АНУ-ын Тусгаар тогтнолын өдөр буюу долдугаар сарын 4-ний баярын үеэр АНУ-ын Ерөнхийлөгч Дональд Трамп ОХУ болон Украины удирдагч нартай тус тус утсаар холбогдсон талаар олон улсын хэвлэлүүд мэдээлж байна.

Эх сурвалжуудын мэдээлснээр, Трамп Путин, Зеленский нарын утасны ярианы гол агуулга Украин дахь дайны нөхцөл байдал, цаашдын боломжит энхийн хэлэлцээ болон АНУ-ын байр суурьтай холбоотой асуудлуудад чиглэжээ.

Хэдийгээр ярианы нарийн агуулга нийтэд бүрэн ил болоогүй ч энэ нь Украины дайны асуудлаарх олон улсын дипломат харилцаанд тодорхой дохио өгсөн үйл явдал гэж ажиглагчид үзэж байна.

Ялангуяа Трамп сонгуулийн өмнөх улс төрийн идэвхжил нэмэгдэж буй энэ үед гадаад бодлогын гол асуудлуудад анхаарал хандуулж буйг илтгэж байгаа аж.

Украины тал болон ОХУ-ын талаас одоогийн байдлаар эдгээр ярианы талаар дэлгэрэнгүй тайлбар хийгээгүй байна.

Зеленский: Энэ дайныг дуусгах бодит боломж бий

Украины Ерөнхийлөгч Владимир Зеленский АНУ-ын тусгаар тогтнолын 250 жилийн ойг тохиолдуулан АНУ-ын Ерөнхийлөгч Дональд Трамптай утсаар ярилцсаны дараа “Энэ дайныг дуусгах бодит боломж бий” хэмээн долдугаар сарын 4-ний бямба гарагт мэдээлсэн байна.

Түүний хэлснээр, Украин дахь дайныг дуусгахад шийдвэрлэх хүчин зүйл нь “Америкийн шийдэмгий байдал” байх аж. Мөн тэрбээр "НАТО-гийн дээд хэмжээний уулзалтын үеэр Трамптай биечлэн уулзахаар тохиролцсон" гэж нэмж хэлжээ. Уг уулзалт ирэх долоо хоногт Анкара хотод болох юм.

Ярианы үеэр Украины Ерөнхийлөгч АНУ-аас үзүүлж буй цэрэг, улс төрийн тусламжид талархал илэрхийлж, “Америк биднийг тусгаар тогтнолоо хамгаалахад дэмжиж байгаад бид туйлын ихээр үнэлж байна” хэмээн онцолсон байна.

Путин: Америкчуудад аз жаргал, хөгжил цэцэглэл хүсье

ОХУ-ын Ерөнхийлөгч Владимир Путин мөн АНУ-ын төрийн тэргүүнд тусгаар тогтнолын баярын мэндчилгээ илгээсэн талаар Кремлийн цахим хуудсанд долдугаар сарын 4-ний бямба гарагт нийтэлжээ.

Мэндчилгээнд Путин Трампад “Дональд чамд болон танай гэр бүлд эрүүл энх, сайн сайхан, амжилт хүсье. Харин бүх Америкийн иргэдэд аз жаргал, хөгжил цэцэглэл хүсье” гэжээ.

Тэрбээр мөн Москва, Вашингтоныг “Орчин үеийн дэлхийн дэг журмыг бүрдүүлэхэд чухал үүрэг гүйцэтгэж буй, цөмийн хоёр том гүрэн” хэмээн онцолсон байна.

Дараа нь Путин болон Трамп утсаар дахин ярилцсан талаар ОХУ-ын Ерөнхийлөгчийн туслах Юрий Ушаков мэдээлжээ. Түүний хэлснээр, хоёр удирдагч НАТО-гийн удахгүй болох дээд хэмжээний уулзалт болон Украин дахь дайныг зогсооход АНУ-ын оролцооны талаар ярилцсан байна.

Мөн ОХУ-ын төрийн мэдээллийн агентлаг ТАСС "Путин Украины байлдааны талбар дахь нөхцөл байдлын талаарх өөрийн байр суурийг Трампад танилцуулсан" гэж мэдээлжээ.

TАСС агентлагийн мэдээлснээр, ОХУ-ын Ерөнхийлөгч Владимир Путин АНУ-ын Ерөнхийлөгч Дональд Трамптай утсаар ярилцсан талаар Оросын удирдагчийн туслах Юрий Ушаков мэдээлжээ.

Түүний хэлснээр, Путин Украин болон түүний Европ дахь дэмжигчдийн фронтын шугам дахь нөхцөл байдлын талаарх буруу ойлголтыг Трампад тайлбарлаж, бодит байдал ямар байгааг дэлгэрэнгүй танилцуулсан байна.

АНУ-ын Ерөнхийлөгч зэвсэгт мөргөлдөөнийг аль болох хурдан зогсоож, хямралыг энхийн замаар шийдвэрлэхэд дэмжлэг үзүүлэхэд бэлэн гэдгээ дахин баталжээ.

Талууд цаашдын харилцааг үргэлжлүүлэх нь чухлыг онцолж, ойрын хугацаанд дахин утсаар ярилцахаар тохиролцсон байна.

