Украины орон нутгийн эрх баригчдын мэдээлснээр, Оросын тал зургадугаар сарын 30-ны мягмар гаргийн өдөр болон оройн цагаар Украины Харьков мужийн Богодухов хот, мөн Запорожье хот болон Запорожье мужид цохилт өгсөн байна.
Мэдээллийн дагуу, Богодухов хотод болсон халдлагын улмаас долоон хүн гэмтэж, Запорожье хот болон мужид хоёр хүн амиа алдаж, 15 хүн шархаджээ.
Запорожье мужийн Цэргийн захиргааны дарга Иван Федоровын мэдээлснээр, Оросын цэргүүд нэг цаг хагасын хугацаанд Запорожье хот руу удирдлагатай долоон нисэх бөмбөг хаясан байна.
Түүний хэлснээр, халдлагын улмаас 45 болон 62 настай хоёр эрэгтэй амиа алдаж, 47-87 насны орон нутгийн иргэд эмнэлгийн тусламж авчээ. Шархадсан хүмүүсийн дунд хэлтэрхийн шарх, доргилт болон бусад гэмтэл авсан хүмүүс байсан аж.
Федоровын мэдээлснээр, шархадсан хүмүүсийн нэг нь халдлагад өртсөн цэцэрлэгийн хамгаалагч байжээ. Цохилтын улмаас хувийн байшингууд эвдэрч, үйлдвэрийн нэг байгууламжид гэмтэл учирч, гал гарсан байна.
Богодухов хотод орон сууц эвдэрчээ
Харьков мужийн захиргааны тэргүүн Олег Синегубовын мэдээлснээр, Богодухов хотод болсон халдлагыг нисгэгчгүй нисэх төхөөрөмжөөр (дрон) үйлдсэн байна. Үүний улмаас долоон хүнд эмнэлгийн тусламж шаардлагатай болжээ.
Хотод олон давхар орон сууц, дэлгүүр, шатахуун түгээх станц, дөрвөн автомашин гэмтсэн байна.
Өчигдөр Запорожье болон Днипро хотод найман хүн амиа алджээ
Иван Федоров "Запорожье хотод үүнээс өмнөх өдөр буюу зургадугаар сарын 29-нд дроны халдлагад чиглэлийн автобус өртөж, гурван хүн амиа алдаж, долоон хүн шархадсан" гэж мэдээлсэн байна.
Днипропетровск мужийн захиргааны тэргүүн Александр Ганжа "Днипро хотод болсон цохилтын улмаас таван хүн амиа алдсан" гэж мэдээлжээ. Түүний хэлснээр, уг халдлагын үеэр 28 хүн мөн шархадсан байна.
Эх сурвалж: DW
