Америкийн технологийн “Apple” компани аравдугаар сарын 28-нд Лос-Анжелес хотноо “Apple Experience in Los Angeles” арга хэмжээ зохион байгуулахаар төлөвлөж, хэвлэл мэдээллийн байгууллагууд болон салбарын шинжээчдэд урилга илгээжээ.
Энэ удаагийн арга хэмжээгээр “Mac” компьютерын шинэ загварууд болон өндөр хүчин чадалтай чипүүдийг танилцуулж магадгүй гэсэн хүлээлт үүсээд байгаа аж.
Урилгад “Pro and tell” гэсэн үг ашигласан нь мэргэжлийн хэрэглээнд зориулсан “Pro” ангиллын бүтээгдэхүүнүүдэд голлон анхаарах боломжтойг илтгэжээ. Гэхдээ компани шинэчлэх бүтээгдэхүүнүүдийнхээ талаар одоогийн байдлаар албан ёсны дэлгэрэнгүй мэдээлэл өгөөгүй байгаа аж.
“Melius Research” компанийн шинжээч Бен Рейтцесийн таамагласнаар, “Apple” энэ намар “Mac” компьютерын шинэ загварууд, тэр дундаа мэдрэгчтэй дэлгэц бүхий зөөврийн компьютер танилцуулж болзошгүй юм байна. Хэрэв ийм бүтээгдэхүүн гарвал мэдрэгчтэй дэлгэцийн хэрэглээний талаарх компанийн өмнөх байр сууринд томоохон өөрчлөлт гарах нь.
“Apple” компани энэ оны наймдугаар сард “Mac mini”, “Mac Studio” суурин компьютеруудынхаа чипийг шинэчилж, “MacBook Neo” хэмээх харьцангуй хямд үнэтэй зөөврийн компьютероо танилцуулсан. Харин “iMac” суурин компьютерын шинэчлэл болон “MacBook Pro”-ийн дараагийн загваруудын талаар хэрэглэгчид хүлээлттэй байгаа аж.
“Bloomberg”-ийн сэтгүүлч Марк Гурманы мэдээлснээр, шинэчлэгдсэн “MacBook Pro” болон OLED дэлгэцтэй “iPad mini” загваруудыг танилцуулах боломжтой юм байна. Түүнчлэн “M6” чиптэй “iMac”, 14 инчийн “MacBook” загваруудын талаар таамаг дэвшүүлжээ. Гэхдээ эдгээр бүтээгдэхүүний нэр, үзүүлэлт, худалдаанд гарах хугацааг “Apple” одоогийн байдлаар албан ёсоор батлаагүй байгаа аж.
Шинэ үеийн чипүүд нь их хэмжээний санах ойг өндөр хурдтай ашиглах боломж олгодгоороо хиймэл оюуны загвар ажиллуулахад давуу талтай. Үүнтэй холбоотойгоор “Mac” компьютерууд компанийн хиймэл оюуны технологийн хөгжүүлэлтэд чухал байр суурь эзлэх болжээ.
Мөн “Apple” болон “Meta” компаниуд “Meta”-гийн боловсруулсан нээлттэй жинтэй хиймэл оюуны загварыг өндөр хүчин чадалтай “Mac Studio” компьютерууд дээр ажиллуулсан талаар мэдээлсэн байна.
“Apple” компани өмнө нь мэдрэгчтэй дэлгэцтэй зөөврийн компьютерын загварыг нэвтрүүлэхээс татгалзаж ирсэн. Тус компанийн программ хангамжийн асуудал хариуцсан удирдах ажилтан Крейг Федериги 2018 онд ийм төрлийн төхөөрөмжийг удаан хугацаанд ашиглахад гар, биеийн байрлалын хувьд тав тухгүй байж болзошгүй талаар тайлбарлаж байв.
Хэрэв мэдрэгчтэй дэлгэцтэй “MacBook Pro” шинэ загвар танилцуулагдвал энэ нь “Apple”-ийн компьютерын бүтээгдэхүүний хөгжүүлэлтэд гарч буй томоохон өөрчлөлтүүдийн нэг болох аж. Харин шинэ бүтээгдэхүүнүүдийн талаарх эцсийн мэдээлэл аравдугаар сарын 28-ны арга хэмжээний үеэр тодорхой болох төлөвтэй юм байна.
Эх сурвалж: CNBC, BLOOMBERG, 9to5Mac
