2026 оны хөлбөмбөгийн дэлхийн аварга шалгаруулах тэмцээний финалын тоглолтод Европын аварга Испанийн шигшээ баг нэмэлт цагт өмнөх дэлхийн аварга Аргентины шигшээ багийг 1:0-ийн харьцаатай буулган авч, дэлхийн аваргын цомыг хүртлээ.
Шийдвэрлэх тоглолт 2026 оны долдугаар сарын 19-ний ням гаргийн орой АНУ-ын Нью Жерси мужийн Ист Ратерфорд хот дахь MetLife (New York New Jersey) цэнгэлдэх хүрээлэнд болсон юм.
Энэ удаагийн финалын тоглолтын завсарлага АНУ-ын Супер Боулын уламжлалыг дуурайсан хөгжмийн шоуны улмаас ердийнхөөс хоёр дахин урт буюу ойролцоогоор 30 минут үргэлжилснээрээ онцлог байлаа.
Ямаль, Месси нарын үе үеийн тулаан
Финалын өмнө дэлхийн хэвлэлүүд энэхүү тоглолтыг "үе үеийн тулаан" хэмээн онцолж байв. Нэг талд Испанийн 19 настай супер од Ламин Ямаль, нөгөө талд Аргентины домогт хөлбөмбөгчин, 39 настай Лионель Месси нарын өрсөлдөөн олны анхаарлын төвд байсан.
Испанийн шигшээ тоглолтын эхнээс довтолгооны санаачилгыг гартаа авч, өрсөлдөгчийн хаалгыг удаа дараа заналхийлсэн бол Аргентины баг хамгаалалтад түлхүү төвлөрч, Мессигийн дамжуулалт болон жигүүрийн хурдан сөрөг довтолгоонд найдсан тоглолт үзүүлэв.
Аргентины финалын түүхэн дэх хамгийн сул довтолгоо
Үндсэн цагийн турш хамгийн аюултай боломжууд бүгд Аргентины хаалгач Эмилиано Мартинесын өмнө үүссэн. Ламин Ямаль, Микель Оярсабаль, Марк Кукурелья, Дани Ольмо, Ферран Торрес, Нико Уильямс, Микель Мерино нар ээлж дараалан гоол оруулах боломж гаргасан ч зарим цохилт хаалганы шонг шүргэн өнгөрч, заримыг хамгаалагчид болон хаалгач Мартинес амжилттай хаалаа.
Тэр ч бүү хэл Мартинес үндсэн цагийн төгсгөлд Ламин Ямалийн торгуулийн цохилтыг гайхалтай хааснаар багаа нэмэлт цагт хүргэсэн юм.
Аргентины шигшээ тоглолтын 75 дахь минутад л хаалга руу анхны цохилтоо хийсэн нь дэлхийн аваргын финалын түүхэн дэх хамгийн хожуу анхны цохилт болсон үзүүлэлт болжээ.
Түүнчлэн Аргентины тоглогчид хэт ширүүн тоглолтын улмаас хэд хэдэн шар хуудас авсан бөгөөд нэмэлт цагийн өмнөх шүүгчийн нөхөн олголтын 3 дахь минутад Энцо Фернандес бүдүүлэг алдаа гаргаж улаан хуудас хүртсэнээр баг нь нэмэлт цагийг 10 хүнтэй эхлүүлсэн байна.
Ферран Торрес аваргын гоолыг оруулав
Испани хүн дутуу тоглож байсан өрсөлдөгчөө нэмэлт цагт шахан тоглосоор хоёр дахь нэмэлт цагийн 2 дахь минутад ялалтын гоолоо орууллаа.
Нико Уильямсын толгойгоор дамжуулсан бөмбөгийг Ферран Торрес хүчтэй, оновчтой цохилтоор хаалганд шигтгэн, тоглолтын цорын ганц бөгөөд аваргын үнэ цэнтэй гоолыг бүртгүүлэв.
Испани 16 жилийн дараа дахин дэлхийн аварга боллоо
Энэ ялалтаар Испанийн шигшээ дараалан 38 тоглолт ялагдалгүй үргэлжилсэн шинэ дэлхийн дээд амжилт тогтоов. Мөн тус баг ДАШТ-ий турш ердөө нэг гоол алдсан гайхалтай хамгаалалттайгаар аваргын цомыг өргөсөн юм.
