“Диспетчерийн үндэсний төв” ТӨХХК-иас "ОХУ-ын “Чадан” дэд станцаас нийлүүлж буй цахилгаан эрчим хүч 2026 оны долдугаар сарын 5-ны 22.47 цагт тасарч, Баруун бүсийн эрчим хүчний систем хүчдэлгүй болсон.

Энэ нь дээрх дэд станцад 110 кВ-ын агаарын шугамын утас тасарсантай холбоотой бөгөөд ОХУ-ын Кызыл хотоос засварын бригад ирж, гэмтлийг засварлахаар ажилласан. Иймээс Дөргөний усан цахилгаан станцаас Баян-Өлгий, Ховд, Увс аймгийн төвийн онцгой хэрэглэгчдийг цахилгаан эрчим хүчээр хангасан" гэж мэдээллээ. Засвар хийх хугацаанд хэрэглэгчдэд зар түгээж ажилласан байна.

Гэмтлийг шуурхай засварлахаар ажиллан, 2026 оны долдугаар сарын 6-ны 08.18 цагт Баруун бүсийн эрчим хүчний системийг “Чадан” дэд станцын агаарын шугамтай залгаж, 08.29 цагт хэвийн схемд орсон аж.

Улмаар Баян-Өлгий, Ховд, Увс аймгийн төв болон сумд хүчдэлтэй болжээ. Олон нийтийн цахим сүлжээнд зарим эх сурвалж ОХУ-аас нийлүүлж буй цахилгаан эрчим хүчээ хязгаарласан гэж түгээсэн нь ташаа мэдээлэл болохыг албаныхан мэдээллээ.