Энэтхэгийн алслагдсан нэгэн тосгонд хөлбөмбөг зөвхөн спорт биш, харин соёл, уламжлал, нутгийн бахархлыг илэрхийлдэг баяр болжээ. Тус тэмцээний хамгийн сонирхолтой зүйл нь ялагчдад цом бус, харин амьд ямаа гардуулдаг явдал аж.
Дэлхий нийт Испани улс FIFA-гийн Дэлхийн аваргын хоёр дахь цомоо хүртсэн амжилт болон бүтэн сарын турш үргэлжилсэн тэмцээний үеэр тодорсон хөлбөмбөгийн "GOAT" (Greatest Of All Time - бүх цаг үеийн шилдэг тоглогчид) хэмээн нэрлэгдсэн оддын талаар ярьж байх энэ үед Энэтхэгийн нэгэн алслагдсан тосгон ч өөрийн өвөрмөц арга хэлбэрээр хөлбөмбөгийн баярт нэгдсэн байна.
Тэдний тэмцээн дэлхийн томоохон тэмцээнүүдээс ялгаатай. Энд хөлбөмбөг зөвхөн тоглолт бус, харин нутгийн уугуул ард түмний соёл, уламжлалтай салшгүй холбоотой баяр болдог ажээ.
Энэтхэгийн зүүн хэсэгт орших Жаркханд мужийн Чайбаса дүүргийн Тирилбаса тосгонд долдугаар сарын 14-нөөс 17-ны хооронд "Rangila Star Tirilbasa" нэртэй хөлбөмбөгийн тэмцээн зохион байгуулагдсан байна.
"Rangila" гэдэг нь хинди хэлээр "өнгөлөг", "баяр хөөртэй" гэсэн утгатай. Энэхүү тэмцээнд ойролцоох 64 тосгоны баг оролцсон бөгөөд Чайбаса нь Энэтхэгийн уугуул овог аймгийн хүмүүс олноор амьдардаг бүс нутаг аж.
Цомын оронд ямаа: Хөлбөмбөгийн хамгийн өвөрмөц шагнал
Тэмцээний хамгийн их анхаарал татсан зүйл нь мөнгөн шагнал биш, харин шилдэг багуудад гардуулдаг ямаан шагнал байжээ. Энд ялагчид уламжлалт цомын оронд "khassi" хэмээх эр ямаа авдаг байна.
Тэмцээний финалд NCS Maudi баг Kumbaram багийг 1:0 харьцаагаар хожиж, аваргын цомыг хүртжээ.
Аварга болсон NCS Maudi баг:
15 000 рупи (ойролцоогоор 156 ам.доллар),
3 khassi ямаа шагнал болгон авсан байна.
Хоёрдугаар байр эзэлсэн Kumbaram баг:
12 000 рупи,
2 ямаа авчээ.
Тэмцээний гурав, дөрөвдүгээр байрт шалгарсан Kobra FC Nimdhi, Galubasa FC багууд тус бүр 9000 рупи,
1 ямаа авсан байна. Мөн шилдэг тоглогч, шилдэг цуврал тоглогч, шилдэг хаалгач зэрэг шагналууд байдаг боловч тэдэнд зөвхөн мөнгөн шагнал олгодог бөгөөд ямаа өгдөггүй ажээ.
"Энэ бол манай багийн анхны ялалт"
Аварга болсон NCS Maudi багийн ахлагч Сачин Девам баг нь тэмцээнд оролцохдоо хоёр дугуйт мотоциклтой ирсэн боловч одоо авсан ямаануудаа гэртээ хүргэхийн тулд авто рикша хөлслөх шаардлагатай болсон тухай ярьжээ.
Түүний гэр тэмцээний талбайгаас 10 км-ийн зайд байдаг байна. Тэрбээр баяртайгаар "Энэ бол манай багийн анхны ялалт. Бид энэ баярыг тосгоны бүх хүмүүстэйгээ хамт тэмдэглэнэ. Энэ жинхэнэ khassi зоог болох нь" хэмээн ярьжээ.
"Khassi бол манай соёлын салшгүй хэсэг"
Энэ жил Rangila Star Tirilbasa тэмцээн тав дахь удаагаа зохион байгуулагдсан байна. Зохион байгуулагчид тэмцээнийг FIFA-гийн дүрмийн дагуу явуулдаг бөгөөд тоглолтыг шударга, зохион байгуулалттай болгохын тулд мужийн хөлбөмбөгийн холбооноос эрх авсан шүүгч, тайлбарлагчдыг урьдаг байна.
Гэхдээ энэ тэмцээн энгийн хөлбөмбөгийн тэмцээнээс өөр нэг чухал онцлогтой. Учир нь, энэ нь Чайбаса бүс нутгийн уугуул Хо (Ho) ард түмний эртний уламжлал, соёлтой холбоотой юм.
Хо ард түмэн ба ямааны уламжлал
Энэтхэг даяар Хо үндэстэн нэг сая гаруй хүнтэй бөгөөд тэд Австроазиат хэл, соёлын бүлэгт багтдаг уугуул ард түмэн юм. Тэд өөрсдийгөө ой модтойгоо салшгүй холбоотой "аадиваси" буюу уугуул иргэд хэмээн тодорхойлдог.
Хо хэлэнд "хо" гэдэг үг нь Жаркханд мужийн Колхан бүсийн "хүн", "ард түмэн" гэсэн утгыг илэрхийлдэг. Хо, Сантал, Мунда зэрэг уугуул овгууд уламжлалт шашин, зан үйл, спортын арга хэмжээгээ хамтын нийгэмлэгийн хүчтэй холбоонд тулгуурлан зохион байгуулдаг байна.
Тиймээс хөлбөмбөгийн тэмцээн нь тэдний хувьд зөвхөн өрсөлдөөн биш, харин овгийн хүмүүсээ нэгтгэх,
ахан дүүсийн холбоогоо бэхжүүлэх, нутгийн бахархлаа илэрхийлэх чухал үйл явдал болдог байна.
Хөлбөмбөг бол Чайбасагийн шинэ мөрөөдөл
Энэтхэгт хөлбөмбөгийн спорт үндэсний хэмжээнд крикетийн дараа ордог мэт харагддаг ч Чайбаса зэрэг бүс нутагт энэ спорт олон жилийн турш хүмүүсийн амьдралын нэг хэсэг байсаар иржээ.
Эндхийн залуусын хувьд хөлбөмбөг зөвхөн тоглоом биш, авьяас чадвараа харуулах, нэрээ гаргах, амьдралаа өөрчлөх боломж аж. Rangila Star Tirilbasa шиг нутгийн тэмцээнүүд олон залуу тоглогчдод өөрсдийгөө харуулах талбар болж, Энэтхэгийн хөлбөмбөгийн шинэ үеийг төрүүлэхэд хувь нэмрээ оруулж байна.
Эх сурвалж: AL JAZEERA