Испани өмнө нь зөвхөн 2010 оны Өмнөд Африкийн дэлхийн аваргаар түрүүлж байсан бөгөөд тэр үед хагас шигшээд Германыг 1:0-ээр, финалд Нидерландыг мөн нэмэлт цагт 1:0-ээр буулган авч байсан түүхтэй.
Аргентин дахин финалд бүдэрлээ
Аргентины шигшээ бол дэлхийн хөлбөмбөгийн хамгийн амжилттай багуудын нэг бөгөөд 1978, 1986, 2022 онуудад дэлхийн аварга болж байсан. Үүнээс гадна 1930, 1990, 2014, 2026 онуудад финалд шалгарсан ч аваргын төлөөх тоглолтод ялагдал хүлээлээ.
ДАШТ-ИЙ ШИЛДГҮҮД
Олон улсын хөлбөмбөгийн холбоо (ФИФА) Испанийн шигшээ багийн хагас хамгаалагч, ахлагч Родригог 2026 оны хөлбөмбөгийн ДАШТ-ий "Шилдэг тоглогч"-оор шалгарууллаа.
Испанийн шигшээ баг финалд Аргентины багийг нэмэлт цагт 1:0-ээр хожиж, түүхэндээ хоёр дахь удаагаа ДАШТ-ий цомыг өргөв.
Родри тэмцээний турш шигшээ багийнхаа бүх найман тоглолтод оролцжээ. Тэрбээр гоол оруулж, гоолын дамжуулалт өгөөгүй хэдий ч Испанийн багийн амжилтад голлох үүрэг гүйцэтгэсэн байна.
ШИЛДЭГ ЗАЛУУ ТОГЛОГЧ - Пау Кубарси
Энэ удаагийн ДАШТ-ий шилдэг залуу тоглогчоор ФИФА Испанийн шигшээ багийн хамгаалагч Пау Кубарсиг шалгаруулжээ.
Өдгөө 19 настай төвийн хамгаалагч Кубарси тэмцээний бүх найман тоглолтод оролцсон байна. Тэрбээр гоол оруулж, гоолын дамжуулалт хийгээгүй ч Испанийн хамгаалалтын гол тулгуур болж, баг нь тэмцээний турш ердөө нэг гоол алдсан юм.
"АЛТАН ШААХАЙ"-Н ЭЗЭН - Килиан Мбаппе
Францын шигшээ багийн довтлогч Килиан Мбаппе 2026 оны хөлбөмбөгийн ДАШТ-ий шилдэг довтлогчоор шалгарлаа.
Тэрбээр тэмцээний найман тоглолтод 10 гоол оруулж, дөрвөн гоолын дамжуулалт өгснөөр ДАШТ-ий "Алтан шаахай" шагнал хүртэв.
"Мөнгөн шаахай" шагналыг Аргентины шигшээ багийн ахлагч Лионель Месси хүртсэн бөгөөд тэрбээр найман тоглолтод найман гоол оруулж, дөрвөн гоолын дамжуулалт өгчээ.
Харин мэргэн буучдын жагсаалтын гуравдугаар байрыг Английн шигшээ багийн хагас хамгаалагч Жүд Беллингем, Норвегийн шигшээ багийн довтлогч Эрлинг Холанд нар тус бүр долоон гоолтойгоор эзэлжээ.
ШИЛДЭГ ХААЛГАЧ - Унаи Симон
Энэ удаагийн ДАШТ-ий шилдэг хаалгачаар Испанийн шигшээ багийн хаалгач Унаи Симон шалгарлаа.
Тэрбээр найман тоглолтод оролцохдоо шөвгийн наймын шатанд Бельгийн багтай хийсэн тоглолтод нэг гоол (2:1) алдсан байна. Симон ДАШТ-ий үеэр 649 минутын турш хаалгандаа гоол алдаагүйгээс гадна, нэг ДАШТ-д гоол алдалгүй хамгаалсан тоглолтын тоогоор (7) дээд амжилт тогтоожээ.
Ийнхүү Унаи Симон ДАШТ-ий шилдэг хаалгачийн шагналыг хоёр дахь удаагаа хүртэж байна. Өмнө нь энэ амжилтыг Испанийн домогт хаалгач Икер Касильяс 2010 онд үзүүлж байв.
Эх сурвалж: DW, KAZINFORM
