Жендэрийн үндэсний хороо, Байгаль орчин, уур амьсгалын өөрчлөлтийн яам, НҮБ-ын Хөгжлийн хөтөлбөр болон Азийн хөгжлийн банк хамтран газрын доройтол ба цөлжилтийг бууруулахад олон улсын түвшинд хэрэгжүүлж буй туршлага, шийдлүүдийг танилцуулах "Жендэрийн мэдрэмжтэй газрын нөхөн сэргээлтэд хөрөнгө оруулах, түүнийг өргөжүүлэх нь" сэдэвт өндөр хэмжээний хэлэлцүүлэг зохион байгууллаа.

Хурлын нээлтийн ажиллагаанд Монгол Улсын Их Хурлын гишүүн, МАН-ын дэргэдэх Нийгмийн Ардчилал Монголын Эмэгтэйчүүдийн Холбооны ерөнхийлөгч Д.Үүрийнтуяа болон Азийн Хөгжлийн Банкны Монгол дахь Суурин төлөөлөгч Жон Жүхён Жон нар үг хэлж, арга хэмжээг албан ёсоор нээв. 

Үндсэн илтгэлийг Жендэрийн Үндэсний Хорооны Нарийн бичгийн дарга бөгөөд Ажлын албаны дарга А.Адилбиш болон НҮБ-ын Хөгжлийн хөтөлбөрийн Монгол дахь Суурин төлөөлөгч Лионел Лоренс нар тавьж, газрын нөхөн сэргээлт нь зөвхөн байгаль орчны асуудал бус, хүний хөгжил, амьжиргаа болон жендэрийн эрх тэгш байдалтай салшгүйхолбоотойг онцоллоо.

А.Адилбиш илтгэлдээ орон нутгийн малчин, тариаланч эмэгтэйчүүдийн оролцоог дэмжих, тэдний уламжлалт мэдлэгийг шинжлэх ухаантай нэгтгэх, шийдвэр гаргах түвшинд эмэгтэйчүүдийн бодит оролцоог баталгаажуулах чиглэлээр хөрөнгө оруулалтыг нэмэгдүүлэхийг уриалав. 

Хэлэлцүүлгийн үеэр салбарын нэр хүндтэй төлөөлөгчид оролцож, өөрсдийн байр суурийг илэрхийлсэн юм. Тухайлбал,

Уур амьсгалын ногоон сангийн Гадаад харилцааны зөвлөх С.Оюун, Роберт Бош сангийн төслийн ахлах менежер Лора Рахмайер, Булган аймгийн Малчдын холбооны тэргүүн О.Уранжаргал, Канад-Монголын MERIT төслийн Засаглал, цахим хөгжлийн зөвлөх Р.Алтангэрэл болон Никлас Готтманн, Европын Комиссын Газар ба байгаль орчны асуудал хариуцсан бодлогын мэргэжилтэн төлөөллүүд илтгэл тавьж, санал бодлоо хуваалцав.