Der Spiegel мягмар гарагт (тавдугаар сарын 26) "АНУ НАТО-д оруулах цэргийн хувь нэмрээ мэдэгдэхүйц бууруулахаар төлөвлөж байна" гэж мэдээлжээ.
Сэтгүүлийн мэдээлснээр, өнгөрсөн долоо хоногийн сүүлээр АНУ-ын Батлан хамгаалах яамны сайд Пит Хэгсэтийн төлөөлөгч НАТО-гийн төв байранд тус эвслийн бусад гишүүн орнуудын өндөр албан тушаалтнуудад төлөвлөж буй цомхотголын талаар мэдээлэл өгсөн байна.
Вашингтон цаашид НАТО-д нийлүүлдэг цэргийн зарим гол нөөцөө эрс багасгах бөгөөд үүнд сөнөөгч онгоц, усан онгоц, нисгэгчгүй төхөөрөмж, агаарт түлш цэнэглэгч онгоц болон стратегийн бөмбөгдөгч онгоцууд багтаж буй аж. Ялангуяа сөнөөгч онгоцны хувьд АНУ-ын хувь нэмэр гуравны нэгээр буурах төлөвтэй байгаа юм байна.
Энэхүү цомхотгол нь НАТО-гийн “хүчний загвар” (force model)-ын хүрээнд хийгдэх аж. Урьдчилсан “дарамт хуваах” (burden sharing) тогтолцоогоор АНУ эвслийн цэргийн хүчин чадлын бараг талыг дангаараа бүрдүүлдэг байсан бол одоо Вашингтон “нөөц шилжүүлэх” (burden shifting) зарчим руу шилжихийг шаардаж буй юм байна.
Пентагоны төлөөлөгч Александер Велес-Грин тавдугаар сарын 22-нд НАТО-гийн гишүүн орнуудын бодлогын захирлуудад АНУ-ын төлөвлөгөөг тоон үзүүлэлттэйгээр танилцуулжээ. АНУ одоо зургадугаар сард болох Цэргийн хүчний эх үүсвэр хуваарилах хуралаас өмнө Европын аль улс орнууд АНУ-ын "таналт"-уудыг орлох боломжтой талаар санал гаргахыг хүлээж байгаа аж.
Greenpeace-ийн үнэлгээ
Greenpeace-ийн судалгаагаар, АНУ-ын оролцоогүй ч Европын НАТО-гийн гишүүн орнууд Оросоос цэргийн хүчин чадлын хувьд илүү байсаар байна гэж дүгнэжээ. 2025 онд Европын холбоотнууд болон Канад нийтдээ ойролцоогоор 626 тэрбум ам.долларыг батлан хамгаалахад зарцуулсан бол Оросын зардал ойролцоогоор 190 тэрбум ам.доллар байсан аж.
Мөн Европ + Канад нь 2215 байлдааны онгоц (Орос: 1064), 143 усан онгоц (Орос: 34), 15,896 их буу (Орос: 5,976) зэрэг үзүүлэлтээр давуу байна гэж тайланд дурдсан байна. Гэвч шинжээчдийн үзэж буйгаар, Европын батлан хамгаалах бодлого зохицуулалт сул, уялдаа холбоо муутай хэвээр байгаа нь сул тал болж буй аж.
Европ дахь америк цэргүүдийн тоо буурч байна
АНУ өмнө нь буюу тавдугаар сарын 19-нд Европоос дөрвөн байлдааны бригадын нэгийг татан гаргахаар болсон тухайгаа мэдээлсэн. Ингэснээр тус бүс нутаг дахь америк цэргийн тоо 2021 оны түвшинд очих аж.
Бригадын байлдааны бүлэг нь ойролцоогоор 4000-5000 цэргээс бүрддэг, бие даан байлдах чадвартай үндсэн тактикийн нэгж юм байна. Сүүлийн жилүүдэд АНУ Европт ойролцоогоор 100,000 орчим цэрэг байршуулсанаас 65,000 орчим нь байнгын, үлдсэн нь ээлжийн (ротацийн) байдлаар байрлаж байжээ.
Эх сурвалж: REUTERS
