Монгол Улсын баруун бүсийг ОХУ-аас импортлон хангадаг цахилгаан дамжуулах шугамд техникийн гэмтэл гарсны улмаас Увс, Ховд, Баян-Өлгий зэрэг аймгийн цахилгаан хангамж түр хугацаанд доголдсон байна.
Эрчим хүчний салбарын мэдээллээс үзэхэд, баруун бүсийн хэрэглээг хангадаг Хандгайт-Улаангомын 220 кВ-ын хоёр хэлхээт өндөр хүчдэлийн шугам ОХУ-ын Тувагийн эрчим хүчний системтэй холбогддог бөгөөд импортын цахилгаан дамжуулалтад чухал үүрэг гүйцэтгэдэг аж.
Гэмтлийн цэгийг тогтоож, засварын баг хөдөлжээ
Урьдчилсан байдлаар, гэмтлийн байршлыг тодорхойлсон бөгөөд ОХУ-ын Бүгд Найрамдах Тува Улсын нийслэл Кызыл хотоос мэргэжлийн засварын баг хөдөлсөн байна. Хоёр улсын холбогдох байгууллагууд хамтран ажиллаж, гэмтлийг богино хугацаанд арилгаж, шугамын хэвийн ажиллагааг сэргээхээр ажиллаж байгаа ажээ.
Нөөц эх үүсвэрээр цахилгаан хангамжийг тогтворжуулж байна
Гэмтлийг бүрэн арилгах хүртэлх хугацаанд баруун бүсийн цахилгаан хангамжийг тогтворжуулах зорилгоор Дөргөний усан цахилгаан станцаас эмнэлэг, онцгой байдал, холбоо, ус хангамж зэрэг нэгдүгээр зэрэглэлийн хэрэглэгчдийг түр хангаж буй юм байна.
Эрчим хүчний салбарынхан мөн зарим хэрэглэгчийн ачааллыг бууруулах, хэрэглээг хязгаарлах зохицуулалт хийх шаардлага үүсч болзошгүйг анхааруулж, иргэд болон аж ахуйн нэгжүүдийг цахилгаан эрчим хүчийг хэмнэлттэй ашиглахыг зөвлөжээ.
Баруун бүсийн эрчим хүчний онцлог
Монголын баруун бүсийн эрчим хүчний систем дотоодын эх үүсвэрүүдээс гадна ОХУ-ын хил залгаа бүсийн импортын цахилгаанд тодорхой хэмжээгээр тулгуурладаг. Иймээс өндөр хүчдэлийн дамжуулах шугамд гарсан доголдол нь тухайн бүсийн аймгуудын цахилгаан хангамжид шууд нөлөөлөх эрсдэлтэй байдаг.
