Сүүлийн үеийн олон улсын тэмцээнүүдийг үзэж буй волейбол сонирхогчдын анхаарлыг татаж байгаа нэг зүйл бол Японы эрэгтэй волейболын шигшээ баг өмнөх шигээ супер оддоороо буюу бүрэн бүрэлдэхүүнээрээ тоглохгүй, харин харьцангуй залуу болон нөөц бүрэлдэхүүнээ түлхүү ашиглаж байгаа явдал юм.
Өмнө нь дэлхийн шилдэг багуудын нэг болж, Ишикава Юүки, Такахаши Ран, Нишида Юүжи зэрэг тоглогчдоороо хүчээ харуулж байсан Япон энэ удаад өөр өнгө төрхтэй харагдаж байна.
Энэ нь Япон багийн хүч буурсан, эсвэл үндсэн тоглогчид нь шигшээгээс гарсан гэсэн үг биш юм. Харин ч Японы волейболын холбоо урт хугацааны стратегийн хүрээнд тоглогчдын ачааллыг зөв хуваарилах, шинэ үеийн тамирчдыг олон улсын түвшинд бэлтгэх бодлого баримталж байгаа ажээ.
Японы шигшээ багийн гол одод болох Ишикава Юүки, Такахаши Ран, Нишида Юүжи нар сүүлийн хэдэн жил асар их ачаалалтай тоглож ирсэн. Тэд үндэсний шигшээд төдийгүй Европ болон Японы мэргэжлийн лигүүдэд бүтэн улирал өндөр түвшинд өрсөлдөж, олон улсын тэмцээнүүдэд ч тогтмол оролцдог.
Ийм хэмжээний ачааллын дараа тоглогчдыг бүх тоглолтод шууд гаргах нь гэмтэл авах эрсдэлийг нэмэгдүүлдэг учраас багийн удирдлага тэднийг хамгаалж, хамгийн чухал тэмцээнүүдэд оргил формтой байлгахыг зорьж байгаа ажээ.
Мөн Япон улс 2028 оны Лос Анжелесийн олимпын мөчлөгийн бэлтгэлээ хэдийнэ эхлүүлсэн байна. Олимпын дараах үе бол дэлхийн бүх хүчирхэг багуудын хувьд шинэчлэлийн үе байдаг. Энэ үед багууд залуу тоглогчдоо туршиж, ирээдүйн үндсэн бүрэлдэхүүнээ тодорхойлдог уламжлалтай.
Японы хувьд энэ өөрчлөлт бүр ч онцлог. Учир нь, тус улсын волейболын систем зөвхөн 6-7 тоглогч дээр тогтдоггүй болж, үндсэн болон нөөц бүрэлдэхүүний хоорондын ялгаа багассан байна. Өнөөдөр Японы “хоёрдугаар” бүрэлдэхүүнд тоглож буй олон тамирчин өөрсдөө дэлхийн түвшинд өрсөлдөх чадвартай тоглогчид юм.
Өмнө нь Японы тоглолтын гол хүч нь Ишикавагийн довтолгоо, Такахаши Раны хурд, Нишидагийн хүчтэй цохилт дээр ихээхэн тулгуурладаг байсан бол одоо багийн дасгалжуулагчид илүү өргөн бүрэлдэхүүн ашиглахыг зорьж буй юм байна. Ингэснээр нэг тоглогчид хэт их найдахгүй, тоглолтын хэв маягаа олон хувилбартай болгох давуу талтай аж.
Японы энэ бодлого сүүлийн жилүүдэд тус улсын волейболын хөгжлийн томоохон өөрчлөлтийг харуулж байна. Өмнө нь Япон өндөр ур чадвартай боловч биеийн хүчний хувьд зарим багуудаас дутдаг гэж үнэлэгддэг байсан бол одоо хурд, хамгаалалт, тактик, багийн тоглолтоороо дэлхийн шилдэгүүдтэй өрсөлдөх хэмжээнд хүрсэн.
Мөн Японы сэлгээний тоглогчид олон улсын туршлага хуримтлуулах нь дараагийн том тэмцээнүүдэд маш чухал. Учир нь, дэлхийн аварга, олимпын түвшинд нэг үндсэн зургаагаар бүх тэмцээнийг дуусгах боломжгүй болсон. Урт тэмцээнд тоглогчдын форм, гэмтэл, ядаргаа шийдвэрлэх нөлөөтэй байдаг.
Тиймээс одоогийн Японы тоглолтыг “сул бүрэлдэхүүн” гэж харахаас илүү “ирээдүйн аваргын төлөө хийж буй төлөвлөгөөт шинэчлэл” гэж харах нь зөв аж. Япон дэлхийн волейболын тэргүүлэх байр сууриа хадгалахын тулд шинэ үеэ одооноос бэлтгэж, хуучин оддоо зөв цагт хамгийн өндөр түвшинд гаргах стратеги барьж буй юм байна.
Эцэст нь хэлэхэд, Японы өнөөгийн байдал бол дэлхийн шилдэг багуудын нийтлэг замнал юм. Хүчирхэг баг гэдэг зөвхөн од тоглогчдоос бүрддэггүй, харин үндсэн зургааг орлох чадвартай олон тоглогчтой байх явдал билээ. Япон энэ тал дээр дэлхийн хамгийн сайн системүүдийн нэгийг бий болгож чадсан байна.
Эх сурвалж: JVA, KYODO NEWS, JAPAN TIMES
