Аргентины шигшээ баг ДАШТ-ий финалд Испанид 1:0-ээр хожигдсоноос хойш нэг өдрийн дараа Лионель Мессигийн эхнэр Антонела Роккуццо нөхрийнхөө амжилт, хичээл зүтгэлийг бахархалтайгаар үнэлсэн сэтгэл хөдөлгөм зурвас нийтэлжээ.

Гурван хүүхдийн ээж Антонела долдугаар сарын 20-ны даваа гарагт Instagram хуудсаараа дамжуулан нөхөртөө зориулсан "захидал"-аа хуваалцсан байна. Тэрбээр Нью-Йорк-Нью-Жерси цэнгэлдэх хүрээлэнд болсон финалын тоглолтод Аргентин ялагдсан хэдий ч Мессигийн замнал, тэмцэгч чанараар бахархаж байгаагаа илэрхийлжээ.

Антонела испани хэлээр “Чи үргэлж хамгийн шилдэг нь байх болно. Зөвхөн авьяас чадвараараа биш, хамгийн чухал нь чи хэзээ ч өөрийнхөөрөө байхаа зогсоогоогүй учраас. Юу ч тохиолдсон чи хэзээ ч бууж өгдөггүй, эцсийн мөч хүртэл тэмцэж, сүүлийн секунд хүртэл бүхнээ зориулдаг” хэмээн бичсэн байна.

Тэрбээр цааш нь “Тэр хүч чадал, тэр сэтгэлгээ, дахин дахин босож ирдэг тэр чанар чинь чамайг бусдаас онцгой болгодог” гэж онцолжээ.

Антонела болон Лионель Месси нарын хамт өсгөж буй гурван хүү болох Тьяго (13), Матео (10), Чиро (8) нарын талаар дурдан, нөхрөө гэр бүлдээ үлгэр дуурайл болж байгаад талархсан байна.

Тэрбээр “Жинхэнэ амжилт гэдэг бол шаргуу хөдөлмөр, золиос, тууштай байдал, мөн өөрийн мөн чанараа хэзээ ч алдахгүй байхаас шалтгаалдаг гэдгийг чи бидэнд өдөр бүр харуулдаг” гэжээ.

Антонела мөн “Чи бидний хүүхдүүдэд хамгийн сайхан үлгэр жишээ, сая сая хүнд урам зориг өгөгч хүн. Үгээр илэрхийлэхийн аргагүйгээр би чамайг биширдэг. Чиний хажууд энэ амьдралыг туулж яваадаа асар их бахархдаг. Би чамд маш их хайртай” хэмээн сэтгэлээ илэрхийлсэн байна.

Антонела өмнө нь ч Аргентины шигшээ багийн ДАШТ-ий аяллын турш нөхрийнхөө тоглолтыг тогтмол дэмжиж, олон нийтийн сүлжээгээр бахархлаа хуваалцаж байв. Тухайлбал, долдугаар сарын 7-нд болсон хэсгийн шатны тоглолтод Месси хоёр гоол оруулж, Аргентин ялсны дараа тэрээр “Аргентин урагшаа. @leomessi, хэлэх үг ч үлдсэнгүй” хэмээн бичжээ.

Мөн Месси 2026 оны ДАШТ-д оролцох үеэрээ зургадугаар сарын 22-нд түүхэн амжилт үзүүлж, ДАШТ-ий 18 дахь гоолоо оруулахад Антонела “Түүхийг дахин дахин бүтээж байгааг чинь харах ямар их аз завшаан бэ. Би чамд хайртай” хэмээн нийтэлсэн байна.

Эх сурвалж: PEOPLE