Архангай аймгийн “Бөхбилэгт” дэвжээний 30 жилийн ойн босгон дээр зохион байгуулагдсан галын сорилго барилдаан өнөөдөр нар хур тэгширсэн сайхан өдөр амжилттай болж өндөрлөлөө. Энэхүү барилдаан нутгийн бөхийн залгамж холбоо, бэлтгэл сургуулилалтын чанарыг харуулсан, өрсөлдөөн өндөртэй тэмцээн болсноороо онцлог байв.
Сорилго барилдаанд Архангай аймгийн болон бусад бүс нутгийн шилдэг бөхчүүд хүч үзэж, үзэгч олныг огшоосон барилдаанууд өрнөлөө. Бөхчүүдийн бэлтгэл жигдэрч, өнгө хийморь сайтай байгааг үзэгчид болон бөхийн хүрээнийхэн онцолж байв.
Сорилго барилдаанд Архангай аймгийн Батцэнгэл сумын харьяат, Монгол Улсын Үнэн зоригт харцага Б.Зоригтбаатар түрүүллээ. Тэрбээр тогтвортой барилдаан, биеийн хүч, тактикийн зөв сонголтоороо өрсөлдөгчдөө илүүрхэв.
Барилдааны үзүүр бөхөөр Архангай аймгийн Хотонт сумын харъяат, Цэргийн заан Б.Гончигсүрэн шалгарлаа. Шөвгийн дөрөвт Архангай аймгийн Хайрхан сумын харьяат, Монгол Улсын харцага О.Мөнх-Эрдэнэ Хотонт сумын харьяат, Монгол Улсын начин Э.Мөнхжаргал нар шалгарсан байна.
30 жилийн ойн босгон дахь онцлох сорилго
“Бөхбилэгт” дэвжээний 30 жилийн ойг угтсан энэхүү сорилго барилдаан нь залуу бөхчүүдийн ур чадварыг сорихоос гадна аймгийн бөхийн хөгжил, үе үеийн бөхчүүдийн залгамж холбоог бататгасан чухал арга хэмжээ болж өнгөрлөө.
Бөх сонирхогчид энэхүү барилдаан ирэх наадмуудын өнгийг тодорхойлохуйц өрсөлдөөнтэй, чансаа өндөр тэмцээн болсныг онцолж байна.
