Өмнөд Солонгосын хоёр Мишелин одтой рестораны эзэн шоргоолжоор чимэглэсэн сорбет амттантай холбоотой олны анхаарлыг татсан хэргийн улмаас шоронд хоригдохоос мултарчээ.

Есдүгээр сарын 16-нд Сөүлийн Баруун дүүргийн шүүх рестораны эзэнд 15 сая вон буюу ойролцоогоор 11 мянган ам.долларын торгууль ногдуулсан байна. Эзний нэрийг зөвхөн Ким овогтой эмэгтэй гэж мэдээлсэн бөгөөд рестораны нэрийг олон нийтэд зарлаагүй, тус рестораны тогоочийг ямар нэгэн зөрчил гаргасан гэж буруутгаагүй ажээ.

Прокурорууд рестораны эзэнд нэг жилийн хорих ял, мөн 20 сая воны буюу ойролцоогоор 13,580 ам.долларын торгууль оноох саналтай байжээ. Тэдний тооцоолсноор, ресторан сүүлийн дөрвөн жилийн хугацаанд энэ бүтээгдэхүүнээс 120 сая вон буюу 81,470 орчим ам.долларын ашиг олсон байна.

Өмнөд Солонгосын хүнсний бүтээгдэхүүний талаарх нарийн зохицуулалттай хуулиар ямар төрлийн шавжийг хүний хоол хүнсэнд ашиглаж болохыг тодорхой заадаг ажээ.

Прокурорын байгууллага долдугаар сард CNN-д "Тухайн ресторан 2021 оноос хойш АНУ болон Тайландаас оруулж ирсэн хатаасан шоргоолжийг хоолондоо ашиглаж байсан" гэж мэдээлсэн байна. Тэдний мэдээлснээр, ресторан нийтдээ 12,200 порц сорбет амттанд ойролцоогоор 49,000 шоргоолж ашиглажээ.

Гэхдээ засгийн газрын мэдээлснээр, асуудал нь хоолонд шоргоолж байсан төдий зүйл биш байжээ.

Өмнөд Солонгосын Хүнс, эмийн аюулгүй байдлын яамны мэдээлснээр, мөрдөн шалгах явцад тус рестораны ашиглаж байсан шоргоолжноос бусад хүнсэнд хэрэглэхийг зөвшөөрсөн шавжид тогтоосон дээд хэмжээнээс 55 дахин их хүнд металл илэрсэн байна.

Шүүхийн шийдвэр гаргахдаа шүүгч рестораны зарж байсан шоргоолжноос зөвшөөрөгдөх хэмжээнээс давсан хүнд металл илэрсэн тул эрүүл мэндэд эрсдэл учруулах боломжтой байсныг онцолжээ.

Гэхдээ ял шийтгэлийг тогтоохдоо прокуроруудын тооцоолсон хэмжээнээс ашигласан шоргоолжны тоо хэмжээ бага байсан бололтой. Мөн Ким өмнө нь ямар нэгэн эрүүгийн гэмт хэрэгт холбогдож байгаагүй зэргийг харгалзан үзсэн байна.

Өмнөд Солонгост бүх шавжийг хоолонд хэрэглэхийг зөвшөөрдөггүй

Өмнөд Солонгос болон бусад оронд шавжийг бусад амьтны гаралтай бүтээгдэхүүнтэй адил уургийн найдвартай эх үүсвэр гэж үзэх хандлага нэмэгджээ.

Шавжийг уламжлалт мал аж ахуйтай харьцуулахад бага хэмжээний нөөцөөр өсгөж, олноор үржүүлэх боломжтой учраас уур амьсгалын өөрчлөлттэй тэмцэхэд үр дүнтэй хүнсний эх үүсвэр байж болно гэж дэмжигчид үздэг байна.

Өмнөд Солонгосын хоолны соёлд шавж хэрэглэхийг ерөнхийд нь цээрлэдэггүй. Тухайлбал, пондеги (beondegi) буюу уураар болгосон хүр хорхойн авгалдай нь гудамжны худалдаачдын цаасан аягаар зардаг уламжлалт зууш аж.

Гэхдээ тус улсын Хүнсний ариун цэврийн тухай хуулиар царцаа, хүр хорхойн авгалдай зэрэг ердөө 10 төрлийн шавжийг хүний хүнсэнд хэрэглэхийг зөвшөөрдөг байна. Харин шоргоолж зэрэг бусад шавжийг хоолонд хэрэглэхийн тулд эрх бүхий байгууллагаас тусгай зөвшөөрөл авах шаардлагатай аж.

Рестораныг төлөөлж буй өмгөөлөгчдийн хэлснээр, тогооч шоргоолжийг тухайн хоолонд исгэлэн амт оруулахын тулд ашигласан бөгөөд АНУ болон Европт өмнө нь хэрэглэж байсан жор нь Өмнөд Солонгост хууль ёсоор хориглогдсон талаар мэдээгүй байжээ.

Мөн ресторан шоргоолжтой хоолоор нийт үйлчлүүлэгчдийн ойролцоогоор 60 хувьд нь л үйлчилдэг байсан бөгөөд шоргоолжийг тухайн хоолны орц гэдгийг цэсэн дээр тодорхой бичсэн байсан гэж мэдэгдсэн байна.

Дэлхийд шавж хүнсэнд хэрэглэх хандлага нэмэгдэж байна

НҮБ-ын Хүнс, хөдөө аж ахуйн байгууллагын 2013 оны тайланд дурдсанаар, дэлхий даяар дор хаяж 2 тэрбум хүн шавжийг өдөр тутам хүнсэндээ хэрэглэдэг байна.

FAO-гийн мэдээлснээр, дэлхийд хамгийн түгээмэл хэрэглэдэг шавжид шоргоолж, цох, зөгий, хүр хорхой, царцаа, соно, ялаа, дэвхрэг, царцаа төрлийн шавж, бясаа, царцаан сүрэг, бамбайт шавж, термит болон хэдгэнэ зэрэг багтдаг аж.

Сүүлийн жилүүдэд энэ чиг хандлага Европ болон АНУ-д ч нэмэгдэж буй юм байна. Global Market Insights-ийн өмнөх тайландаа "АНУ-ын хүнсэнд хэрэглэх шавжны зах зээл 2024 он гэхэд бараг 80 сая ам.долларт хүрч өснө" гэж тооцоолж байжээ.

Шавжийг хүнсэнд хэрэглэхийг идэвхтэй сурталчилдаг хүмүүсийн нэг нь Нью-Йорк хотод ажилладаг тогооч Жозеф Юн аж. Шавжны талаарх хүмүүсийн ойлголтыг өөрчлөх зорилготой Brooklyn Bugs байгууллагын гүйцэтгэх захирлаар ажилладаг тэрбээр зочин тогоочийн хувиар тарантулын темпура, царцаатай карамельтай попкорн зэрэг хоол хийж байжээ.

Копенхагенд байрладаг Alchemist ресторан мөн хоёр Мишелин одтой бөгөөд одоогийн байдлаар дэлхийн шилдэг 50 рестораны жагсаалтад 5-р байрт бичигдэж буй аж. Тус ресторан эрдэмтэдтэй хамтран амьд болон хөлдөөсөн шоргоолж ашиглан сүүн бүтээгдэхүүн исгэх туршилт хийжээ.

Үүний үр дүнд “ant-wich” хэмээх олны сонирхлыг татсан амттан бий болсон аж. Энэ нь шоргоолжны хэлбэртэй жигнэмэгний завсар хийсэн зайрмаг, шоргоолжоор амталсан гель бүхий амттан юм байна.

Эх сурвалж: CNN