ОХУ-ын Ерөнхийлөгч Владимир Путин БРИКС-ийн бизнес форумын хуралдаанд үг хэлжээ.
В.Путин:
Эрхэм хүндэт найз нөхөд өө!
Эрхэм хүндэт Ерөнхий сайд Нарендра Моди!
Эрхэм хүндэт хамтран зүтгэгчид, төрийн тэргүүнүүд, энд хүрэлцэн ирсэн найз нөхөд, манай улсуудын бизнесийн салбарын төлөөлөгчид өө!
Өнөөдрийн энэхүү арга хэмжээ уламжлал ёсоор БРИКС-ийн дээд хэмжээний уулзалтын өмнө болж байна. Оролцогчдын өргөн, төлөөлөл сайтай бүрэлдэхүүн нь манай нэгдлийн хүрээнд бизнесийн харилцаа, хамтын ажиллагааг бэхжүүлэх сонирхол өсөн нэмэгдэж байгааг харуулж байна.
Бат бөх эдийн засгийн түншлэл, найдвартай бизнесийн харилцаа нь олон улсын харилцааны суурийг ихээхэн хэмжээгээр бүрдүүлж, дэлхий нийтийн харилцааг илүү тогтвортой, найдвартай болгож, өнөөгийн дэлхий дахинд тулгарч буй хямралт үзэгдлүүдийг даван туулах боломж олгодог.
Өнөөдөр дэлхий ертөнц бүтцийн гүнзгий өөрчлөлтийн үеийг туулж байна. Өнгөрсөн зууны хоёрдугаар хагаст эдийн засгийн өсөлтийн тэргүүн эгнээнд явж байсан, нөхцөлтөөр хэлбэл “хуучин тэргүүлэгчид”-ийн байр суурийг хөгжлийн шинэ хөдөлгөгч хүчнүүд аажмаар эзэлж байна.
Мэдээж, би “хуучин” гэж хэлж байгаа нь нөхцөлт ойлголт. Бид бүгд юуны тухай ярьж байгааг ойлгож байгаа. Эдгээр гэж нэрлэгддэг “хуучин тэргүүлэгчид” өнөөдөр ч асар их давуу талтай. Тэд өндөр хөгжсөн дэд бүтэц, технологийн давуу байдал, шинжлэх ухааны хүчирхэг сургуулиудтай гэх мэт олон боломжийг эзэмшиж байна.
Гэхдээ байгальд ч, хүний нийгэмд ч, эдийн засагт ч өөрчлөлт ямагт явагддаг. Дэлхий байнга өөрчлөгдөж байдаг. Үүнийг бодит статистик ч харуулж байна.
Тухайлбал, сүүлийн таван жилийн хугацаанд дэлхийн ДНБ-ий 40 гаруй хувийг БРИКС-ийн орнууд үйлдвэрлэв. Харин “Их долоо”-гийн орнуудын эзлэх хувь ердөө 29 хувь байжээ. “Их долоо” яагаад “их” гэж нэрлэгддэгийг би сайн ойлгодоггүй ч ийм байна.
Дэлхийн эдийн засгийн өсөлтийг мөн хугацаагаар авч үзвэл, өсөлтийн бараг тал хувийг манай нэгдлийн орнууд хангажээ. Харин “Их долоо”-гийн эзлэх хувь ердөө 18 хувь байна.
Ийм өөрчлөлт юутай холбоотой вэ? Үнэндээ хариулт нь энгийн. Дэлхийн хүн амын бараг тал хувь нь амьдардаг БРИКС-ийн орнууд асар том, эрчимтэй хөгжиж буй дотоодын зах зээлтэй. Манай улс орнуудад хотууд хурдацтай хөгжиж, хотжилт эрчимтэй явагдаж байна. Үүний зэрэгцээ үндэсний компаниуд дэлхийн хэмжээний тоглогчид гэдгээ улам бүр тодорхой харуулж байна.
Тухайлбал, Энэтхэгийн Tech Mahindra компани хиймэл оюун ухаанд суурилсан платформын шийдлүүд зэрэг үр ашигтай дижитал технологийн шийдлүүдийг санал болгож байна. Хятадын Huawei дэлхийн хэмжээний технологийн аварга компани болсон.
Бразилийн Embraer агаарын болон сансрын үйлдвэрлэлийн салбарт баттай байр суурь эзэлж байна. Арабын Нэгдсэн Эмират Улсын DP World логистикийн салбарт үр ашигтай үйл ажиллагаа явуулж байгаа бол Оросын Росатом энхийн зорилгоор ашиглах цөмийн эрчим хүчний салбарт дэлхийд тэргүүлэгч байр суурийг эзэлж байна.
Манай улс орнуудад ийм амжилтын түүх олон бий. Тэдгээрийн ард өндөр өрсөлдөөний нөхцөлд өдөр бүр хийж буй асар их хөдөлмөр оршдог. Энд өрсөлдөөний талаар тусгайлан хэлмээр байна. Өрсөлдөөнийг “ариун үнээ” мэт үзэж, түүнд огт халдаж болохгүй гэж бидэнд байнга ярьдаг байсан. Гэтэл өнөөдөр барууны өрсөлдөгчид өөрсдийн өмнөх манлайллыг ямар ч аргаар хамаагүй сэргээхийг оролдож байна.
