Өмнөд Солонгосын ерөнхийлөгч асан Юн Сок Ёльд холбогдох хэргийн шүүх хурал өнөөдөр (2026.06.12) болж, Сөүлийн Төв дүүргийн шүүх түүнийг БНАСАУ руу нисгэгчгүй нисэх төхөөрөмж илгээсэн хэрэгт буруутай гэж үзэн, нэмж 30 жилийн хорих ял оноолоо.
Yonhap News Agency агентлагийн мэдээлснээр, өдгөө 65 настай төрийн тэргүүн асан дайсанд тусалсан болон эрх мэдлээ урвуулан ашигласан гэм буруутайд тооцогджээ.
Прокурорын байгууллагын дүгнэлтэд дурдсанаар, Юн Сок Ёль 2024 оны аравдугаар сард байлдааны зориулалттай дронуудыг Пёньяны агаарын орон зайд нэвтрүүлэх үүрэг өгсөн байна. Прокуроруудын үзэж буйгаар, энэ нь улсад онц байдал зарлах үндэслэл бүрдүүлэх зорилготой байсан аж. Харин ерөнхийлөгч асан эдгээр буруутгалыг няцаасаар буй юм байна.
Юн Сок Ёль 2024 оны арванхоёрдугаар сард Өмнөд Солонгост онц байдал тогтоохыг оролдсон ч парламентын эсэргүүцэлтэй тулгарч бүтэлгүйтсэн. Уг үйл явдлын дараа түүнийг албан тушаалаас нь огцруулж, Өмнөд Солонгосын нийгэмд улс төрийн томоохон хуваагдал үүссэн байна.
Онц байдал тогтоох оролдлоготой холбоотойгоор түүнд нийт найман эрүүгийн хэрэг үүсгэснээс өмнө 2026 оны хоёрдугаар сард Сөүлийн Төв дүүргийн шүүх эрх мэдлээ урвуулан ашигласан, бослогод турхирсан гэх үндэслэлээр түүнд бүх насаар нь хорих ял оноож байв. Тухайн үед прокурорын байгууллага цаазаар авах ял шаардаж байсан ч шүүх бүх насаар хорих шийдвэр гаргасан.
Юн Сок Ёль уг шийдвэрийг давж заалдсан бөгөөд хэрэг давж заалдах шатны шүүхээр үргэлжлэн хэлэлцэж байгаа ажээ.
Эх сурвалж: DW
