Украины Ерөнхийлөгч Владимир Зеленский "ОХУ-ын Ерөнхийлөгч Владимир Путин түүний шууд уулзалт хийх саналаас татгалзсан нь Оросын тал дайныг зогсоох сонирхолгүй байгааг харуулж байна" гэж мэдэгджээ.
Зеленский зургадугаар сарын 5-ны орой иргэддээ хандан хийсэн уламжлалт дүрс бичлэгийн мэдэгдэлдээ "Харамсалтай нь, Оросын тал дахин дайны замыг сонголоо. Өнөөдрийн хариултыг бүгд сонслоо. Энэ нь дайныг дуусгах бодит хүсэл эрмэлзэл байгааг харуулсангүй. Тэр зүгээр л дайныг дуусгахыг хүсэхгүй байна" хэмээн онцолсон байна.
Түүний үзэж буйгаар, Путины хариулт дэлхийн олон орны урмыг хугалсан бөгөөд Оросын төрийн тэргүүн өнөөгийн нөхцөл байдлыг өөрчлөх, мөн энэ дайн өөрт нь болон түүний хүрээллийн хүмүүст л ашигтай байгааг хүлээн зөвшөөрөхийг хүсэхгүй байгаа аж.
Украины Ерөнхийлөгч "Тиймээс Орост очих мөнгө багасч, Орост үзүүлэх дарамт улам нэмэгдэх ёстой" гэж мэдэгджээ.
Үүнээс өмнө Путин Санкт-Петербургийн олон улсын эдийн засгийн форумын нэгдсэн хуралдаанд оролцох үеэрээ Зеленскийтэй уулзах шаардлага одоогоор харагдахгүй байна гэж мэдэгдсэн байна. Тэрбээр Зеленскийн ил захидлыг "зохисгүй өнгө аяс агуулсан бичиг" хэмээн тодорхойлж, дээд түвшний уулзалт нь зөвхөн дайныг зогсоох тодорхой тохиролцоонд хүрсний дараа утга учиртай болно гэсэн байр суурь илэрхийлжээ.
Харин Зеленский өмнөх өдөр нь нийтэлсэн нээлттэй захидалдаа "Оросын армийн сарын хохирол 30 мянгаас давсан, амиа алдсан болон хүнд шархадсан цэргийн хэмжээнд хүрсэн" гэж дурдсан байна.
Захидал нийтлэгдсэний дараа Йоханн Вадефуль Путинд хандан Европын орнуудын оролцоотойгоор Украинд энх тайван тогтоох хэлэлцээг эхлүүлэхийг уриалжээ. Тэрбээр "Мөргөлдөөн зайлшгүй төгсгөлдөө хүрэх ёстой шатанд орсон" гэж мэдэгдсэн байна.
Эх сурвалж: DW
