Далайн биологич эмэгтэй 106 акулын шивээсээр дэлхийн дээд амжилтын эзэн болжээ. Гиннесийн дэлхийн дээд амжилтын байгууллага (GWR)-аас мэдээлснээр, Эмили Моррисон биедээ хамгийн олон акул шивүүлсэн эмэгтэй гэсэн рекордыг эзэмших болсон байна.

Сошиал орчинд “Акулын хатагтай Эмили” хэмээн танигдсан Моррисон анхны шивээсээ 19 настайдаа буюу 1999 онд хийлгэж байжээ. Тэр нь нурууныхаа доод хэсэгт хийлгэсэн цагаан аварга акулын дүрс байсан аж.

Түүний анхны шивээс 8 настайдаа үзсэн “Jaws” киноны аварга цагаан акултай холбоотой байжээ. Тухайн үед бусад олон хүүхдийн адил тэр акулуудаас айдаг байсан ч аав нь түүнийг эдгээр амьтдын талаар илүү ихийг мэдэх хүслийг нь урамшуулж, номын сангаас акулын тухай ном авч уншуулдаг байжээ.

Моррисон Гиннесийн байгууллагад “Би акулуудыг үргэлж гайхалтай гэж боддог байсан. Тэдний талаар хүмүүсийн мэддэггүй олон зүйл байдаг. Акул болон мөгөөрст загасууд 450 сая жилийн турш хэрхэн хувьсан өөрчлөгдөж ирсэн нь намайг маш их татдаг” гэж ярьжээ.

Тэр мөн “Өнөөгийн акулууд яагаад ийм болсон, өөрийн амьдардаг орчиндоо хэрхэн нөлөөлдөг нь үнэхээр сонирхолтой. Тэдний тухай мэдээлэл хэзээ ч дуусахгүй” гэж хэлсэн байна. Олон жилийн турш үргэлжилсэн энэ сонирхол нь түүнийг далайн биологич болох замд хөтөлж, улмаар хүзүүнээс хөл хүртэлх биедээ 106 акулын шивээс хийлгэхэд хүргэжээ.

Тэр бие дээрээ 71 өөр төрлийн акул, 13 чулуужсан акулын шүд, 1 шинэ акулын шүд гэсэн дүрслэлүүд шивүүлсэн байгаа аж. Түүний шивээсүүдийг 2026 оны Shark Week-ийн хүрээнд гаргах “My Strange Shark Addiction” нэвтрүүлгээр олонд үзүүлэх аж.

Моррисон “Би акулын шивээс хийлгэхээ зогсоохгүй. Одоо дахиад хоёр шивээс хийлгэхээр төлөвлөж байна” гэж хэлжээ. Тэр мөн өөрийн Shark Lady Enterprises байгууллагаараа дамжуулан чулуужсан олдвор хайх шумбалтын аяллууд зохион байгуулдаг байна. Тэрбээр “Би бүхэлдээ акулын амьдралаар амьдардаг” гэж ярьжээ. 

Эх сурвалж: PEOPLE