэгдүгээр сарын 20-ны баасан гарагийн орой мэдээлснээр, GTA VI тоглоом нээлтээ хийсэн эхний өдрөө 3.79 тэрбум ам.долларын (3.45 тэрбум евро) борлуулалтын орлого олсон байна.

Компанийн мэдээлснээр, тоглоом албан ёсоор худалдаанд гарах үед урьдчилсан захиалгын тоо 32.5 саяд хүрчээ. Ийнхүү эхний 24 цагийн борлуулалтаараа видео тоглоомын түүхэнд байгаагүй өндөр амжилт үзүүлж, цувралын өмнөх ангийн үзүүлэлтийг хол давсан байна.

Rockstar Games компанийн ерөнхийлөгч, үүсгэн байгуулагч Сэм Хаузер “Дэлхийн өнцөг булан бүрийн тоглогчдын үзүүлсэн хариу үйлдэл бидний сэтгэлийг үнэхээр хөдөлгөлөө. Энэ мөчийг та бүхэнтэй хамт хуваалцаж байгаадаа туйлын баяртай байна” гэжээ.

Харин тоглоомын компьютер буюу desktop хувилбарын албан ёсны нээлтийн товыг хараахан зарлаагүй байна.

Рекламный баннер видеоигры Grand Theft Auto VI в Гонконге

GTA цувралын эрэлт дэлхий даяар дээд цэгт хүрэв

Шинэ тоглоомын борлуулалт 2013 онд нээлтээ хийсэн GTA V-ийн амжилтыг үлэмж хэмжээгээр давжээ. Тухайн үед GTA V худалдаанд гарснаасаа хойших эхний гурав хоногт нэг тэрбум ам.долларын орлого олсон нь тухайн цаг үедээ урьд өмнө байгаагүй амжилт аж.

Үүнээс хойш GTA V бүх цаг үеийн хамгийн өндөр борлуулалттай видео тоглоомуудын нэг болж чадсан юм. Тоглоомын нийтлэгч Take-Two Interactive компанийн мэдээлснээр, дэлхий даяар борлуулагдсан 470 сая гаруй Grand Theft Auto цуврал тоглоомын 230 сая гаруй хувь нь GTA V байжээ.

Тоглоомын эрэлт хэр өндөр байгааг PlayStation платформын статистик ч баталж байгаа аж. AFP агентлагийн мэдээлснээр, GTA VI нь PlayStation Store цахим дэлгүүрийн түүхэн дэх хамгийн олон урьдчилсан захиалга авсан тоглоом болжээ.

Урьд өмнө байгаагүй их сонирхол, хүлээлт үүссэнтэй холбоотойгоор тоглоомыг албан ёсоор худалдаанд гаргахаас есөн хоногийн өмнө консолдоо татаж авах боломжийг хэрэглэгчдэд олгосон байна. Ингэснээр нээлтийн өдөр серверүүд хэт ачааллаас болж доголдох эрсдэлийг бууруулахыг зорьжээ.

13 жилийн дараа Вайс-Ситид эргэн ирлээ

Grand Theft Auto бол тоглогч нээлттэй ертөнцөд дүрээ удирдан, янз бүрийн даалгавар биелүүлэх, автомашин жолоодох, буудалцаанд оролцох, гэмт хэргийн ертөнцөд байр сууриа олох зэрэг олон боломжтой криминал адал явдалт тоглоом юм.

Шинэ ангийн үйл явдал Майами хотыг санагдуулам зохиомол Вайс-Сити болон түүнийг хүрээлэх Леонида хэмээх мужид өрнөнө.

Тоглоомын гол дүрүүдээр Люсиа Каминос, Жейсон Дюваль нар тодорчээ. Тэд амьдралаа өөрчлөхийг хүссэн хосын хувьд гэмт хэргийн аюултай ертөнцөд улам гүнзгий татагдан орж буйгаар үйл явдал өрнөдөг байна.

Хөгжүүлэгчид цувралын уламжлалт онцлог болох дээрэм, хөөцөлдөөн зэрэг үйл явдлыг хадгалсан ч шүүмжлэгчид энэ удаагийн ангид дүрүүдийн хоорондын харилцаа, тэдний хувийн түүх, сэтгэлзүйн хөгжилд илүү их анхаарал хандуулсныг онцолжээ.

GTA VI-ийн энэхүү амжилт нь тус цуврал тоглоомын салбарын хүрээнээс хэдийнэ давж, дэлхийн хамгийн танигдсан энтертайнмент брэндүүдийн нэг болсныг харуулж байна. Шинэ тоглоомын нээлт видео тоглоомын салбарын түүхэн дэх хамгийн том арилжааны амжилтуудын нэг болох боломжтойг мэргэжилтнүүд онцолжээ.

Эх сурвалж: PEOPLE