БНХАУ-ын нийслэл Бээжин хотод дэлхийн алдарт жүжигчин, тулааны урлагийн мастер Жеки Чаны орлон тоглогчийн сургуулийн олон улсын ээлжит сургалт амжилттай болж өндөрлөжээ. Энэ талаар “Хятадын панорама” цахим суваг мэдээлсэн байна.
Жеки Чаны орлон тоглогч бэлтгэх бааз нь дэлхийд хамгийн нэр хүндтэй сургалтын төвүүдийн нэгд тооцогддог бөгөөд эндээс олон жилийн турш кино урлагтай амьдралаа холбосон олон мэргэжилтэн төрөн гарчээ.
Ээлжит олон улсын сургалтад дэлхийн янз бүрийн орны тулаант кино сонирхогч залуус оролцсон байна. Сургалтын хөтөлбөрт Хятадын уламжлалт тулааны урлагийн хэд хэдэн чиглэл багтжээ.
Оролцогчид бацзицюань, тайжи, багуачжан зэрэг тулааны урлагийн төрлүүдтэй танилцаж, кино урлагт ажиллахад шаардлагатай анхан шатны ур чадвар эзэмшсэн байна.
Сургуулиас тулааны урлаг нь зөвхөн бие бялдрыг хөгжүүлэхээс гадна сахилга баттай болох, өөртөө итгэх итгэлийг нэмэгдүүлэх, Хятадын уламжлалт соёлтой танилцах боломж олгодгийг онцолжээ.
Сургалтын төгсгөлд Жеки Чан оролцогчдод хандаж “Ушугаар хичээллэхэд суралцдаг хамгийн чухал зүйл бол соёл, сахилга бат, хүндлэл юм. Эдгээр гурван үгийг үргэлж санаж яваарай. Амьдралын тань туршид дагалдах үнэт зүйлс байх болно” хэмээн хэлжээ.
Эх сурвалж: BIGASIA
