ОХУ-ын Ерөнхийлөгч Владимир Путин болон Беларусийн Ерөнхийлөгч Александр Лукашенко нар бямба гарагт хэлэлцээ хийхээр төлөвлөжээ. Беларусийн төрийн тэргүүн пүрэв гарагт ОХУ-д ажлын айлчлалаар хүрэлцэн ирсэн байна.
ОХУ-ын Ерөнхийлөгчийн хэвлэлийн нарийн бичгийн дарга Дмитрий Песковын мэдээлснээр, Путин, Лукашенко нарын уулзалт бямба гаргийн үдээс хойш болох юм байна. ОХУ-ын Ерөнхийлөгчийн туслах Юрий Ушаковын хэлснээр, хэлэлцээний дараа хоёр улсын удирдагчид албан бус уулзалт, ярилцлага хийх аж.
ОХУ, Беларусийн удирдагчид байнгын холбоотой байдаг бөгөөд энэ онд дөрвөн удаа биечлэн уулзаж, мөн утсаар тогтмол ярилцжээ. Хамгийн сүүлд тэд зургадугаар сарын 26-нд ОХУ-ын Новгород муж дахь Путины Валдай дахь өргөөнд ганцаарчилсан уулзалт хийсэн байна.
Баасан гарагт Лукашенко ОХУ-ын Ерөнхий сайд Михаил Мишустинтэй Москвад хэлэлцээ хийжээ. ОХУ-ын Ерөнхий сайдын тэмдэглэснээр, Орос, Беларусь улс үйлдвэрлэлийн хамтын ажиллагааны олон төсөл хэрэгжүүлж байгаа бөгөөд энэ оны эхний таван сарын хугацаанд хоёр орны худалдааны эргэлт 12.5 хувиар өссөн байна.
Мөн хэлэлцээний үеэр дижитал хөгжил, электроник, цахим тоон гарын үсгийг харилцан хүлээн зөвшөөрөх зэрэг асуудлыг хэлэлцжээ.
Беларусийн удирдагч улс орон нь төлөвлөсөн бүх үүрэг амлалтаа, тэр дундаа түлшний хангамжтай холбоотой үүргээ бүрэн биелүүлэхээр зорьж буй талаар мэдэгдсэн байна.
Путин өмнө нь Москва, Минск хоёр талын харилцааны бүх чиглэлээр үр бүтээлтэй хамтран ажиллаж, гадаад аюул занал, сорилтыг сөрөн зогсоох чиглэлээр хүчин чармайлтаа уялдуулж буйг онцолж байв.
ОХУ-ын Ерөнхийлөгч хоёр улс Холбоот улсын хүрээнд хамтын ажиллагаагаа цаашид өргөжүүлэх, тэр дундаа аюулгүй байдлын салбар дахь хамтын ажиллагааг нэмэгдүүлэх төлөвлөгөөтэйг удаа дараа тэмдэглэж иржээ.
Түүний үзэж байгаагаар, Орос, Беларусь хоёр улс ямар ч сорилтыг даван туулж, олон улсын тавцанд хууль ёсны ашиг сонирхлоо хамгаалж чадах аж.
Эх сурвалж: RIA NOVOSTI
