АНУ-ын Төлөөлөгчдийн танхим ОХУ-ын эсрэг хатуу хориг арга хэмжээ авах тухай хуулийн төслийг ирэх долоо хоногт хэлэлцэж, санал хураахаар төлөвлөжээ. Энэ талаар есдүгээр сарын 11-нд Bloomberg агентлаг эх сурвалжийн мэдээллээс иш татан уламжилсан байна.
Уг хуулийн төслийг Өмнөд Каролина мужийн сенатор Линдси Грэм санаачилсан бөгөөд АНУ-ын Сенат өнгөрсөн наймдугаар сарын эхээр дэмжжээ. Грэм энэ оны долдугаар сард нас барсан бөгөөд уг санаачилгыг хэрэгжүүлэхийн төлөө жил гаруйн турш ажилласан байна.
Хуулийн төслийг Бүгд найрамдахчууд намын их хурлаас буцаж ирсний дараа Төлөөлөгчдийн танхимд хэлэлцэхээр төлөвлөжээ. Төслийг батлахад энгийн олонхийн санал шаардлагатай аж.
Хэрэв Конгресс баталвал Ерөнхийлөгч Дональд Трамп ОХУ-ын нефть, байгалийн хийн хамгийн том таван худалдан авагч болон Оросын эрчим хүчний салбарын эсрэг хоригийг тойрон гарахад тусалж буй таван улсад 100 хүртэл хувийн гаалийн татвар ногдуулах эрхтэй болох юм байна.
Төлөөлөгчдийн танхимын Дүрэм журмын хороо есдүгээр сарын 14-ний даваа гаргийн үдээс хойш уг хуулийн төслийг хэлэлцэхээр товложээ. Reuters агентлагийн мэдээлснээр, тус хороо төслийг дэмжвэл мөн долоо хоногт Төлөөлөгчдийн танхимын нийт гишүүдээр санал хураалгах аж. Улмаар дэмжигдсэн тохиолдолд Ерөнхийлөгчийн гарын үсэгт шилжүүлнэ. Трамп өмнө нь уг санаачилгыг дэмжиж буйгаа илэрхийлжээ.
АНУ-ын Ерөнхийлөгчийн засаг захиргаа уг хуулийг батлуулах нь Трампад ОХУ-д шахалт үзүүлэх нэмэлт хөшүүрэг бий болгоно гэж үзэж буй аж. Энэ нь БНХАУ-ын дарга Ши Жиньпиний есдүгээр сарын 24-нд АНУ-д хийхээр төлөвлөж буй айлчлалын өмнө чухал ач холбогдолтой гэж үзжээ.
Сенатын 86 гишүүн дэмжжээ
ОХУ-ын эсрэг “тамын” хориг хэмээн нэрлэгдэж буй хуулийн төслийг АНУ-ын Сенат долдугаар сарын 28-наас хэлэлцэж эхэлсэн. Наймдугаар сарын 7-нд болсон санал хураалтаар 100 сенаторын 86 нь дэмжиж, 11 нь эсэргүүцсэн байна. Үүний дараа хуулийн төслийн талаарх хэлэлцүүлэг болон нэмэлт өөрчлөлтүүдийг авч үзэх боломж бүрджээ.
Есдүгээр сарын эхээр Төлөөлөгчдийн танхим дахь Ардчилсан намын гишүүд төдийгүй зарим Бүгд найрамдахчууд уг хуулийн төсөлд болгоомжтой хандаж буй нь ил болсон байна. Тэд Трампын гаалийн татвар тогтоох эрхийг ийнхүү өргөжүүлэх нь нефтийн үнэ өсөх, улмаар АНУ-ын худалдааны түншүүдэд сөргөөр нөлөөлөх эрсдэлтэй гэж үзэж байгаа аж.
Мөн ExxonMobil, General Electric, Ford, Pfizer зэрэг томоохон компаниуд уг хуулийн төслийг шүүмжилж, АНУ-ын Худалдааны танхим ч эсэргүүцлээ илэрхийлжээ. Бизнесийн салбарын төлөөлөгчид Конгресст илгээсэн захидалдаа шинэ гаалийн татвар нь эцсийн хэрэглэгчдэд нэмэлт дарамт учруулж болзошгүй гэж болгоомжилж буйгаа илэрхийлсэн байна.
Эх сурвалж: DW
