ОХУ-ын Батлан хамгаалахын орлогч сайд Василий Осьмаков Монгол Улсад хийж буй ажлын айлчлалынхаа хүрээнд Монголын Батлан хамгаалахын дэд сайд, хошууч генерал Д.Баасандамбатай уулзаж, хоёр улсын батлан хамгаалах салбарын хамтын ажиллагааны өнөөгийн байдал болон цаашдын чиглэлийн талаар санал солилцжээ.
Айлчлалын үеэр 2027-2031 онд Монгол, Оросын цэргийн салбар дахь стратегийн түншлэлийг хөгжүүлэх хөтөлбөрт гарын үсэг зурсан байна. Монголын Батлан хамгаалах яам уг хөтөлбөрийг хоёр улсын батлан хамгаалах салбарын хамтын ажиллагааг цаашид хөгжүүлэх чухал алхам гэж мэдээлжээ.
Уулзалтын үеэр талууд цэргийн боловсрол, боловсон хүчний бэлтгэл, цэрэг-техникийн хамтын ажиллагаа, эрдэм шинжилгээ, судалгаа болон харилцан сонирхсон бусад чиглэлээр хамтын ажиллагааг үргэлжлүүлэн өргөжүүлэх боломжийн талаар хэлэлцсэн байна.
Энэ онд Монгол, Оросын зэвсэгт хүчин “Сэлэнгэ-2026” хамтарсан хээрийн сургууль зохион байгуулсан бөгөөд Монголын Батлан хамгаалах яамны мэдээллээр, уг сургалтад хоёр улсын 800 гаруй цэргийн алба хаагч, 100 орчим нисэх онгоц, нисдэг тэрэг болон бусад зэвсэг, техник оролцжээ.
Монгол, Орос хоёр улс дипломат харилцаа тогтоосны 105 жилийн ой тохиож буй энэ үед шинэ хөтөлбөрт гарын үсэг зурсан нь хоёр улсын батлан хамгаалах харилцааны дараагийн таван жилийн хүрээнд хэрэгжүүлэх хамтын ажиллагааны чиглэлийг тодорхой болгов.
Эх сурвалж: TASS
