ОХУ-ын Ерөнхийлөгч Владимир Путин БНХАУ-ын нийслэл Бээжин хотод хүрэлцэн ирсэн талаар ТАСС агентлагийн сурвалжлагч мэдээллээ.
Путин тавдугаар сарын 19, 20-ны өдрүүдэд Бээжинд ажиллах бөгөөд түүний айлчлалын хөтөлбөр нэлээд шахуу, өндөр түвшний уулзалтуудаар дүүрэн байгаа аж.
Кремлийн олон улсын асуудал хариуцсан туслах Юрий Ушаковын мэдээлснээр, айлчлалын хамгийн чухал хэсэг БНХАУ-ын дарга Ши Жиньпинтэй хийх албан бус “цайны уулзалт” байх бөгөөд энэ үеэр олон улсын хамгийн тулгамдсан асуудлуудыг хэлэлцэхээр төлөвлөжээ.
Үүнээс өмнө:
- Орос, Хятадын төлөөлөгчдийн албан ёсны хэлэлцээ,
- БНХАУ-ын Төрийн зөвлөлийн Ерөнхий сайд Li Qiang-тай уулзах,
- Хоёр улсын “Боловсролын солилцооны жил”-ийн нээлтэд оролцох,
- ТАСС болон Xinhua News Agency агентлагийн хамтарсан үзэсгэлэн үзэх,
- Хятадын залуу инженер Пэй Пайтай уулзах зэрэг олон арга хэмжээ товлогдсон байна.
Хүндэт зочноор угтав
Бээжингийн Шоуду олон улсын нисэх буудалд Путиныг өндөр хүндэтгэлтэйгээр угтан авчээ. Түүний айлчлалд зориулан Орос, Хятадын төрийн далбааг мандуулж, хүндэт харуул жагсаан, хятад сурагч, оюутнуудаас бүрдсэн угтах баг бэлтгэсэн байна.
Онгоцны шатны дэргэд ОХУ-ын Ерөнхийлөгчийг Хятадын Коммунист намын Төв хорооны Гадаад харилцааны комиссын Тамгын газрын дарга, БНХАУ-ын Гадаад хэргийн сайд Ван И, БНХАУ-аас ОХУ-д суугаа Элчин сайд Жан Ханьхуэй, ОХУ-аас БНХАУ-д суугаа Элчин сайд Игорь Моргулов болон хоёр улсын дипломат төлөөлөгчид угтжээ.
Путин улаан хивсэн дээр алхах үеэр сурагчид, оюутнууд Орос, Хятадын жижиг далбаа намируулан хятад хэлээр “Тавтай морил!” хэмээн уухайлан угтсан байна.
Ерөнхийлөгчийн Aurus Бээжинд
Цомхон ёслолын дараа Путин өөрийн ерөнхийлөгчийн зориулалтын Aurus Senat автомашинд сууж, Хятадын төрийн ордон руу хөдөлсөн байна.
ОХУ-ын төрийн тэргүүн гадаад айлчлалын үеэр ч өөрийн автомашинаа ашигладаг уламжлалтай. Энэ удаад ч ерөнхийлөгчийн лимузиныг Оросоос тусгайлан авчирчээ.
Харин автомашины улсын дугаарыг Хятадын дипломат дугаараар сольсон байсан бөгөөд хар өнгийн дугаар нь дипломат статустай автомашины тэмдэг аж.
Эх сурвалж: TASS
