Куба Орос болон Иранаас 300 гаруй байлдааны нисгэгчгүй төхөөрөмж (дрон) худалдан авч, тэдгээрийг АНУ-ын цэргийн бааз руу довтлох зорилгоор ашиглах боломжийн талаар хэлэлцэж эхэлсэн гэж мэдээлжээ. Тухайлбал,
Гавана хотын түрээсийн статустай Гуантанамо буланд байрлах АНУ-ын цэргийн бааз, мөн Флорида мужийн хамгийн өмнөд хэсэгт орших Ки-Уэст хот дахь тэнгисийн цэргийн бааз болон байлдааны хөлгүүд рүү чиглэсэн ажиллагаанд тэдгээр дронуудыг ашиглах талаар ярилцаж байгаа аж.
Ки-Уэст нь Кубын нийслэлээс ойролцоогоор 150 км зайд оршдог гэж тавдугаар сарын 17-ны ням гарагт Axios тагнуулын мэдээлэлд үндэслэн мэдээлжээ.
АНУ-ын албаны хүмүүсийн мэдээлснээр, Куба 2023 оноос эхлэн Орос болон Иранаас довтлох зориулалттай дрон худалдан авч, арлын стратегийн чухал байршлуудад байршуулж байгаа аж. Мөн сүүлийн нэг сарын хугацаанд Кубын эрх баригчид ОХУ-д нэмэлт дрон болон цэргийн техник нийлүүлэх хүсэлт гаргасан гэж АНУ-ын өндөр албан тушаалтан тус хэвлэлд хэлжээ.
Axios-ийн тэмдэглэснээр, энэхүү мэдээлэл нь “АНУ-ын цэргийн ажиллагаа явуулах шалтаг болж магадгүй” бөгөөд энэ нь Дональд Трампын засаг захиргаа Кубыг дронт дайн болон Гавана дахь Ираны цэргийн зөвлөхүүдийн оролцоотой холбоотойгоор ноцтой аюул гэж үзэж буйг харуулж байна гэжээ.
ТТГ-ын дарга Гавана дахь албаныхантай уулзжээ
АНУ-ын Тагнуулын төв газрын (ТТГ) захирал Жон Рэтклифф тавдугаар сарын 14-ний пүрэв гарагт Гавана хотод Кубын Дотоод хэргийн яамны өндөр албан тушаалтнуудтай уулзсан байна. Кубын тал тус арал нь АНУ-ын үндэсний аюулгүй байдалд заналхийлэл учруулахгүй гэдгийг “няцаасан баримтууд”-ыг өгсөн гэж мэдэгджээ. Мөн Куба улсыг терроризмыг дэмжигч орнуудын жагсаалтаас гаргах шаардлагатай гэж үзэж байгаагаа илэрхийлсэн аж.
ТТГ-ын нэгэн ажилтаны Reuters агентлагт мэдээлснээр, Рэтклифф Кубын талд АНУ-ын Ерөнхийлөгчөөс дамжуулсан мессэж хүргэсэн бөгөөд эдийн засаг болон аюулгүй байдлын асуудлаар хэлэлцээ хийхэд бэлэн байгаа ч зөвхөн “үндсэн өөрчлөлт” хийгдсэн нөхцөлд л боломжтой гэжээ.
Мөн Axios-ийн мэдээлснээр, тэрбээр Кубын эрх баригчдад цэргийн ажиллагаа эхлүүлэхээс сэрэмжлүүлж, “тоталитар дэглэмийг унагаах” нь АНУ-ын хориг арга хэмжээг цуцлах нөхцөл гэж хэлсэн байна.
Мөн АНУ-ын Хууль зүйн яам Кубын өмнөх удирдагч Рауль Кастрод холбогдох яллах дүгнэлтийг тавдугаар сарын 20-нд нийтлэхээр төлөвлөж байгаа талаар мэдээлжээ. Түүнийг 1996 онд Майамид төвтэй “Brothers to the Rescue” хүмүүнлэгийн байгууллагын хоёр онгоцыг буудаж унагах тушаал өгсөн гэж буруутгадаг байна. Мөн ирэх долоо хоногт Кубын эсрэг шинэ хориг арга хэмжээ зарлаж магадгүй аж.
АНУ-Кубын харилцаа хурцадсан нь
Axios "2026 оны нэгдүгээр сарын эхээр АНУ-ын оролцооны улмаас Венесуэлийн Ерөнхийлөгч Николас Мадуро огцорсноос хойш АНУ ба Кубын харилцаа эрс хурцадсан" гэж мэдээлжээ. Куба нь Венесуэлийн нефть нийлүүлэлтээс ихээхэн хамааралтай тул Каракасын дэглэмийн өөрчлөлт Гаванагийн эдийн засагт хүчтэй цохилт болсон байна.
Мөн Венесуэл-АНУ-ын харилцаа сайжирснаар Кубын дрон ашиглалтын талаарх мэдээлэл АНУ-д илүү тодорхой болсон гэж тус хэвлэл онцолжээ.
АНУ мөн Кубын нефть импортолж буй орнуудын бараанд тариф тогтоосноор нөхцөл байдал улам дордсон. Дональд Трамп үндэсний аюулгүй байдлыг хамгаалах нэрийн дор онцгой байдал зарлаж, Кубын дэглэмийн эсрэг арга хэмжээ авах эрхээ өргөтгөсөн байна.
Үүний үр дүнд Кубад нефть бараг орж ирэхээ больж, тавдугаар сарын дунд үе гэхэд шатахууны нөөц бүрэн дууссан гэж эрх баригчид мэдэгджээ. Мөн цахилгаан өдөрт 20-22 цаг тасрах болсон бөгөөд хүнс, эмийн хомсдол эрс нэмэгдсэн гэж мэдээлсэн байна.
Эх сурвалж: DW
