The Silk Road Caravan олон улсын санаачилгын албан ёсны нээлт Бүгд Найрамдах Турк Улсын Анталья хотноо ёслол төгөлдөр болж, Торгоны замын соёл, нүүдлийн өвийг дэлхийд сурталчлах их аялал ийнхүү эхэллээ.
🌿 Энэхүү санаачилга нь Торгоны зам дагуух бэлчээрийн эко систем, нүүдлийн мал аж ахуй, уугуул иргэдийн өв соёл, уламжлалт амьдралын хэв маягийг олон улсад таниулах зорилготой юм.
🌍 “Торгоны замын жингийн цуваа” аялал нь COP16 бага хурлаас эхлэлтэй бөгөөд 2026 оны наймдугаар сард Ulaanbaatar хотноо зохион байгуулагдах COP17 бага хуралтай холбогдож буй дэлхийн хэмжээний онцлох санаачилга болж байна.
🤝 Төслийг “Бэлчээр ба малчдын олон улсын жил-2026” аяны хүрээнд хэрэгжүүлж байгаа бөгөөд аяллын үеэр малчид, бэлчээр ашиглагчид, эрдэмтэн судлаачид, НҮБ болон олон улсын байгууллагын төлөөлөл Евразийн орнуудыг дамнан аялж, байгалийн болон соёлын өвийн дурсгалт газруудаар зочлох юм.
☀️ Тэд уур амьсгалын өөрчлөлтөд дасан зохицох, ган цөлжилтийн эрсдэлийг бууруулах, тогтвортой амьжиргааны шилдэг туршлагыг түгээн дэлгэрүүлэх зорилгоор хамтран ажиллах ажээ.
🌱 Өнөөдөр бэлчээрийн экосистем дэлхийн хуурай газрын талаас илүү хувийг эзэлж, хоёр тэрбум гаруй хүний амьжиргааг тэтгэж буй ч бэлчээрийн доройтол, цөлжилт дэлхий нийтийн өмнө тулгамдсан сорилт болоод байна. Иймээс энэхүү санаачилга нь эмзэг экосистемийг хамгаалах, газрын доройтлыг бууруулах олон улсын хамтын ажиллагааг шинэ түвшинд хүргэх зорилготой юм.
✨ “Эх байгалиа сэргээе, Итгэл найдвараа бадраая” уриатай энэхүү аялал 2026 оны наймдугаар сард Улаанбаатар хотод болох COP17 бага хурлын үеэр өндөрлөнө.
Дэлгэрэнгүй мэдээллийг silkroadcaravan.org сайтаас авах боломжтой.
