АНУ Ираны эсрэг шинэ давлагаа бүхий цохилт эхлүүлсэн талаар тус улсын Зэвсэгт хүчний Төв командлал (CENTCOM) нийгмийн сүлжээ X платформоор дамжуулан мэдээлжээ. Тус мэдэгдэлд “Зэвсэгт хүчний дээд ерөнхий командлагчийн тушаалаар АНУ-ын цэргүүд Ираны цэргийн объектуудын эсрэг шинэ цохилт өгч эхэллээ” гэж дурдсан байна.
Үүний зэрэгцээ хэвлэлүүдийн мэдээлснээр, Ираны өмнөд хэсэгт орших Сирик хот болон Бушер мужийн орчимд хэд хэдэн дэлбэрэлт болжээ. Мөн Ираны Бушер мужийн төв хэсэгт байрлах нэгэн объект пуужингийн цохилтод өртсөн талаар мэдээлсэн байна.
Гал зогсоох санал яригдаж байсан ч хурцадмал байдал үргэлжилж байна
Өмнө нь Axios мэдээллийн портал зуучлагч талууд Вашингтонд 10 хоногийн хугацаатай гал зогсоох санал хүргүүлсэн талаар мэдээлжээ. Эх сурвалжуудын мэдээлснээр, Цагаан ордон уг саналыг судалж буй бөгөөд Израилийг нөхцөл байдлыг хурцатгах алхам хийхээс зайлсхийхийг уриалсан байна. Гэвч Вашингтон хэлэлцээ бүтэлгүйтэх боломжийг тооцож, бүс нутаг дахь цэргийн оролцоогоо нэмэгдүүлж эхэлжээ.
Мөргөлдөөн дахин хурцдав
Мэдээлэлд дурдсанаар, долдугаар сарын 8-ны шөнө АНУ Ираны Исламын Бүгд Найрамдах Улсын эсрэг цохилтоо сэргээсэн байна. Вашингтон үүнийгээ Иран Ормузын хоолойд худалдааны хөлөг онгоцуудын эсрэг халдлага үйлдсэнтэй холбон тайлбарлажээ.
Тегеран үүнийг өмнө нь байгуулсан тохиролцоог зөрчсөн үйлдэл гэж үзэж, Ойрхи Дорнод дахь АНУ-ын цэргийн баазуудын эсрэг хариу цохилт өгч эхэлсэн аж. Ийнхүү мөргөлдөөний шинэ шатны хурцадмал байдал талууд зөрчлийг дуусгавар болгох тухай санамж бичигт гарын үсэг зурснаас ердөө гурван долоо хоногийн дараа үүсчээ.
Эх сурвалж: RIA NOVOSTI
