Монгол Улсын Ардын жүжигчин, дэлхийн шилдэг баритонуудын нэг Энхбатын Амартүвшин Бүгд Найрамдах Итали Улсын Ерөнхийлөгчийн зарлигаар “Ordine della Stella d’Italia” (Италийн Оддын одон)-гийн “Ufficiale” буюу Офицер зэрэглэлийн төрийн хүндэт одонгоор шагнууллаа.
Италийн төрийн энэхүү нэр хүндтэй одонг Монголын нэрт дуурийн дуучинд олгосон нь түүний дэлхийн сонгодог урлагт оруулсан хувь нэмэр, ялангуяа Итали улсын дуурийн соёл, Монгол-Италийн соёлын харилцааг бэхжүүлэхэд үзүүлсэн онцгой үүргийг үнэлсэн хэрэг юм.
“Ordine della Stella d’Italia” нь Италийн Бүгд Найрамдах Улсын Ерөнхийлөгчийн ивээл дор олгодог, Итали улс болон бусад орны хоорондын найрамдал, хамтын ажиллагаа, Италийн соёлын үнэт зүйлсийг дэлхийд түгээн дэлгэрүүлэхэд онцгой хувь нэмэр оруулсан гадаадын иргэдэд хүртээдэг төрийн дээд шагналуудын нэг юм.
Уг одон нь Кавальере (Cavaliere), Офицер (Ufficiale), Коммендаторе (Commendatore), Их офицер (Grande Ufficiale), Их загалмай (Cavaliere di Gran Croce) зэрэг хэд хэдэн зэрэглэлтэй байдаг.
Италийн албан ёсны бүртгэлд “AMARTUVSHIN Einkhbat” нэрээр түүний шагналыг бүртгэн, “Ufficiale dell’Ordine della Stella d’Italia” хэмээн тэмдэглэсэн байна.
Энхбат Амартүвшин бол дэлхийн хамгийн нэр хүндтэй дуурийн театруудын тайзнаа Монголын урлагийн нэрийг гаргаж буй уран бүтээлчдийн нэг юм. Түүний хүчирхэг хоолой, тайзны ур чадвар, Верди, Пуччини зэрэг Италийн агуу хөгжмийн зохиолчдын бүтээлүүдийг дэлхийн үзэгчдэд хүргэж буй уран бүтээлийн замнал нь Италийн сонгодог дуурийн ертөнцөд өндөр үнэлэгддэг.
Тэрээр дэлхийн алдартай дуурийн театруудын тайзнаа гол дүрүүдийг бүтээж, Италийн дуурийн уламжлалд хүндтэй байр суурь эзэлдэг баритон дуучдын нэг болсон юм. Ялангуяа Вердийн “Риголетто”, “Набукко”, “Травиата” зэрэг бүтээлүүдийн гол дүрүүдийг тайлбарласан түүний тоглолтууд олон улсын шүүмжлэгчдийн анхаарлыг татсаар ирсэн.
Италийн хэвлэл, урлагийн хүрээний хувьд Монголын баритон дуучны амжилтыг зөвхөн нэг уран бүтээлчийн ялалт бус, Италийн дуурийн өв соёл дэлхийн өнцөг булан бүрт хэрхэн шинэ авьяастнуудтай холбогдож байгаагийн тод жишээ хэмээн үнэлдэг.
Энэхүү шагнал нь Монголын сонгодог урлагийн түүхэнд төдийгүй хоёр орны соёлын харилцаанд онцгой үйл явдал болж байна. Италийн төрөөс дэлхийн тайзнаа Монголын урлагийн нэрийг өндөрт өргөж буй Э.Амартүвшинд “Италийн Оддын одон”-г хүртээсэн нь түүнийг олон улсын соёлын элчийн хэмжээнд үнэлж буй илэрхийлэл юм.
Монголын дуурийн урлагийн алтан хоолой Э.Амартүвшин Италийн төрийн хүндэтгэлийн одон хүртсэн нь Монгол Улсын урлаг дэлхийн сонгодог тайзанд ямар өндөр түвшинд хүрснийг харуулсан түүхэн үйл явдал боллоо.
