Украины нийслэл Киев хот Оросын зэвсэгт хүчний баллистик пуужингийн халдлагад өртсөн гэж орон нутгийн эрх баригчид ням гаргийн өглөө мэдээлжээ. Мөн өдрийн дараа Украины бусад бүс нутгуудад болсон цохилтын улмаас дор хаяж зургаан хүн амиа алдсан байна.
Оросын тал Москвагийн хяналтад байгаа Украины нутаг дэвсгэрүүд мөн халдлагад өртсөн гэж мэдэгджээ. Тухайлбал, Оросын эзэлсэн Украины Горловка хотод Украины нисгэгчгүй онгоцны цохилтын улмаас дөрвөн хүн амиа алдсан гэж мэдээлсэн байна.
Украины Агаарын цэргийн хүчний мэдээлснээр, Оросын арми шөнийн турш Украин руу 7 баллистик пуужин, 136 нисгэгчгүй онгоц харважээ.
Украины хойд хэсгийн Чернигов хотод Оросын дроны цохилт супермаркетад тусаж, хоёр хүн, түүний дотор 9 настай хүүхэд амиа алдаж, 25 хүн шархадсан байна.
Украины Ерөнхийлөгч Владимир Зеленский Telegram сувгаар дамжуулан “Энэ бол ямар ч цэргийн үндэслэлгүй, Оросын зориудын терроризм” хэмээн мэдэгджээ.
Зүүн нутгийн Харьков хотод өдрийн цагаар болсон дроны халдлагын улмаас нэг хүн амиа алдаж, 16 хүн эмнэлгийн тусламж авсан талаар хотын дарга Игорь Терехов мэдээлсэн байна.
Мөн өмнөд нутгийн Запорожье хотод чиглүүлдэг бөмбөгний цохилтын улмаас нэг хүн амиа алдаж, зургаан хүн шархадсан гэж бүсийн захирагч Иван Фёдоров мэдэгджээ.
Киев хотын дарга Виталий Кличко "Шөнийн пуужингийн цохилтын дараа хотын төвийн нэгэн олон давхар орон сууцны барилгын 7, 8 дугаар давхарт гал гарсан" гэж мэдэгдсэн байна. Нийслэлд гурван хүн шархадсан бөгөөд Онцгой байдлын албанаас нийтэлсэн зургууд дээр автомашинууд шатаж байгаа нь харагджээ.
Оросын зэвсэгт хүчний зүүн Украины Донецк мужид хийж буй давшилтын чиглэлд багтдаг Славянск хотод Украины төрийн өмчит газрын тос, хийн компани Нафтогаз мэдээлэхдээ, өмнөх цохилтын дараа иргэдэд туслахаар ажиллаж байсан хоёр ажилтан нь Оросын халдлагад өртөж амиа алдсан байна.
Зеленский баасан гарагт Оросын халдлага дараагийн 48 цагийн хугацаанд эрчимжиж болзошгүйг анхааруулж байжээ.
Үүний зэрэгцээ Оросын хяналтад байгаа Донецкийн бүсийн Горловка хотод Оросын талын томилсон хотын дарга Иван Приходько Украины дроны цохилтын улмаас дөрвөн энгийн иргэн амиа алдсан гэж мэдэгдсэн байна. Тэрбээр дараа нь Украины дрон яаралтай тусламжийн машинд цохилт өгч, гурван эмч болон нэг иргэн шархадсан гэж нэмж мэдээлжээ.
Оросын эрх баригчид бямба гарагт Украиныг Запорожье мужийн Оросын хяналтад байгаа хэсэгт байрлах амралтын баазад дроноор халдаж, 12 хүний аминд хүрсэн гэж буруутгасан байна.
Орос болон Украин аль аль нь 2022 оны хоёрдугаар сард эхэлсэн бүрэн хэмжээний дайны үеэр энгийн иргэдийг зориудаар онилдоггүй гэж мэдэгддэг. Гэвч дайны явцад олон мянган энгийн иргэн амиа алдсан бөгөөд тэдний ихэнх нь Оросын халдлагад өртсөн украин иргэд байжээ.
Эх сурвалж: REUTERS
