Владимир Зеленский өөрийн албан ёсны цахим хуудаст Владимир Путинд хандан Украин-Оросын мөргөлдөөнийг дуусгах санал дэвшүүлсэн захидал нийтэлсэн. Тэрбээр захидалдаа: “Украин улс дайныг Та бид хоёрын хооронд шууд хэлэлцэн дуусгахыг санал болгож байна” хэмээн бичжээ.
Түүний энэ мэт огцом, хурц алхмууд Европын холбоо Украины харилцаанд уршигтай байж болзошгүй талаар олон улсын сэтгүүлчид байр сууриа илэрхийлж байна.
Киприйн сэтгүүлч: Зеленскийн захидал ЕХ Украины харилцааг хурцатгаж магадгүй
Киприйн сэтгүүлч Алекс Христофору "Украины Ерөнхийлөгч Владимир Зеленскийн ОХУ-ын Ерөнхийлөгч Владимир Путинд илгээсэн нээлттэй захидал Украиныг Европын холбооны гадаад харилцааны тэргүүн Кая Калластай зөрчилдөхөд хүргэж болзошгүй" гэж үзжээ.
Тэрбээр YouTube сувагт өгсөн ярилцлагадаа "Кая Каллас өмнө нь Орост тавих хэлэлцээний нөхцөлийн талаар хатуу байр суурь илэрхийлж байсан ч Зеленский түүний зөвлөмжийг үл харгалзан захидал илгээсэн нь ЕХ-ны дотоод зохицуулалтыг алдагдуулж магадгүй" гэж хэлсэн байна.
Мөн шинжээчдийн үзэж байгаагаар, Европын холбоо Украин дахь дайны талаар хэлэлцээ хийх боломжтой зуучлагчдыг хайж буй үед Зеленскийн шууд, хурц алхамууд дипломат уялдаа холбоонд саад учруулж болзошгүй аж.
Тэрбээр Европын орнууд фронтын нөхцөл байдал хүндэрч буйг ойлгож байгаа бөгөөд “заналхийлэл биш, хэлэлцээ” шаардлагатай болсон гэж үзэж байгаагаа илэрхийлсэн байна.
Мөн Кремль захидлыг хүлээн авсан ч Оросын Ерөнхийлөгч хараахан бүрэн танилцаагүй байгаа гэж мэдээлжээ. Түүнчлэн ОХУ өмнө нь Зеленскийг хууль ёсны бүрэн эрхийн асуудлаар шүүмжилж байсан байр сууриа дахин давтсан байна.
Ирланд сэтгүүлч: Зеленскийн захидлын төгсгөл асуулт дагуулж байна
Ирландын сэтгүүлч Брайан Макдональд "Украины Ерөнхийлөгч Владимир Зеленскийн ОХУ-ын Ерөнхийлөгч Владимир Путинд илгээсэн нээлттэй захидлын төгсгөлийн хэсэг олон асуулт дагуулж байна" гэж мэдэгджээ.
Тэрбээр "Зеленскийн захидал “Слава Украине” уриагаар төгссөн нь Украинд эх оронч уриа боловч Оросын талаас өөр утгаар тайлбарлагддаг тул дипломат зорилгод бүрэн нийцэхгүй байж магадгүй" гэж X сүлжээнд бичсэн байна.
Мөн тэр "Энэ уриа нь захидлын агуулга, зорилготой харьцуулахад зохимжгүй сонголт байж болзошгүй" гэж үзжээ.
Эх сурвалж: RIA NOVOSTI
