АНУ-ын Ерөнхийлөгч Дональд Трамп болон Украины Ерөнхийлөгч Владимир Зеленский нарын Вашингтон дахь уулзалт долдугаар сарын 28-ны мягмар гарагт болж өндөрлөв.
Уулзалт хэвлэл мэдээллийн байгууллагуудын оролцоогүй, хаалттай хэлбэрээр болсон бөгөөд дууссаны дараа хоёр улсын удирдагчид хамтарсан хэвлэлийн бага хурал хийгээгүй байна.
Reuters агентлагийн мэдээлснээр, Владимир Зеленский Цагаан ордноос гарсан бөгөөд тэрбээр тус байранд нэг цаг гаруй хугацаанд байжээ.
Зеленский: Бид сайн уулзалт хийлээ
Уулзалтын дараа Украины Ерөнхийлөгч Владимир Зеленский өөрийн Telegram сувгаар дамжуулан Дональд Трамптай “сайн уулзалт хийсэн” гэж мэдэгджээ. Тэрбээр “Украины иргэдийн амь насыг хамгаалж, энх тайванд хүрэхийн төлөө хамтран хийж буй бүх зүйлд талархаж байна” хэмээн бичсэн байна.
Мөн Зеленский уулзалтын эхэнд Трампад Линдси Грэми нас барсантай холбоотойгоор эмгэнэл илэрхийлж, түүнийг “Украины жинхэнэ найз байсан” гэж онцолжээ. Түүний мэдээлснээр, хоёр тал дараах асуудлуудыг хэлэлцсэн байна. Үүнд:
- Patriot air defense system цогцолборт зориулсан сөнөөгч пуужин үйлдвэрлэх лицензийн асуудал;
- Украины дайныг дипломат аргаар дуусгах боломж;
- энхийн хэлэлцээг эрчимжүүлэх арга замууд багтжээ.
Зеленский “Манай багууд цаашдын хамтын ажиллагааны нарийн ширийн асуудлуудыг тохиролцоно. АНУ-ын тууштай дэмжлэгт талархаж байна” гэж хэлсэн байна.
Агаарын довтолгооноос хамгаалах систем, стратегийн хамтын ажиллагаа гол сэдэв байв
Зеленский өмнө нь АНУ-ын Ерөнхийлөгчтэй хийх уулзалтын гол сэдвүүдийн талаар ярихдаа Украины агаарын довтолгооноос хамгаалах чадавх болон хоёр улсын стратегийн хамтын ажиллагааг “нэн тэргүүний зорилт” гэж тодорхойлж байжээ.
Түүнийг АНУ-д айлчлахын өмнө Reuters агентлаг эх сурвалжуудаас авсан мэдээлэлдээ үндэслэн Украины Ерөнхийлөгч Оросын тасралтгүй үргэлжилж буй агаарын цохилтоос хамгаалахад шаардлагатай агаарын довтолгооноос хамгаалах хэрэгслийн нийлүүлэлтийг нэмэгдүүлэх асуудлыг дахин хөндөхөөр төлөвлөж байгаа талаар мэдээлж байсан аж.
Мөн хоёр орны хоорондын дроны үйлдвэрлэл, хамтын ажиллагааны хэлэлцээрийг эцэслэх асуудал уулзалтын бас нэгэн сэдэв болох талаар мэдээлсэн байна.
Гал зогсоох боломжийг хэлэлцсэн байж болзошгүй
Reuters агентлагийн өөр нэг мэдээлэлд дурдсанаар, Украины болон АНУ-ын албаныхан дайныг зогсоох боломжит нөхцөлүүдийн хүрээнд Орост агаарын орон зайд түр гал зогсоох санал тавих боломжийг хэлэлцсэн байна.
Энэ нь Украины дэд бүтцэд чиглэсэн пуужин, дроны халдлагыг бууруулах, дипломат үйл явцыг идэвхжүүлэх зорилготой алхам байж болох юм.
Эх сурвалж: DW
