Украин ОХУ-ын газрын тос боловсруулах үйлдвэрүүдэд цохилт өгсөөр байгаа нь Орост учруулж буй хохирлоосоо илүүтэйгээр Киев, АНУ-ын Ерөнхийлөгч Дональд Трамп нарын харилцаанд сөргөөр нөлөөлж байна гэж Цагаан ордны албаныхны анхааруулсан мэдээлэлд үндэслэн Axios агентлаг бичжээ.
“Трамп маш их уурлаж байгаа бөгөөд Украины Ерөнхийлөгч Владимир Зеленский АНУ-ын үзүүлж буй дэмжлэгийг байх л ёстой зүйл мэтээр хүлээн авч байна гэж үзэж байгаа” хэмээн АНУ-ын нэгэн албан тушаалтны үгийг тус хэвлэл аравдугаар сарын 12-ны даваа гарагт эш татсан байна.
Трамп Зеленскийг өөрийн зарласан “эрчим хүчний түр эвлэрэл”-ийн нөхцөлийг биелүүлнэ гэж найдаж байгаа аж. Орос улс Украины эсрэг бүрэн хэмжээний дайнаа үргэлжлүүлж байгаа нөхцөлд хоёр тал эрчим хүчний байгууламжид халдахгүй байх тохиролцоог мөрдөх ёстой гэж тэр үзэж байгаа аж.
Axios агентлагт ярилцлага өгсөн эх сурвалжийн мэдээлснээр, хэрэв Украин Оросын газрын тос боловсруулах үйлдвэрүүдэд хийх цохилтоо зогсоовол дараагийн алхам нь цахилгаан станц болон эрчим хүчний сүлжээнд халдахгүй байх тохиролцоо байж болох юм.
Киев: Газрын тос боловсруулах үйлдвэрүүдэд цохилт өгөхөө зогсоох нь зөвхөн Москвад ашигтай
Харин Украины Засгийн газрын төлөөлөгч Axios агентлагт мэдэгдэхдээ, газрын тос боловсруулах үйлдвэрүүдэд хийх цохилтоо зогсоох тухай Трампын шаардлага зөвхөн Орост ашигтай гэжээ. Түүний тайлбарласнаар, Украинд газрын тос боловсруулах ганцхан үйлдвэр байдаг бөгөөд тэр нь ч бүрэн хүчин чадлаараа ажилладаггүй. Харин Орос улс ийм төрлийн асар олон үйлдвэртэй.
“Бид дизель түлш, бензинээ импортоор авдаг. Харин оросууд манай цахилгаан эрчим хүчний сүлжээнд халдахаа зогсоох шаардлагатай байна” хэмээн Украины албан тушаалтан мэдэгджээ. Үүний зэрэгцээ Орос улс одоогоор ямар ч хэлбэрийн түр эвлэрэлд зөвшөөрөөгүй байна. Трамп мэдэгдэл хийснээс хэдхэн цагийн дараа Оросын тал Украины цахилгаан станцуудад цохилт өгчээ.
Трамп Орос, Украины хооронд эрчим хүчний шинэ түр эвлэрэл зарлав
АНУ-ын Ерөнхийлөгч Дональд Трамп аравдугаар сарын 11-нд Орос, Украин хоёр эрчим хүчний салбарт түр эвлэрэхээр тохиролцсон гэж мэдэгдсэн байна.
Тэрбээр өөрийн Truth Social нийгмийн сүлжээнд “Энэ мөчөөс эхлэн Орос, Украины хоорондын дайнд эрчим хүчний салбарт түр эвлэрэл хэрэгжинэ. Хоёр тал хоёулаа үүнийг зөвшөөрсөн. Үүнийг зөрчиж болохгүй!” хэмээн бичжээ.
Эрчим хүчний дэд бүтцэд харилцан цохилт өгөхөө зогсоохыг өмнө нь олон удаа шаардаж байсан Зеленский Axios агентлагийн сэтгүүлчид эхэндээ ярилцлага өгөхдөө, хэсэгчилсэн түр эвлэрэл байгуулсан талаар өөрт нь ямар ч мэдээлэл байгаагүй гэж мэдэгджээ. Гэсэн хэдий ч Орос улс зөвшөөрсөн тохиолдолд уг тохиролцоог дэмжихээ илэрхийлсэн байна.
Хожим нь тэрбээр Украины эрх баригчид “АНУ-ын талаас дэлгэрэнгүй мэдээлэл хүлээж байгаа” бөгөөд “Украинд тусалж чадах түншүүдийнхээ бүх алхмыг” дэмжиж байгаагаа мэдэгджээ.
Financial Times сонины мэдээлснээр, Трампын засаг захиргаа Украиныг Оросын газрын тос боловсруулах үйлдвэрүүдэд хийх цохилтоо зогсооход хүргэхийн тулд Киевт зэвсэг нийлүүлэх PURL хөтөлбөрийг хаах аюул заналхийлэл үзүүлж байгаа аж.
“Тэд Киев рүү залгаж байна... Европын бүх тал руу ч залгаж байна” хэмээн АНУ-ын Батлан хамгаалах яамны төлөөлөгчөөс ийм утгатай дуудлага хүлээн авсан нэгэн албан тушаалтан мэдэгджээ.
Эх сурвалж: DW