“Тусгай цэргийн ажиллагаа”-ны талаарх байр суурь

Путин "Европ болон Киев мөргөлдөөнийг сунжруулах, бүр хурцатгах чиглэл баримталж байгаа бөгөөд үүнд террорист шинжтэй арга ч ашиглаж байна" гэж онцолжээ.

Тэрбээр Украин болон Европын нийслэлүүд нөхцөл байдлыг фронтын бодит шугам дээр буруу үнэлж байгаа бөгөөд Трампад байлдааны талбар дахь бодит байдлыг танилцуулсан гэж мэдэгджээ.

Оросын Ерөнхийлөгч мөн Оросын Зэвсэгт хүчин Донбассын бүс дэх Украины армийн бүх бэхлэгдсэн бүсийг заавал эзлэн авна, Киевийн тал хэчнээн зууралдсан ч ялгаагүй гэж онцолсон байна.

АНУ-ын Ерөнхийлөгч өөрийн зүгээс мөргөлдөөнийг аль болох хурдан зогсоох, хямралыг энхийн замаар шийдвэрлэхэд дэмжлэг үзүүлэхэд бэлэн гэдгээ дахин илэрхийлжээ.

Трамп мөн мөргөлдөөн хурдан дуусвал Орос-Америкийн эдийн засгийн хамтын ажиллагааны боломж нээгдэнэ гэж үзэж буйгаа илэрхийлсэн байна.

Ирантай холбоотой деэскалаци

Путин Ираны хурцадмал байдлыг намжаах, бүс нутгийн тогтвортой байдлыг хангахад Орос улс туслахад бэлэн гэдгээ Трампад дахин баталжээ. Харин Трамп Оросын “тэнцвэртэй байр суурь, бүтээлч санал”-д талархал илэрхийлсэн байна.

Мөн Оросын Ерөнхийлөгч АНУ болон Ираны талууд гол асуудлуудаар харилцан тохиролцож чадна гэдэгт найдаж байгаагаа илэрхийлжээ.

Орос ба АНУ-ын харилцаа

Юрий Ушаковын хэлснээр, энэ удаагийн яриа АНУ-ын санаачилгаар болсон нь онцлог байжээ. Өмнөх яриа (зургадугаар сарын 14-нд) Оросын санаачилгаар болсон юм.

Путин АНУ-ын тусгаар тогтнолын баярын мэндийг Трамп болон Америкийн ард түмэнд хүргэжээ. АНУ-ын Ерөнхийлөгч Санкт-Петербургийн Эрмитаж музейг биширдэгээ илэрхийлсэн байна.

Мөн талууд хөлбөмбөгийн талаар ярилцаж, Путин АНУ-ын Ерөнхийлөгчид тэмцээнийг амжилттай зохион байгуулахыг хүсжээ.

Түүнчлэн Байконурын сансрын буудлаас Орос-Америкийн хамтарсан баг Олон улсын сансрын станц руу хөөрөх гэж буй нь “бэлгэдлийн чанартай” үйл явдал болохыг онцолсон байна.

Утасны яриа 1 цаг 25 минут үргэлжилсэн бөгөөд харилцан ойлголцсон, ажил хэрэгч шинжтэй яриа болсон гэж Ушаков онцолжээ. Талууд хоёр талын болон олон улсын асуудлуудыг нээлттэй ярилцсан байна.

Путин Трампад ОХУ-д ирэх байнгын урилгатай хэвээр байгааг дахин баталжээ.

Хоёр тал цаашдын харилцааг, тэр дундаа цэрэг-улс төр болон эдийн засгийн чиглэлээр үргэлжлүүлэх нь чухал гэдгийг онцолж, ойрын хугацаанд дахин холбогдохоор тохиролцсон байна.

Штайнмайер: Ардчилалд идеал ба бодит байдлын зөрүү үргэлж байдаг

АНУ-ын тусгаар тогтнолын баярын мэндчилгээ дэвшүүлэгчдийн дунд Германы Ерөнхийлөгч Франк-Вальтер Штайнмайер мөн багтжээ.

Deutsche Presse-Agentur агентлагийн мэдээлснээр, тэрбээр АНУ-ын Ерөнхийлөгчид илгээсэн захидалдаа АНУ болон Германыг олон жилийн турш нягт харилцаа холбож ирснийг онцолсон байна.

Тэрбээр “Энэхүү харилцаа нь бидэнд үүрэг хариуцлага ногдуулж, НАТО-гийн холбоотны хүрээнд бидний эв нэгдлийг бэхжүүлдэг” гэж тэмдэглэжээ.

Мөн Штайнмайер ардчилалд “Өндөр идеал ба бодит улс төрийн амьдралын хооронд үргэлж зөрүү байдаг” хэмээн онцолсон байна.

Тэр “Хамгийн чухал нь, бидний сонгож буй улс төрийн чиглэл юм. Манай хоёр улсын олон иргэдийн хувьд Америкийн тусгаар тогтнолын 250 жилийн ой бид зөв замаар явж байна уу гэдгээ өөрөөсөө асуух боломж юм. Үүнд нэг хүн бус, харин эрх чөлөөт, тэгш ард түмэн хариулт өгнө” гэжээ.

Эх сурвалж: DW