АНУ-ын Ерөнхийлөгч Дональд Трамп баасан гаргийн орой Truth Social платформ дээр хиймэл оюун ухаанаар (AI) бүтээсэн хэд хэдэн зураг нийтэлжээ. Тэдгээрийн нэгэнд Цагаан ордны дээр “Golden Dome” нэртэй пуужингийн хамгаалалтын бамбай байрласан, нөгөөд нь өөрийгөө Гренландын нэгэн суурин дээр зогсож буй мэт дүрслэл гарч, “Hello, Greenland!” гэсэн бичигтэй байсан аж.
Эдгээр постууд анх харахад ердийн нэг эмх замбараагүй шөнийн нийтлэл мэт санагдаж болох ч үнэндээ хоёр сэдэв нь нэг стратегийн хүрээнд багтаж байгаа гэж шинжээчид үзжээ. Трамп өмнө нь энэ холбоосыг өөрөө тайлбарлаж байв.
Тэрбээр Truth Social дээр “АНУ үндэсний аюулгүй байдлын үүднээс Гренландыг зайлшгүй хэрэгтэй. Бидний барьж буй Golden Dome системд энэ маш чухал. НАТО энэ асуудалд манлайлах ёстой. Хэрэв бид тэгэхгүй бол Орос эсвэл Хятад үүнийг хийнэ. Тийм зүйл болохгүй!” хэмээн бичиж байжээ.
“Golden Dome” гэж юу вэ?
Цагаан ордонд эргэн ирсний дараа Дональд Трамп Израилийн “Iron Dome”-той төстэй пуужингийн эсрэг хамгаалалтын систем байгуулах тухай гүйцэтгэх тушаалд гарын үсэг зуржээ. Тэрбээр энэ системийг “Iron Dome” гэж нэрлээгүй, харин “Golden Dome” хэмээн нэрлэсэн нь түүний хэв маягт нийцсэн алхам байсан аж.
Энэхүү сансрын суурьтай хамгаалалтын систем нь хиймэл дагуул ашиглан АНУ руу чиглэсэн пуужинг замд нь устгах зорилготой. Трамп “Бүрэн хэрэгжсэн үед Golden Dome дэлхийн нөгөө талаас, тэр ч бүү хэл сансраас харвасан пуужинг ч саатуулж чадна” гэж хэлжээ.
Конгресс уг төсөлд “One Big Beautiful Bill Act” хуулийн хүрээнд ойролцоогоор 24 тэрбум ам.долларын санхүүжилт баталсан. Гэсэн ч Конгрессын Төсвийн газраас "Нийт өртөг нь эхний 175 тэрбум гэж тооцогдож байсан ч одоо 20 жилийн хугацаанд 1.2 их наяд ам.долларт хүрч өссөн" гэж мэдээлжээ.
Трамп уг системийг 2029 оны нэгдүгээр сард бүрэн эрхийн хугацаа дуусахаас өмнө ашиглалтад оруулахыг зорьж байгаа аж.
Гренланд яагаад чухал вэ?
Дональд Трамп Гренландыг АНУ-ын хяналтад авах сонирхлоо удаа дараа илэрхийлж ирсэн. Тэрбээр Гренландыг Данийн хагас автономит Арктикийн бүс нутаг бөгөөд стратегийн хувьд онцгой ач холбогдолтой гэж үздэг.
Түүний хэлснээр, Арктикаар дамжих Орос, Хятадын тэнгисийн хөдөлгөөнийг хянах боломжтой аж.
АНУ-ын үндэсний аюулгүй байдлын хувьд чухал байршил
Тэр бүр “Гренландыг худалдаж авах” санаа дэвшүүлж, хэрэв тохиролцоо хийхгүй бол НАТО-гийн зарим холбоотнуудад тариф ногдуулна гэж анхааруулж байсан ч энэ байр суурь дараа нь зөөлөрсөн байна. Гэсэн хэдий ч Дани болон Гренландын иргэд уг саналыг тогтмол, хатуугаар няцаасаар иржээ.
Трампын сошиал дахь улс төрийн хэв маяг
Сүүлийн үед Дональд Трамп Truth Social дээр хиймэл оюун ухаант зураг, хурц улс төрийн пост, бэлгэдэлтэй дүрслэл ашиглан мессэжээ түгээх нь нэмэгдсэн гэж ажиглагчид үзэж байна. Зарим нь үүнийг шинэ төрлийн улс төрийн харилцаа гэж үздэг бол зарим нь бодит бодлогоос илүү шоу шинжтэй гэж шүүмжилдэг аж.
Улс төрийн хурц постууд
Трамп мөн Конгрессын гишүүн Лорен Бобертийг Truth Social дээр шүүмжилж, түүнийг “сул дорой”, “урвагч” гэх мэт үгсээр тодорхойлсон байна. Тэрбээр мөн Бойбертын өрсөлдөгчийг дэмжиж, MAGA хөдөлгөөний үнэнч байдлын талаар маргаан өрнүүлжээ. Гэвч Бойберт энэ шүүмжлэлд хариу өгч, өөрийн байр суурийг хамгаалсан байна.
Эх сурвалж: UNILAD
