Өмнөд Солонгосын алдарт уран бүтээлч G-Dragon-ыг НҮБ-ын Боловсрол, шинжлэх ухаан, соёлын байгууллага болох ЮНЕСКО-гийн Дэлхийн өвийн хорооны 48 дугаар чуулганы хүрээнд “Хүндэт элч”-ээр албан ёсоор томилжээ.
Энэхүү шийдвэр нь түүний нийгмийн хариуцлагатай үйл ажиллагаа, соёлын салбар дахь нөлөө, мөн байгаль орчин болон өв соёлын хамгаалалд чиглэсэн санаачилгуудыг дэмждэг байр суурьтай нь холбоотой гэж албан эх сурвалжууд мэдээлсэн байна.
“Juspeace Foundation”-ийн үйл ажиллагаа нь гол үндэслэл болжээ
Мэдээллийн дагуу G-Dragon-ийн дэмжин ажилладаг "Juspeace Foundation" ЮНЕСКО-гийн үнэт зүйлс болох соёлын өвийг хамгаалах, энх тайван, тогтвортой хөгжлийг дэмжих зорилготой уялддаг тул түүнийг энэ хүндэт үүрэгт сонгоход чухал хүчин зүйл болжээ.
Тус сан залуучуудын оролцоог нэмэгдүүлэх, уран бүтээл болон соёлын боловсролоор дамжуулан нийгмийн эерэг өөрчлөлт бий болгох чиглэлд олон төсөл хэрэгжүүлдэг байна.
Хүндэт элчийн үүрэг юу байх вэ?
Хүндэт элчийн хувиар G-Dragon дараах чиглэлүүдэд анхаарч ажиллах ажээ. Үүнд:
- Дэлхийн өвд бүртгэгдсэн дурсгалт газруудыг хамгаалах талаар олон нийтэд сурталчлах
- Соёлын өвийн үнэ цэнийг залуу үеийнхэнд таниулах
- Байгаль, соёлын тогтвортой хамгааллыг дэмжих кампанит ажилд оролцох
- Олон улсын соёлын солилцоог дэмжих үйл ажиллагаанд хувь нэмэр оруулах
- Олон улсын соёлын нөлөөтэй уран бүтээлч
G-Dragon зөвхөн K-pop хөгжмийн салбарын төлөөлөл төдийгүй дэлхийн хэмжээний соёлын нөлөө бүхий уран бүтээлчдийн нэгд тооцогддог. Түүний уран бүтээл, загвар, нийгмийн санаачилгууд олон улсын залуусын соёлд хүчтэй нөлөө үзүүлдэг билээ.
Шинжээчид "ЮНЕСКО-гийн энэхүү томилгоо түүнийг зөвхөн уран бүтээлч төдийгүй дэлхийн соёлын өвийг хамгаалах үйлсэд оролцогч олон улсын дуу хоолой болгон тодруулж буй хэрэг" хэмээн онцолж байна.
Эх сурвалж: UNESCO, YONHAP
