Монгол Улсын Зоонозын өвчин судлалын үндэсний төвөөс тарваган тахал өвчний халдвар авах эрсдэл өндөр байгааг анхааруулж, иргэдийг урьдчилан сэргийлэх арга хэмжээг чанд мөрдөхийг зөвлөсөн талаар AKIpress мэдээлснийг бид энэ удаа "БИДНИЙ ТУХАЙ" буландаа онцолж байна.
Тус хэвлэлийн нийтлэлд "Монгол Улсын Зоонозын өвчин судлалын үндэсний төвөөс мэдээлснээр, тарваган тахлын байгалийн голомт бүхий бүс нутагт халдварын идэвхжил улирлын онцлогоос шалтгаалан нэмэгдэж байгаа энэ үед тарвага агнах, тээвэрлэх, боловсруулах, түүхий эд эрхтэнтэй нь харьцах нь халдвар авах эрсдэлийг ихэсгэдэг байна.
Мэргэжлийн байгууллагаас иргэдэд тарвага агнахгүй байх, тарваганы түүхий мах хэрэглэхгүй байх, сэжигтэй амьтанд хүрэхгүй байхыг зөвлөжээ. Мөн өндөр халуурах, тунгалгийн булчирхай хавдах зэрэг шинж тэмдэг илэрвэл яаралтай эмнэлгийн байгууллагад хандахыг сануулсан байна.
Монгол Улс тарваган тахлын байгалийн голомттой орны нэг бөгөөд жил бүр эрсдэлтэй бүс нутгуудад тандалт, шинжилгээ хийж, халдвараас урьдчилан сэргийлэх арга хэмжээг хэрэгжүүлдэг.
Эрүүл мэндийн байгууллагуудын мэдээлснээр, өвчнийг эрт илрүүлж эмчилгээ хийвэл эдгэрэх боломжтой ч эмчилгээ хожимдвол амь насанд аюултай хүндрэл үүсэх эрсдэлтэй байдаг.
Зоонозын өвчин судлалын үндэсний төвөөс халдварын эрсдэл өндөр байгаа энэ үед иргэдийг мэргэжлийн байгууллагын зөвлөмжийг мөрдөж, хууль бусаар тарвага агнах, тээвэрлэх, худалдан авахгүй байхыг дахин анхааруулжээ" гэжээ.
Эх сурвалж: AKIPRESS