Өрсөлдөөн заримдаа туйлын таагүй хэлбэрт орж байна. Энд Ираны төлөөлөгч саяхан энэ талаар ярьсан. Тэр дундаа ийм үйлдэл төрийн түвшинд ч гарч байна.
Үйлдвэр, логистикийн байгууламж, дамжуулах хоолой зэрэг объектуудыг шууд хүчээр устгах, довтлох хэрэгсэл хүртэл ашиглаж байна. Олон улсын тээврийн коридоруудыг хаах, далайн хөлөг онгоцуудыг булаан эзлэх оролдлого хийж байна. Мөн бусдын эрх ашгийн төлөө бус, үндэсний ашиг сонирхлоо хамгаалан үйл ажиллагаа явуулж буй улс орнуудад хууль бус хязгаарлалт тавьж, “хоёрдогч хориг арга хэмжээ” хэрэгжүүлэхээр сүрдүүлж байна.
Энд оролцож буй нөхөд маань ийм олон зуун жишээ дурдаж чадна. Харин Оросын эсрэг 30 мянга гаруй хориг арга хэмжээ авсан. Энэ нь дэлхийн бусад бүх улс орны эсрэг авсан хориг арга хэмжээг нийлүүлснээс бараг хоёр дахин их үзүүлэлт юм.
Ийм хүнд нөхцөлд Орос улс өөртөө итгэлтэйгээр, дотоодын бизнес, шинжлэх ухаан, технологи, боловсрол, инженерийн сургуулиуд, хамгийн гол нь Оросын иргэдийнхээ боломжид тулгуурлан ажиллаж, эерэг үр дүнд хүрсэн.
Бид үндэсний бүрэн эрхт байдлаа бэхжүүлж, найдвартай, урьдчилан таамаглах боломжтой түншүүдтэй харилцаагаа хөгжүүлж байна. Ердөө дөрөвхөн жилийн хугацаанд манай гадаад худалдааны газарзүй эрс өөрчлөгдлөө.
Оросын эдийн засагт бүтцийн өөрчлөлтүүд эхэлж, энэ нь эдийн засгийг илүү хүчирхэг, тогтвортой, уян хатан болгосон. Үүний үр дүнд өмнөх гурван жилийн хугацаанд Оросын эдийн засгийн өсөлт дэлхийн дунджаас давж, 2023-2025 онд ДНБ 10.3 хувиар өссөн. Ажилгүйдлийн түвшин түүхэн доод үзүүлэлт болох 2.3 хувьд хүрсэн.
Бид хиймэл оюун ухаан, автономит систем, дижитал платформ, орчин үеийн санхүүгийн хэрэгслүүдийг нэвтрүүлэх өргөн хүрээний технологийн шинэчлэлд ногоон гэрэл асаасан. Эдгээр шинэчлэлийн ихэнх нь Оросын өөрийн шийдэл болон БРИКС-ийн түнш орнуудын боловсруулсан технологид тулгуурлаж байна.
Энэ бүхэн гадаадын хатуу хязгаарлалтад байсан ч амбицтай зорилго тавьж, тэдгээрийг амжилттай хэрэгжүүлэх боломжтойг дахин нотолж байна.
Үүний зэрэгцээ хориг арга хэмжээний бодлогыг санаачлагч орнууд өөрсдөө төсвийн алдагдал, өсөн нэмэгдэж буй улсын өр, аж үйлдвэрийн уналт зэрэг асуудалтай тулгарч байгааг хэлэхээс аргагүй. Энэ бол ямар нэгэн таамаглал биш, тэдгээрийн өөрсдийн статистик мэдээлэл юм.
Би төсвийн алдагдал, өсөн нэмэгдэж буй улсын өр, аж үйлдвэрийн уналтын талаар хэллээ. Энэ бүхэн бодит нөхцөл байдал. Евро бүсийн тэргүүлэх эдийн засагтай орнуудад аж үйлдвэрийн үйлдвэрлэл сүүлийн хэдэн жилийн хугацаанд 8 хувиар буурсан байна. Тэдний хувьд энэ бол маш өндөр үзүүлэлт.
Бидний нийтлэг зорилго бол БРИКС-ийн боломжийг улс орнууд, ард түмнүүдийнхээ ашиг тусын төлөө бүрэн дүүрэн ашиглах явдал юм. Практик бизнесийн хамтын ажиллагаа буюу “бизнесийн дипломат”-ын механизмыг бэхжүүлж, компани, бизнес эрхлэгчдэд түншээ олох, төлбөр тооцоо хийх, бараа бүтээгдэхүүн тээвэрлэх, манай улс орнуудад хөрөнгө оруулах нөхцөлийг хөнгөвчлөх хэрэгтэй.
