Майкл Жордан (Michael Jordan)-ы карьерын хамгийн алдартай улирлуудын нэгэнд өмсөж байсан өмсгөл мягмар гарагт дуудлага худалдаагаар 12.26 сая ам.доллароор зарагдаж, түүхэн дэх хамгийн өндөр үнээр зарагдсан сагсан бөмбөгийн өмсгөл болжээ.

Жорданы алдарт “23” дугаартай цагаан торон өмсгөлийг тэрээр 1998 оны NBA-гийн финалын 3 дахь тоглолтын үеэр өмсөж байжээ. Энэ нь түүний Chicago Bulls-тэй өнгөрүүлсэн сүүлчийн улирал байсан бөгөөд тухайн үеийг “The Last Dance” (“Сүүлчийн бүжиг”) хэмээн нэрлэдэг. Энэ түүхийг 2020 онд ESPN болон Netflix хамтран ижил нэртэй баримтат цувралаар өгүүлжээ.

Utah Jazz-ийн эсрэг болсон шийдвэрлэх тоглолтод Жордан гайхалтай тоглолт үзүүлж, цувралд Chicago Bulls давуу байдал олж авахад чухал үүрэг гүйцэтгэжээ. Улмаар Жордан багаа найман улирлын хугацаанд зургаа дахь удаагаа аваргын цом хүртэхэд хөтөлсөн байна.

Дуудлага худалдааг зохион байгуулсан Joopiter-ийн мэдээлснээр, 1998 оны финалын үеэр өмссөн, ялалт байгуулсан тоглолтын цагаан өмсгөлөөс олон нийтэд дуудлага худалдаагаар худалдаалагдсан цорын ганц мэдэгдэж буй хувилбар нь энэ ажээ. Тиймээс спортын ховор цуглуулгын нэгэнд тооцогдож байна.

Ингэснээр уг өмсгөл 2022 онд 10.1 сая ам.доллароор зарагдсан, мөн 1998 оны финалын эхний тоглолтын үеэр Жорданы өмсөж байсан улаан өмсгөлийн тогтоосон өмнөх рекордыг шинэчилжээ.

Мөн 2021 онд Жорданы Хойд Каролинагийн их сургуулийн хоёрдугаар дамжааны үедээ өмсөж байсан өмсгөл 1.38 сая ам.доллароор зарагдаж, тухайн үедээ дуудлага худалдааны рекорд тогтоож байсан байна.

Харин спортын түүхэн дэх хамгийн өндөр үнээр зарагдсан цуглуулгын эд зүйл нь бейсболын домогт тоглогч Бэйб Рутийн 1932 оны Дэлхийн цувралын 3 дахь тоглолтод өмссөн өмсгөл бөгөөд 2024 онд 24.12 сая ам.доллароор зарагджээ.

Эх сурвалж: CNN