АНУ-ын Холбооны мөрдөх товчоо (FBI) ням гарагт Калифорни мужийн 34 настай эмэгтэйг Хятадын бүртгэлгүй гадаадын төлөөлөгчөөр ажилласан, мөн Тайванийн Ерөнхийлөгч Лай Чинтэгийн хүү болон түүний гэр бүлийг тандаж байсан гэх хэргээр баривчилжээ.
Ирвайн хотын оршин суугч Ванин “Хизер” Жан 2025 онд Сиэтл хотод очиж, Тайванийн төрийн өндөр албан тушаалтны ойрын хамаатныг тандаж байсан гэж холбооны шүүхэд гаргасан гомдолдоо дурдсан байна.
Холбооны мөрдөн байцаагчдын мэдээлснээр, Жан Хятадын албаныхны зааврын дагуу тухайн хүний талаар мэдээлэл цуглуулж, гэр болон автомашиныг нь зураг авах үүрэг хүлээсэн байна. FBI-ийн мэдээлснээр, түүний тандаж байсан хүн Тайванийн Ерөнхийлөгч Лай Чинтэгийн хүү Лай Тин-юй байсан аж.
Сиэтлд хийсэн тандалт
Жан 2025 оны есдүгээр сарын 1-нд “Individual 1” хэмээн нэрлэгдсэн нэгэнтэй хамт Лас Вегасаас Сиэтл рүү нисжээ. Тэд хар өнгийн SUV автомашин түрээслэн, Лай Тин-юйгийн гэр бүлийн амьдардаг байшингийн ойролцоо очсон байна.
Хөршийн хяналтын камерын бичлэгт Жан болон хамт явсан хүн нь байшингийн гадна автомашин дотор хүлээж буй нь бичигджээ. Лай болон түүний гэр бүл гэртээ ирэх үед тэд утсаа гарган зураг, бичлэг хийсэн гэж мөрдөн байцаагчид үзэж байгаа аж.
Мөн мөрдөн байцаагчдын мэдээлснээр, Жан Хятадын албаныхантай WeChat-аар харилцаж, тэдэнд зураг, видео болон автомашины улсын дугаарын мэдээлэл илгээжээ. Эдгээр харилцааг түүний iCloud хаягт хийсэн нэгжлэгийн үеэр олж авсан гэж холбооны гомдолд дурдсан байна.
Хятадын албаныхны даалгавар байсан гэж үзэж байна
Мөрдөн байцаагчдын үзэж буйгаар, Жан 2025 оны зургадугаар сард Бээжин дэх Олон улсын харилцааны их сургуультай холбоотой нэгэн танилынхаа тусламжтайгаар Хятадын албан тушаалтантай холбогджээ. Тус сургууль Хятадын Төрийн аюулгүй байдлын яамтай ойр холбоотой гэж мөрдөн байцаагч тайлбарласан байна.
Жан тухайн оны зургадугаар сард Хятадын Чанша хотод очиж, уг албан тушаалтантай уулзсан бөгөөд тэндээс тандалт хийх даалгавар авсан гэж үзэж байгаа аж. Дараа нь тэрбээр Сиэтл рүү явах төлөвлөгөөгөө Хятадын талын холбогдох хүнд мэдэгдсэн байна.
Холбооны прокурор Билл Эссайлигийн хэлснээр, Жан гадаадын засгийн газрын төлөө ажиллаж байгаагаа АНУ-ын Ерөнхий прокурорт бүртгүүлээгүй нь холбооны хууль зөрчсөн үйлдэл аж. Тэрбээр мөн хамтрагчтайгаа аяллаа зохион байгуулж, мөрдөгчдөд илрэхээс зайлсхийх арга ашигласан гэж прокурор мэдэгджээ.
Лос-Анжелесийн нисэх буудал дээрээс баривчилжээ
Жаныг 2026 оны аравдугаар сарын 4-нд Лос-Анжелесийн олон улсын нисэх онгоцны буудалд Хятад руу нисэх гэж байхад нь баривчилсан байна. Түүнийг Хятадын бүртгэлгүй гадаадын төлөөлөгчөөр ажилласан гэх холбооны хэрэгт буруутгажээ.
Тэрбээр даваа гарагт Лос-Анжелесийн холбооны шүүхэд анхны мэдүүлгээ өгөхөөр болсон байна. Одоогийн байдлаар Жан өмгөөлөгчтэй эсэх нь тодорхойгүй байгаа аж.
Энэ хэрэг ямар учиртай вэ?
Холбооны мөрдөн байцаагчдын үзэж буйгаар, Тайванийн өндөр албан тушаалтны гэр бүлийн гишүүдийн байршил, гэр орон, автомашины талаарх мэдээлэл нь Хятадын талд тагнуулын ач холбогдолтой байж болох аж. Ялангуяа ирээдүйд Хятад, Тайванийн хооронд мөргөлдөөн үүсвэл ийм мэдээллийг Тайванийн Ерөнхийлөгчид нөлөөлөх зорилгоор ашиглах боломжтой гэж мөрдөн байцаагчид үзжээ.
Хятад улс Тайванийг өөрийн нутаг дэвсгэрийн нэг хэсэг гэж үздэг бол Тайвань өөрийгөө өөрөө удирддаг ардчилсан улс хэмээн үздэг. Тайванийн тусгаар байдлыг дэмждэг байр суурь нь Бээжингийн хүчтэй эсэргүүцэлтэй тулгарсаар ирсэн бөгөөд энэ асуудал АНУ, Хятадын харилцааны хамгийн эмзэг сэдвүүдийн нэг хэвээр буй аж.
Эх сурвалж: CNN