Үүний зэрэгцээ бид өөрсдийгөө ямар нэг байдлаар хязгаарлаж, тусгаарлахыг хүсэхгүй байна. Үндэсний хэмжээнд ч, компаниудын түвшинд ч, БРИКС-ийн нийтлэг түншлэлийн хүрээнд ч бид хаалттай байхыг хүсэхгүй.
Бид хэн нэгний эсрэг үйл ажиллагаа явуулаагүй. Бид өөрсдийнхөө төлөө, өөрсдийн ашиг сонирхлын төлөө ажиллаж байна. Гэхдээ дэлхийн бүх түнштэй хамтран ажиллахад бэлэн. Би дээр “хуучин тэргүүлэгчид” гэж хэлсэн, эсвэл “хуучин” ч биш байж болох юм — ямар ч байсан бид дэлхий нийттэй хамтран ажиллахад нээлттэй.
Бизнес форум нь худалдаа, эдийн засгийн харилцааг хөгжүүлэхэд нэмэлт түлхэц өгч, дэд бүтэц, логистик, санхүү, технологийн хамтын ажиллагаа болон бусад чиглэлд олон шинэ санаа, төслийг хэрэгжүүлэх боломж олгоно гэдэгт итгэлтэй байна.
Энэ ажлыг идэвхжүүлэх зорилгоор ОХУ-д БРИКС-ийн бизнесийн хамтын ажиллагааны асуудал хариуцсан Үндэсний хороо байгуулсан. Тус хороонд Оросын томоохон компаниудын 40 гаруй төлөөлөгч багтсан. Хорооны гол зорилго нь гадаадын түншүүдтэй хамтран ажиллах агуулга, хөтөлбөрийг боловсруулах явдал юм.
Дахин хэлье. Орос улс аж үйлдвэр, худалдаа, аялал жуулчлалын салбарын сонирхолтой, ирээдүйтэй санаачилгуудад нээлттэй. Бид түншүүдтэйгээ хамтран дэлхийн эрчим хүч, хүнсний аюулгүй байдлыг хангахад хувь нэмэр оруулж, Трансарктикийн тээврийн коридор, “Хойд–Өмнөд” олон улсын тээврийн коридор зэрэг найдвартай дэлхийн тээврийн маршрутуудыг хамтран хөгжүүлэхэд бэлэн байна.
Мөн боловсон хүчин бэлтгэх, хэрэглээний шинжлэх ухааны судалгаа хийх, тэр дундаа ухаалаг технологи, нисгэгчгүй тээврийн хэрэгсэл болон бусад чиглэлд хамтын ажиллагаагаа гүнзгийрүүлэх бодолтой байна.
Бизнесийн харилцааг хөгжүүлэхийн тулд үр ашигтай санхүүгийн механизм шаардлагатай. Энэ чиглэлд Шинэ хөгжлийн банк аль хэдийн ажиллаж байна. Үүний суурин дээр Орос улс шинэ хөрөнгө оруулалтын платформ байгуулах санал дэвшүүлсэн.
Энэхүү платформ нь манай улс орнуудын өрсөлдөх чадварыг тодорхойлох дэд бүтэц, технологи болон бусад салбарт хувийн хөрөнгө оруулалтыг нэмэгдүүлэхэд дэмжлэг үзүүлэх ёстой. Энэ санаачилгыг манай нэгдлийн бусад оролцогчид мөн дэмжинэ гэж найдаж байна.
Эрхэм хүндэт найз нөхөд өө!
БРИКС-ийн төрийн байгууллагууд, бизнесийн салбар, шинжээчдийн хамтын хүчин чармайлтаар дэлхийн эдийн засгийн өсөлтийн шинэ, тогтвортой платформ бүрэлдэж байна.
Үүний хамгийн чухал зүйл нь компани, байгууллагуудын үйл ажиллагааны үндсэн элементүүд, дүрэм журмыг гаднаас тулган хүлээлгэхгүй байгаа явдал юм. Бидэнд “алтан тэрбум” гэж нэрлэгддэг хэсэг өөрсдийн дүрмийг тулгадаггүй, бид ч хэнд ч юу ч тулгахгүй.
Манай дүрэм журам бизнесийн шинэлэг хандлага, технологийн дэвшилтэт шийдэлд тулгуурлаж, улс орнуудын үндэсний ашиг сонирхол, ард түмний эрх ашгийг тэргүүнд тавьдаг.
Тийм ээ, энэ бол амаргүй, ихээхэн тэвчээр, нөр их хөдөлмөр шаардсан ажил. Гэхдээ БРИКС-ийн орнууд шаргуу хөдөлмөрлөж, шударгаар ажиллаж, эрх тэгш хамтран ажиллаж, асуудлыг бүхэлд нь харж, харилцан ашигтай боломжийг олж чаддаг гэдгээ харуулсан.
Тиймээс бид аливаа сорилтод хариу өгч чадна. Иймээс бидний эхлүүлсэн үйл хэрэг амжилтад хүрнэ гэдэгт итгэлтэй байна.
Та бүхэнд хамгийн сайн сайхан бүхнийг хүсэн ерөөе" гэжээ.
Эх сурвалж: KREMLIN
