Дэлхийн К-попын од Лалиса Манобан буюу Лиза 14-хөн настайдаа Тайландаас Өмнөд Солонгос руу ганцаараа нисэж, мөрөөдлийнхөө төлөө шинэ амьдрал эхлүүлж байжээ.

Тэр үед түүний хүссэн зүйл ердөө л тайзан дээр гарч, дуртай зүйлээ хийх байсан бол өнөөдөр тэр дэлхийн хамгийн алдартай уран бүтээлчдийн нэг болж, BLACKPINK хамтлагийн гишүүний хувиар сая сая хүний танил болсон байна.

Алдар нэрийн оргилд хүрсэн хойноо Лиза өөрөөсөө нэг чухал асуултыг асуужээ. “BLACKPINK-ийн Лизагаас гадна би өөрөө хэн бэ?”

Энэ асуултын хариуг олохын тулд тэр хамтлагаасаа түр завсарлаж, нэг жилийн хугацаанд өөрийгөө шинээр сорьсон байна. Тэр хугацаанд гэр бүлийнхэнтэйгээ илүү ойр байж, хөгжмийн уран бүтээлээс гадна жүжигчний мэргэжлээр хүч сорьжээ.

“The White Lotus” цувралд тоглосон нь түүний хувьд цоо шинэ туршлага болсон аж. Лиза энэ нэг жилийг зүгээр нэг амралт бус, өөрийгөө нээж, шинэ зүйл туршиж, өөрийн хүсэл мөрөөдлийг дахин сонссон чухал үе байсан хэмээн дурсжээ

Лизагийн амьдралын зам тийм ч амар эхлээгүй. Тэр 13 настайдаа YG Entertainment-ийн шалгаруулалтад орж, 14 насандаа Солонгост очин таван жилийн турш бэлтгэгдсэний эцэст BLACKPINK-тэй дебют хийсэн байна.

Өсвөр насандаа эх орон, гэр бүлээсээ хол амьдрах амаргүй байсан ч хамтлагийн гурван гишүүн түүний хувьд гэр бүл шиг нь болж, тэр дөрвөн охины нөхөрлөл өнөөдрийг хүртэл үргэлжилж буй.

BLACKPINK-д Лиза ихэвчлэн репперийн байр суурьтай байсан ч дотроо үргэлж дуулахыг хүсдэг байжээ. Тиймээс соло уран бүтээл нь түүнд өөрийн дуу хоолойг илүү чөлөөтэй илэрхийлэх боломж өгсөн байна.

Түүний “Alter Ego” цомогт өөр өөр зан чанарыг илэрхийлсэн таван дүр гардаг ч Лиза тэднийг тусдаа хүмүүс гэхээсээ илүү өөртэй нь хамт өсөж, өөрчлөгдөж ирсэн талууд хэмээн боддог ажээ.

Алдар нэр түүнд асар их боломж авчирсан ч энгийн амьдралын олон зүйлээс холдуулсан байна. Залуу байхдаа болзох, гадуур зугаалах, машин жолоодох зэрэг өдөр тутмын энгийн зүйлс хүртэл амаргүй байсан тухай тэр ярьдаг аж.

Харин одоо Лиза амжилтынхаа хажуугаар өөрийн амьдралаа өөрөө мэдэрч, ажил болон хувийн амьдралынхаа тэнцвэрийг олохыг хүсэж буй юм байна. Түүний хувьд амжилт гэдэг зөвхөн тайзан дээр илүү өндөрт гарах бус, өөрийнхөөрөө амьдрах боломжийг олж авах болжээ.

Энэ бүхнийг өгүүлэх “Always Lalisa” баримтат кинонд үзэгчид дэлхийд танигдсан од Лизагийн цаадах энгийн хүнийг харах боломжтой. Тэр найруулагч Сью Кимтэй ярилцахдаа өөрийнхөө эмзэг, хувийн дурсамжуудыг нээж, бага насны бичлэгүүдээ хүртэл дэлгэцэнд гаргажээ.

Өнөөдрийн алдартай Лизагийн ард 14 настайдаа мөрөөдлөө даган харийн оронд ганцаараа очсон бяцхан охин байсныг тэрхүү дурсамжууд сануулах нь.

Түүний амьдралд гэр бүл онцгой байр суурь эзэлдэг. 14 настай охиноо өөр улс руу ганцааранг нь явуулсан ээж, хойд аав нь анхнаас нь түүнд итгэж, хүссэн зүйлээ хийхийг нь дэмжиж ирсэн байна. Лиза ч тэдний итгэлийг өөрийнх нь амьдралд өгсөн хамгийн том дэмжлэгүүдийн нэг гэж үздэг аж.

Харин түүний ярилцлагын хамгийн сэтгэл хөдөлгөм хэсэг нь өөд болсон өвөө болон бүжгийн багш Нокийн тухай байжээ. COVID-19-ийн үеэр өвөөгөө нас барахад Лиза түүнтэй уулзаж амжаагүй бөгөөд өвөө нь түүний хамгийн том дэмжигчдийн нэг байсныг дурсан ярьжээ.

Тиймээс өнөөдөр ч тэр тайзан дээр гарахынхаа өмнө сэтгэлдээ өвөө болон багшаа урьж, “Намайг ирээд үзээрэй” хэмээн хэлдэг байна. Тэр хоёр түүний тоглолтыг бодитоор үзэж чадахгүй ч Лиза тэднийг өөрийнх нь “хамгаалагч тэнгэрүүд” гэж боддог аж.

Нэг жилийн завсарлага түүнийг BLACKPINK-ээс холдуулсангүй, харин ч өөрийгөө илүү сайн таньж мэдээд, хамтлагтаа эргэн ирэхэд нь шинэ эрч хүч өгчээ. Тэр болон хамтлагийн бусад гишүүд өөр өөрсдийн соло уран бүтээлээр дамжуулан өөрийн дуу хоолойгоо олж, дараа нь эргэн нэгдэхдээ илүү их итгэлтэй болсон байна. Тэд хол байсан ч холбоогоо таслаагүй, бие биенээ дэмжсээр иржээ.

Лизагийн нэг жилийн завсарлага бол карьераасаа ухарсан алхам биш, харин өөрийгөө илүү сайн танихын тулд хийсэн алхам байжээ. Тэр нэг жилийн хугацаанд шинэ мэргэжил туршиж, гэр бүлтэйгээ ойртож, өөрийн дуу хоолойг эрж, өнгөрсөн амьдралаа эргэн харж, ирээдүйдээ юу хүсэж байгаагаа ойлгосон байна.

Өнөөдөр тайзан дээр гарч буй Лиза бол зөвхөн BLACKPINK-ийн дэлхийн од биш. Тэр бол мөрөөдлийнхөө төлөө 14 настайдаа эх орноосоо гарсан охин, гэр бүлийнхээ итгэлийг тээж яваа охин, өвөөгөө сэтгэлдээ үргэлж хамт авч явдаг ач охин, өөрийн дуу хоолойг хайсаар байгаа уран бүтээлч аж.

Магадгүй хүн өөрийгөө олохын тулд үргэлж урагшаа гүйх шаардлагагүй. Заримдаа түр зогсож, эргэн харж, өөртөө цаг өгөх хэрэгтэй байх нь. Лизагийн хувьд тэр зогсолт ердөө нэг жил үргэлжилсэн ч өөрийгөө илүү сайн танихад хангалттай хугацаа байжээ.

Эх сурвалж: REUTERS