Монголын үндэсний бөхийн холбоо (МҮБХ)-ны Ёс зүй, сахилга хариуцлагын зөвлөлөөс барилдааны үеэр ёс зүйн зөрчил гаргасан болон барилдаанаа хаяж явсан нэр бүхий бөхчүүдийн барилдах эрхийг тодорхой хугацаатайгаар хасах шийдвэрүүд гаргажээ.

Тус зөвлөл нь Монгол бөхийн ёс жудаг, уламжлалт зан заншлыг хүндэтгэх, барилдааны дэг журмыг сахиулах, бөхчүүдийн ёс зүйн хариуцлагыг нэмэгдүүлэх зорилгоор дараах тогтоолуудыг баталсан байна. Хориг тавих хугацааг тухайн бөхийн барилдах эрхийг түдгэлзүүлсэн өдрөөс эхлэн тооцох аж.

1. 2026 оны 9 дүгээр сарын 25-ны өдрийн 14 дүгээр тогтоолоор:

• Сумын харцага Р.Амгаланбаатар (Говь-Алтай аймгийн Цээл сумын харьяат): Бүх шатны барилдаанд оролцох эрхийг 2.8 жилээр хязгаарлав. Тэрбээр 2026 оны 9 дүгээр сарын 9-нд Цээл сумын баяр наадмын үеэр Монгол бөхийн ёс жудагт харшилсан үйлдэл гаргаж, үзэгч олон болон жаяг дэгийн багийн гишүүдийг үл хүндэтгэсэн гэж үзжээ.

• Улсын начин Д.Цэрэнтогтох (Баянхонгор аймгийн Заг сумын харьяат): Бүх шатны барилдаанд оролцох эрхийг 4 сарын хугацаагаар хориглов. Түүнийг 2026 оны 7 дугаар сарын 26-нд Баянхонгор аймаг байгуулагдсаны 85 жилийн ойн баяр наадмаар барилдах үеэрээ ёс зүйн зөрчил гаргасан хэмээн дүгнэсэн байна.

2. 2026 оны 10 дугаар сарын 16-ны өдрийн 2 дугаар тогтоолоор:

• Улсын заан Ц.Мягмарсүрэнг: Бүх шатны барилдаанд оролцох эрхийг 24 сарын хугацаагаар хасав. Түүнийг Үндэсний их баяр наадмын хүчит бөхийн барилдаанд барилдаж байхдаа барилдаанаа дуусгалгүй хаяж явсан гэх үндэслэлээр ийнхүү шийтгэжээ.

• Нэр бүхий 45 бөх (Улсын начин Б.Баатарцол, Улсын харцага Г.Батбаяр, Улсын начин Г.Даржаажанцан нарын тэргүүтэй): Бүх шатны барилдаанд оролцох эрхийг 4 сараас 14 сар хүртэлх хугацаагаар хасах сахилгын шийтгэл ногдуулав. Дээрх бөхчүүдийг мөн адил Үндэсний их баяр наадмын хүчит бөхийн барилдааны үеэр барилдаанаа дуусгалгүй хаяж явсан хэмээн тогтоолын хавсралтад дурдсан байна.