Украин улс бямба гаргийн өглөө ОХУ-ын нефть боловсруулах үйлдвэрүүд болон цэргийн байгууламжуудад дроны цохилт өгсний дотор Санкт-Петербург орчмын хэд хэдэн объект багтсан байна. Энэ үеэр Кремлийн ивээн тэтгэсэн олон улсын форумын сүүлчийн өдөр үргэлжилж байжээ.
Украины талын мэдээлснээр, онилсон байнуудын дунд тэнгисийн цэргийн байгууламжууд, мөн нефтийн агуулах, шатахуун хадгалах терминалууд багтсан байна.
Ленинград муж руу дахин давтан цохилт өгчээ
Сүүлийн хэд хоногт энэ нь Ленинград мужийг онилсон хоёр дахь томоохон дроны довтолгоо болжээ. Оросын тал лхагва гаргийн өглөө тус бүсэд ойролцоогоор 60 дроныг устгасан гэж мэдэгдсэн. Энэ нь Санкт-Петербургийн олон улсын эдийн засгийн форум (SPIEF) эхлэхийн өмнөхөн болсон байна.
Украины Ерөнхийлөгч Володимир Зеленский “Манай дронууд ойролцоогоор 1000 км зай туулж, Санкт-Петербургийн бүс дэх дайсны тэнгисийн арсенал болон Кронштадтын баазад хүрсэн” гэж мэдэгджээ.
Кронштадт - Оросын тэнгисийн гол баазуудын нэг
Кронштадт нь Балтын тэнгисийн бүс дэх Оросын тэнгисийн цэргийн гол бааз, засвар үйлчилгээ болон хангалтын төв бөгөөд тэнгисийн цэргийн академитай аж. Өмнө нь тус бүсэд байсан нэг байлдааны хөлөг онгоц дроны цохилтод өртсөн гэж мэдээлжээ.
Оросын албан мэдээллийн агентлаг ТАСС-ын мэдээлснээр, Кронштадт хотод хэдэн цагийн турш хөдөлгөөнийг түр хаасан байна.
Санкт-Петербургт анхааруулга өгчээ
Хотын захирагч Александр Беглов Telegram хуудастаа “Санкт-Петербургт өргөн цар хүрээтэй дроны халдлага явагдаж, гурван хүн шархадсан” гэж мэдэгджээ. Тэрбээр иргэдэд гэрээсээ гарахгүй байх, мөн гар утасны сүлжээ тасалдаж болзошгүйг анхааруулсан байна.
Ленинград мужид 141 дрон устгасан гэж мэдээлэв
Бүс нутгийн захирагч Александр Дрозденкогийн хэлснээр, нийт 141 нисгэгчгүй төхөөрөмж устгасан бөгөөд хэд хэдэн газар дроны хэлтэрхий унасан байна. Түүнчлэн Большая Ижора тосгонд гал гарч, 600 гаруй хүнийг нүүлгэн шилжүүлжээ.
CNN-ийн мэдээлснээр, тус бүсэд байрлах Оросын тэнгисийн цэргийн агуулах орчимд өтгөн утаа нэмэгдэж байгаа дүрс бичлэгийг газар дээр нь баталгаажуулсан байна.
Краснодар, Тюменьд мөн цохилт өгсөн
Украины аюулгүй байдлын алба (SBU)-ны мэдээлснээр, Краснодар мужид нефтийн агуулахад цохилт өгч, дор хаяж гурван шатахуун хадгалах сав шатсан байна. Мөн Тюмень мужийн алслагдсан нэгэн нефтийн үйлдвэрт гал гарсан тухай мэдээлсэн ч орон нутгийн эрх баригчид үүнийг “техникийн гэмтэл” гэж тайлбарлаж, дронтой холбосныг үгүйсгэжээ.
Украин Оросын шатахууны дэд бүтцийг онилж байна
Сүүлийн саруудад Киев Оросын нефтийн салбарын объектууд руу чиглэсэн холын тусгалтай дроны довтолгоогоо эрчимжүүлж, түлшний нийлүүлэлтийн сүлжээнд дарамт учруулж байна гэж ажиглагчид үзжээ.
Украины Агаарын цэргийн хүчин "Орос нэг шөнийн дотор 272 дрон илгээснээс 249-ийг нь устгасан" гэж мэдэгджээ. Нийт 11 байршилд цохилт өгсөн байна.
Эх сурвалж: CNN
