Монгол Улсын арслан Ренчинбямбын Пүрэвдагва Иордан улсын Амман хотноо зохион байгуулагдаж буй чөлөөт бөхийн мастеруудын дэлхийн аварга шалгаруулах тэмцээний А насны ангиллын 130 кг-ын жинд алтан медаль хүртэж, дэлхийн аварга боллоо.

Тэрбээр дөрвөн барилдаанд дараалан ялалт байгуулж, аваргын төлөөх шийдвэрлэх барилдаанд Ираны бөхийг буулган авснаар Монгол Улсынхаа төрийн дууллыг дэлхийн дэвжээнд эгшиглүүлэв. 🇲🇳

Архангай аймгийн Эрдэнэбулган сумын харьяат, “Бөх билэгт” дэвжээний бөх Р.Пүрэвдагва эхний тойрогт Туркийн Ж.Есилийг 10:0, хоёрдугаар тойрогт Английн А.Лакыг 11:0, гуравдугаар тойрогт ОХУ-ын А.Саламовыг 12:1-ээр тус тус илт давуу ялжээ. Харин аваргын төлөөх барилдаанд Ираны Г.Хагшинастай хүч үзэж, 3:2-ын харьцаагаар ялснаар алтан медалийн эзэн болсон байна.

Үндэсний бөхийн дэвжээнд хүч бяр, уран мэхээрээ танигдсан улсын арслан ийнхүү чөлөөт бөхийн олон улсын дэвжээнд ур чадвар, тэсвэр хатуужлаа батлан харууллаа. Үндэсний бөхөөр гаргасан амжилтаараа хязгаарлагдахгүй, өөр төрлийн барилдаанд өөрийгөө сорьж, дэлхийн аваргын алтан медаль хүртсэн нь түүний спортын замналын онцлох амжилт болж байна.

Р.Пүрэвдагва 2016 онд Монгол Улсын төрийн их баяр наадамд ес даван түрүүлж, улсын арслан цол хүртсэн хүчтэн юм. Мөн “Хүрээ цам — Даншиг наадам”-д дөрвөн удаа түрүүлсэн цор ганц амжилтын эзэн билээ.

Энэ удаагийн дэлхийн аваргын тэмцээнд Монголын бөхчүүдээс Т.Чулуунгэрэл А насны 100 кг-ын жинд, Г.Гантулга Е насны 130 кг-ын жинд тус тус хүрэл медаль хүртжээ.

Монголын тамирчид мастеруудын дэлхийн аваргаас ийн алт, хүрэл медаль хүртэж, эх орныхоо нэрийг дэлхийн дэвжээнд өргөлөө.

Улсын арслан Р.Пүрэвдагва болон медаль хүртсэн нийт тамирчдадаа халуун баяр хүргэе! Монгол бөхийн хийморь, монгол тамирчдын амжилт дэлхийн дэвжээнд улам бадран мандах болтугай! 🇲🇳🏆