АНУ-ын Зэвсэгт хүчний Төв командлал (CENTCOM) долдугаар сарын 13-нд шилжих шөнө Ираны эсрэг шинэ цохилтууд эхэлснээ мэдэгдэв. АНУ-ын цэргийнхэн X нийгмийн сүлжээнд "Эдгээр ажиллагааны зорилго нь Исламын Бүгд Найрамдах Иран Улсын Ормузын хоолойгоор саадгүй зорчиж буй энгийн далайчид болон арилжааны усан онгоцуудад халдах боломжийг нь цаашид сулруулах явдал" гэж мэдээлжээ.
CENTCOM "Ерөнхий командлагч эдгээр цохилтыг Ираны дэглэмийг тогтоон барих зорилгоор өгөхийг үүрэг болгосон" хэмээн мөн онцолсон байна.
Ираны төрийн өмчит IRIB телевизийн мэдээлснээр, Бендер-Аббас боомтын баруун хэсэг, Сирик хотын орчим, Кешм арал, мөн Ормузын хоолойн бүсэд орших Жаск хотод хүчтэй дэлбэрэлтүүд болсон байна.
Засгийн газрыг дэмжигч Mehr агентлагийн мэдээлснээр, Кешм арал дээр нэг хүн амиа алдаж, хоёр хүн шархаджээ.
Ормузын хоолойн нөхцөл байдал
Ираны Исламын хувьсгалын харуулын корпус (ИИХХК) "АНУ болон Израилтай дайн эхлэхээс өмнө дэлхийн газрын тосны худалдааны ойролцоогоор 20 хувь нь дамжин өнгөрдөг байсан Ормузын хоолойг "АНУ-ын бүс нутаг дахь цэргийн оролцоо дуусах хүртэл, дараагийн мэдэгдэл гарах хүртэл" хаасан" гэж мэдэгджээ.
Харин АНУ-ын арми энэ мэдэгдлийг няцааж, CENTCOM "Иран Ормузын хоолойг хянадаггүй. Усан тээврийн хөдөлгөөн хэвийн үргэлжилж байна" хэмээн мэдэгдсэн байна. АНУ-ын Ерөнхийлөгч Дональд Трамп мөн үүнтэй ижил мэдэгдлийг долдугаар сарын 12-нд хийжээ.
АНУ-ын цохилтын дараа Иран хөрш орнуудыг онилов
Долдугаар сарын 12-нд шилжих шөнө АНУ-ын зэвсэгт хүчин Иран дахь ойролцоогоор 140 цэргийн байгууламжид цохилт өгснөө мэдэгджээ. Үүнд пуужин, дроны агуулахууд болон холбооны зангилаанууд багтсан байна.
АНУ "Энэ нь ИИХХК Ормузын хоолойд явж байсан GFS Galaxy чингэлэг тээврийн хөлөг онгоц руу халдсаны хариу арга хэмжээ байсан гэж тайлбарласан байна.
Харин Ираны тал уг иргэний усан онгоц руу "анхааруулах буудлага" хийсэн бөгөөд Тегераны баталсан чиглэлээр яваагүй тул ийм арга хэмжээ авсан" гэж мэдэгджээ. АНУ-ын цохилтын дараа Иран Персийн булангийн орнууд болон Иорданы чиглэлд цохилт өгсөн байна.
ИИХХК-ын мэдээлснээр, бай нь АНУ-ын цэргийн объектууд байсан бөгөөд үүнд Катар дахь Аль-Удейд агаарын цэргийн бааз, Оман дахь Дукм боомт (Ираны мэдээлснээр АНУ-ын нисэх онгоц тээгч хөлгүүд ашигладаг) зэрэг багтжээ.
Мөн тэр өдөр Тегеран Ормузын хоолойд дахин нэг усан онгоцыг ажиллагаагүй болгосноо мэдэгдсэн байна. Энэ нь нэг хоногийн дотор саатуулагдсан хоёр дахь усан онгоц болсон байна.
Тегеран, Вашингтоны хоорондын эвлэрэл нурав
Зургадугаар сарын 17-нд АНУ, Иран хоёр байлдааны ажиллагааг зогсоож, стратегийн чухал ач холбогдолтой Ормузын хоолойн хөдөлгөөнийг сэргээх тухай суурь хэлэлцээр байгуулсан.
Гэвч зургадугаар сарын 25-наас хойш Ираны зэвсэгт хүчин Ормузын хоолойгоор зорчиж байсан иргэний усан онгоцууд руу удаа дараа халдсан. АНУ үүний хариуд Ираны нутаг дэвсгэрт цохилт өгч эхэлсэн байна. Хоёр тал эвлэрлийг зөрчсөн бурууг бие биедээ тохсоор иржээ.
Трамп: Ирантай байгуулсан санамж бичиг хүчингүй болсон
Долдугаар сарын 8-нд Анкарад болсон НАТО-гийн дээд хэмжээний уулзалтын үеэр АНУ-ын Ерөнхийлөгч Дональд Трамп Ирантай байгуулсан харилцан ойлголцлын санамж бичиг цаашид хүчин төгөлдөр бус болсон гэж мэдэгдсэн байна.
Тэрбээр Ираны удирдагчдыг "муу санаатай, өвчилсөн хүмүүс" хэмээн тодорхойлоод, тэдэнтэй хэлэлцээ хийх нь "цаг үрсэн хэрэг" гэж мэдэгджээ. Гэсэн ч хэрэв шаардлагатай гэж үзвэл өөрийн хэлэлцээний багийг Ирантай яриа хэлэлцээг үргэлжлүүлэхийг зөвшөөрнө гэж нэмж хэлсэн байна.
Үүний зэрэгцээ АНУ Ираны газрын тосны салбарын эсрэг хориг арга хэмжээг дахин сэргээжээ.
Reuters: Ираны албан тушаалтнууд алдаагаа хүлээн зөвшөөрсөн гэж мэдээлэв
Долдугаар сарын 11-нд Reuters агентлагийн мэдээлснээр, АНУ-тай хаалттай уулзалт хийсэн Ираны албан тушаалтнууд Ормузын хоолойд болсон усан онгоцнуудын эсрэг шинэ халдлагыг "төрийн хяналтаас гадуур үйл ажиллагаа явуулж буй бүлэглэлүүд"-ийн үйлдэл хэмээн тайлбарлажээ.
Вашингтоны эх сурвалж Reuters-т "Тэд бидэнд 'Бид бүтэлгүйтсэн. Алдаа гаргасан. Одоо ярилцъя' гэж хэлсэн" хэмээн мэдэгдсэн байна.
Гэвч Ормузын хоолойн цаашдын удирдлагын асуудлаарх хэлэлцээ мөн өдөр ямар нэгэн ахиц дэвшилгүйгээр өндөрлөсөн гэж dpa агентлаг мэдээлжээ.
Эх сурвалж: DW
