Зарим хүмүүсийн хувьд цүнх бол зөвхөн өдөр тутмын хэрэглээний зүйл байдаг бол дэлхийн хамгийн чинээлэг хүмүүсийн хувьд зарим цүнх нь урлагийн бүтээл, ховор цуглуулга, бүр хөрөнгө оруулалтын нэг хэлбэр болж чаддаг. Тансаг зэрэглэлийн цүнхний ертөнцөд үнэ нь зөвхөн материал, брэндээр хэмжигддэггүй бөгөөд гар урлал, ховор байдал, түүх, эзэмшигчийн нэр хүнд зэрэг олон хүчин зүйл нийлж тухайн бүтээлийн жинхэнэ үнэ цэнийг тодорхойлдог.
Энэ ертөнцийн оргилд Францын алдарт Hermès ордон байрладаг. Тус брэндийн Birkin болон Kelly загварууд олон арван жилийн турш дэлхийн хамгийн хүсэмжит цүнхнүүдийн жагсаалтыг тэргүүлж ирсэн. Ялангуяа Hermès Himalaya Birkin нь тансаг хэрэглээний бэлгэ тэмдэг болсон бүтээл юм.
Hermès Himalaya Birkin нэрнээсээ эхлээд онцгой түүхтэй. Цүнхний өнгө Гималайн уулсын цаст оргилыг санагдуулам цагаанаас зөөлөн саарал өнгө рүү шилжсэн өвөрмөц дизайнтай. Энэхүү өнгөний шилжилтийг бий болгох нь маш нарийн ур чадвар шаарддаг бөгөөд цүнх бүрийг Hermès-ийн туршлагатай урчууд гараар бүтээдэг байна.
Himalaya Birkin-ийн хамгийн үнэ цэнтэй хувилбарууд нь Niloticus матрын арьсаар хийгдсэн, зарим Diamond Himalaya хувилбарууд нь 18 каратын цагаан алт, алмаазан чимэглэлтэй байдаг. Ийм ховор загварууд олон улсын дуудлага худалдаа болон цуглуулагчдын зах зээл дээр хэдэн зуун мянган ам.долларын үнэ хүрдэг аж.
2021 онд Hermès-ийн White Himalaya Niloticus Crocodile Diamond Kelly загвар 500 мянга гаруй ам.долларын үнээр зарагдаж, тухайн үеийн цүнхний дуудлага худалдааны дээд амжилтыг тогтоожээ.
Нита Амбани зэрэг дэлхийн хамгийн нөлөө бүхий хүмүүсийн цуглуулгад ийм төрлийн ховор Hermès загварууд байдаг нь эдгээр цүнхний нэр хүндийг улам нэмэгдүүлдэг. Энэтхэгийн тэрбумтан гэр бүлийн гишүүдийн эзэмшдэг Hermès-ийн онцгой бүтээлүүдийн зарим нь зөвхөн загварын хэрэглэл биш, үнэт эдлэлийн хэмжээний ур хийцтэй бүтээлүүд аж. Тухайлбал, Нита Амбанигийн цуглуулгатай холбоотойгоор яригддаг Hermès Sac Bijou Birkin зэрэг бүтээлүүд нь 18 каратын алт, олон мянган алмаазан шигтгээтэй, хэдэн сая ам.долларын үнэлгээтэй гэж мэдээлэгддэг.
Гэхдээ дэлхийн хамгийн үнэтэй цүнхний тухай ярихад зөвхөн Himalaya Birkin-ээр хязгаарлагдахгүй. Hermès-ийн түүхэн үнэ цэн бүхий бүтээлүүд заримдаа энгийн тансаг цүнхний үнэлгээнээс давж гардаг. Үүний хамгийн тод жишээ нь Jane Birkin-д зориулан 1985 онд бүтээсэн анхны Hermès Birkin цүнх юм. Энэхүү түүхэн загвар Sotheby's дуудлага худалдаагаар 2025 онд 10.1 сая ам.доллароор зарагдаж, дэлхийн хамгийн үнэтэй цүнхний дуудлага худалдааны шинэ дээд амжилт тогтоожээ.
Яагаад зарим цүнх ийм өндөр үнэд хүрдэг вэ гэсэн асуултын хариулт зөвхөн үнэт материалд биш аж. Hermès-ийн хувьд үйлдвэрлэлийн тоо хязгаарлагдмал, гараар урласан чанар, олон жилийн уламжлал, брэндийн нэр хүнд зэрэг нь хамгийн том үнэ цэн болдог байна. Ховор цүнх эзэмших нь заримдаа үнэт цаг, сонгодог автомашин, урлагийн бүтээл цуглуулахтай адил статусын илэрхийлэл болжээ.
Өнөөдөр тансаг цүнхний зах зээл дэлхийн хөрөнгө оруулагчдын анхаарлыг татах болсон. Ялангуяа ховор Hermès Birkin, Kelly зэрэг загваруудын үнэ цэн урт хугацаанд хадгалагдах боломжтой гэж цуглуулагчид үздэг. Учир нь, эдгээр бүтээлүүдийн нийлүүлэлт маш хязгаарлагдмал байдаг бол дэлхийн хамгийн чинээлэг худалдан авагчдын эрэлт тогтвортой хэвээр байдаг.
Эх сурвалж: VOGUE, SOTHEBYS
