Жеффри Эпштейнд олон жил ажилласан туслах Лесли Гроф өнгөрсөн сард АНУ-ын Конгрессын гишүүдэд мэдүүлэг өгөхдөө "Эпштейнд массаж хийж байсан охид, залуу эмэгтэйчүүдийн хэнтэй нь ч уулзаж байгаагүй, мөн тэдний нас, амьдралын нөхцөл байдлын талаар мэдэхгүй байсан" гэж мэдэгджээ.
Гэвч Эпштейний хэргийн зарим хохирогчид Грофын энэхүү мэдүүлгийг бодит байдалтай нийцэхгүй гэж үзэж, түүний хэлсэн хэд хэдэн асуудалд эргэлзэж буйгаа илэрхийлсэн байна.
CNN агентлагт ярилцлага өгсөн зургаан эмэгтэйн дөрөв нь нэрээ ил тод хэлж, хоёр нь нууц нэр ашиглажээ. Тэд Грофтой биечлэн уулзаж байсан, өөрсдийн насны талаар түүнтэй ярилцаж байсан, мөн Эпштейний туслахаас шууд мөнгө авч байсан тухайгаа ярьжээ. Эдгээр мэдэгдэл нь Грофын Конгресст өгсөн тайлбартай зөрж байгаа аж.
Эдгээр асуудал нь Грофын зургадугаар сарын 9-нд АНУ-ын Төлөөлөгчдийн танхимын Хяналтын хороонд өгсөн хэдэн цаг үргэлжилсэн мэдүүлгийн үеэр хөндөгджээ. Тус хороо Эпштейний ойрын хүрээлэлд байсан хүмүүсээс цуврал мэдүүлэг авч, хэргийн талаар нэмэлт мэдээлэл цуглуулж байгаа аж.
Гроф мэдүүлэхдээ Эпштейнийг “хүмүүсийг хуурч, өөрийн жинхэнэ үйлдлүүдийг нууж чаддаг маш зальжин хүн байсан” гэж тодорхойлжээ. Тэрбээр "Эпштейний охид, эмэгтэйчүүдийн эсрэг үйлдсэн хүчирхийллийн талаар мэдээгүй, өөрөө түүний арга зальд хууртсан" гэж тайлбарласан байна.
Грофын нэр 2008 онд Флорида мужийн холбооны прокурорууд болон Эпштейний хооронд байгуулсан маргаантай тохиролцооны хүрээнд боломжит холбоотой хүмүүсийн нэг байдлаар дурдагдаж байсан ч өнөөг хүртэл түүнд эрүүгийн хэрэг үүсгэж, ял шийтгэл оногдуулаагүй байна. Грофын өмгөөлөгч CNN-ийн тайлбар хүссэн хүсэлтэд хариу өгөөгүй байна.
АНУ-ын Төлөөлөгчдийн танхимын Хяналтын хорооны төлөөлөгч CNN-д хэлэхдээ, тус хороо Грофын мэдүүлгийг одоо байгаа баримт материалуудтай харьцуулан шалгаж буй бөгөөд нэмэлт мэдээлэлтэй хүмүүсээс нотлох баримт хүлээн авахад бэлэн болохоо мэдэгджээ.
Хорооны Ардчилсан намын тэргүүлэгч төлөөлөгч Роберт Гарсиагийн хэвлэлийн төлөөлөгч Сара Герреро “Лесли Гроф Эпштейний ойрын хүрээлэлд юу болж байсныг мэдэж байсан гэж бид үзэж байна. Конгресст худал мэдүүлэх нь гэмт хэрэг бөгөөд ийм үйлдэл гарсан бол хариуцлага тооцох ёстой” гэж мэдэгдсэн байна.
Хохирогчид: “Гроф бидэнтэй уулзаж байсан”
Гроф Конгресст мэдүүлэхдээ Эпштейнд массаж хийдэг байсан охид, эмэгтэйчүүдийн хэнтэй нь ч уулзаж байгаагүй гэж хэлжээ. Тэр “Миний мэдэж байгаагаар би эдгээр массаж хийдэг эмэгтэйчүүдийн хэнтэй нь ч уулзаж байгаагүй” гэж тэр мэдүүлсэн байна. Харин CNN-тэй ярилцсан зургаан хохирогч бүгд Грофтой биечлэн уулзаж байсан талаараа мэдэгджээ.
Марина Ласерда Эпштейнтэй анх 2002 онд, 14 нас хүрэхийнхээ өмнө танилцсан бөгөөд хүчирхийлэлд өртөж байсан хугацаандаа Грофыг байнга хардаг байсан гэж ярьсан байна. Ласерда “Тэр худлаа ярьж байна. Зөвхөн миний болон найзуудын маань хувьд гэхэд тэр дор хаяж гурав, дөрвөн хүнтэй уулзсан” гэж хэлжээ.
Шарлин Рошард Грофтой Нью-Йорк хотын хэд хэдэн газарт олон удаа уулзаж байснаа мэдэгдсэн бол Лара Блум МакГи "Эпштейний байшинд түүнтэй дор хаяж хоёр удаа уулзаж байснаа санаж байна" гэж хэлсэн байна. Лиза Филлипс мөн CNN-д “Мэдээж би түүнтэй биечлэн уулзаж байсан” гэж ярьжээ.
Нас болон охидын талаарх мэдээлэл
Гроф "Эпштейн дээр очдог охид, залуу эмэгтэйчүүдийн насны талаар асууж байгаагүй, зарим нь насанд хүрээгүй гэдгийг мэдээгүй" гэж мэдүүлжээ. Харин хохирогчид үүнийг эрс няцаасан байна. Ласердагийн хэлснээр, Гроф Эпштейнд шинэ охидын талаар мэдээлэл авч, тэдний нас, гарал үүслийг асуудаг байсан аж.
Ласерда “Тэр утсаар ‘Охин ямар харагддаг вэ? Хаанаас ирсэн бэ? Хэдэн настай вэ?’ гэж асуудаг байсан” гэж ярьсан байна. Шарлин Рошард Гроф түүний аяллын бичиг баримтыг зохицуулахад оролцож байсан учраас насыг нь мэдээгүй байх боломжгүй гэж үзэж буйгаа хэлжээ.
Мөнгө болон төлбөрийн асуудал
Гроф Эпштейний нэрийн өмнөөс хэн нэгэнд шууд мөнгө өгч байгаагүй, зөвхөн зарим тохиолдолд мөнгө хүргүүлэх ажлыг зохицуулдаг байсан гэж мэдүүлсэн байна. Гэвч хэд хэдэн хохирогч түүнээс шууд мөнгө авч байсан гэж мэдэгджээ.
Ласердагийн хэлснээр, Эпштейн хотод байхгүй үед Гроф түүнд бэлэн мөнгө ихэвчлэн цагаан дугтуйнд хийж өгдөг байжээ. Өөр нэг нэрээ нууцалсан хохирогч мөн Грофоос олон удаа мөнгө авч байсан гэж ярьсан байна.
Эпштейний Нью-Йорк дахь байшингийн асуудал
Гроф "2001-2013 оны хооронд Эпштейний Нью-Йорк дахь байшинд хэзээ ч очиж байгаагүй" гэж мэдүүлжээ. Харин зарим хохирогчид түүнийг тус байшинд олон удаа харж байснаа мэдэгдсэн байна. Нэрээ нууцалсан нэг эмэгтэй “Тэр ингэж хэлж байгаа нь үнэхээр гайхмаар байна. Би түүнийг тэнд олон удаа харж байсан” гэж ярьжээ.
Эх сурвалж: CNN
