Японы улс төрийн хүрээнд АНУ, БНХАУ-ын удирдагчдын уулзалтад Ши Жиньпин “онооны илт давуугаар ялалт байгуулсан” гэх үнэлгээ давамгайлж байна. Ийм байр суурийг Японы олон нийтийн телевизийн шинжээчдийн баг илэрхийлжээ.
Тус телевизийн олон улсын албаны редактор, АНУ болон Хятадад ажиллаж байсан туршлагатай Томоёси Комия “Энэ уулзалтыг нэг мөр дүгнэх амаргүй ч миний хувьд Ши Жиньпин онооны давуугаар ялсан мэт сэтгэгдэл төрлөө” хэмээн онцолсон байна.
Түүний үзэж буйгаар, хоёр улсын эдийн засгийн өсөлт саарч буй энэ үед талууд харилцаагаа тогтворжуулах сонирхолтой байсан аж. Комия “Ийм нөхцөлд Тайванийн асуудал дээд хэмжээний уулзалтын гол сэдэв болж хувирсан. Мөн Хятад улс Ираны асуудал зэрэг олон улсын сэдвээр өөрийн нөлөө, хүчийг дэлхийд харуулж чадсан нь Бээжингийн талд давуу байдал үүсгэлээ” хэмээн тайлбарлажээ.
Тэрбээр цааш нь Хятад улс Тайванийн асуудлыг Бээжин, Вашингтоны хоорондын шууд хэлэлцээний хүрээнд шийдвэрлэх тогтолцоог аажмаар бүрдүүлж байна гэж үзэж байгаагаа илэрхийлсэн байна. Үүний эцсийн зорилго нь Тайванийн асуудал дахь АНУ-ын оролцоог бүрэн шахан гаргах явдал гэж тэр тайлбарлажээ.
Харин эдийн засгийн хэлэлцээний талаар Комия “Хятад улс Boeing компанийн 200 онгоц захиалахаар болсон нь Трампад барьсан бэлэгтэй адил зүйл байлаа” хэмээн дүгнэсэн байна. АНУ-ын Ерөнхийлөгч Дональд Трамп энэ тохиролцоог уулзалтын томоохон амжилт болгон онцолсон юм.
Комиягийн үзэж буйгаар, Бээжин энэхүү захиалгыг Тайванийн асуудлаарх Вашингтоны байр сууринд нөлөөлөх хөшүүрэг болгон ашиглахыг зорьжээ. Гэвч үйл явдал Хятадын хүссэн чиглэлд бүрэн өрнөөгүй аж. Тэр “Эдийн засгийн хүрээнд хоёр тал тогтвортой харилцаа хөгжүүлэх сонирхолтой байгаагаа харуулсан. Тиймээс энэ тал дээр бол тэнцээ гэж хэлж болно” хэмээн дүгнэжээ.
Эх сурвалж: TASS
