Америкийн инээдмийн жүжигчин, телевизийн хөтлөгч, продюсер, идэвхтэн Рози О’Доннелл Эпштейний бэлгийн хүчирхийллийг даван туулсан хэсэг эмэгтэйчүүдийг өмгөөлж, тэдэнтэй хамт байгаагаа илэрхийлжээ.
Жүжигчин саяхан Instagram хуудастаа тус эмэгтэйчүүдтэй хамт Хелен Реддигийн 1971 онд гаргасан, эмэгтэйчүүдийн эрх, хүчирхэг байдлыг илэрхийлдэг алдарт дууг дуулж буй бичлэгээ нийтэлсэн байна.
О’Доннелл бичлэгийн эхэнд эмэгтэйчүүдэд хандан “Бүгдэд нь хүрэлцэн ирсэнд баярлалаа. Бидэнд хэдэн цаг байна. Бид бүгдээрээ гар гараасаа бариад, гараа хамтдаа өргөе гэж бодож байна” гэжээ.
Тэрбээр цааш нь “Та бүхэнд маш хүнд байсныг би мэднэ. Тэгээд ч маш бага дэмжлэг авч ирсэн. Манай улс ийм замбараагүй байдалд орж, та бүхэн үүнийг туулж явах ёстой болсон нь үнэхээр харамсалтай байна. Та бүхэн бүгд баатрууд. Та бүхэн дэлхий нийт хүүхдийн бэлгийн хүчирхийлэлтэй хэрхэн тэмцэж, хэрхэн хандахыг өөрчилж чадна” хэмээн хэлжээ.
Жүжигчин, идэвхтэн О’Доннелл мөн уг бичлэгийн тайлбар хэсэгт “Авлигын хэрэгт холбогдсон Ерөнхий прокурор (Трампын өмнө нь хувийн өмгөөлөгчөөр ажиллаж байсан хүн) Эпштейний хэргийн материалд байгаа асар их нотлох баримтыг үл харгалзан, бэлгийн хүчирхийлэлд буруутгагдсан эрчүүдэд энэ нотлох баримтын үндсэн дээр ял оноох эсэхэд эргэлзсэн байр суурь илэрхийлсний дараа би Эпштейний хэргийн зарим хохирогчидтой холбогдож, надтай хамт дуулахыг хүссэн” гэж бичжээ.
Бичлэгт О’Доннелл өөрийн тодорхойлсноор “10 настай байхад минь өөрийн дуу хоолойг ашиглаж сурахад минь тусалсан хүчирхэг Хелен Реддигийн дуу” болох I Am Woman дууг дуулж, хүчирхийллийн хохирогчдыг дэмжихийг бусдад уриалсан байна.
Тэрбээр “Хүчирхийллийг даван туулсан хүмүүсийг дэмжээрэй. Дахин нийтэл, дуэт хий, өөрийн бичлэгийг хийгээрэй. I Am Woman дууг дуулаарай” хэмээн уриалжээ.
Хелен Реддигийн алдарт дууг хамтдаа дуулсны дараа О’Доннелл уг эмэгтэйчүүдийн залуу үеийн гэрэл зургуудыг бичлэгт оруулж, “Хохирогчдыг дэмж. Эпштейний хэргийн материалууд” гэсэн үгсийг харуулсан байна.
Уг бичлэгийн доор О’Доннелл болон бичлэгт оролцсон эмэгтэйчүүдийг дэмжсэн олон мянган сэтгэгдэл, түүх, талархлын үгс иржээ.
Нэгэн дагагч “Үргэлж үнэнийг хэлж, дуу хоолойгоо хүргэх зоригтой байдагт тань баярлалаа, Рози. Би өөрөө бэлгийн хүчирхийллийг даван туулсан хүний хувьд дуу хоолойгоо ашиглах нь ямар чухал болохыг мэднэ” хэмээн бичжээ.
Өөр нэг хүн “Бид Доллиг алдсан тэр мөчөөс дэлхий илүү бүрхэг болсон гэж мэдэрсэн. Тэр гэрлийг хэн үргэлжлүүлэн асаах бол гэж бүгд гайхаж байсан. Одоо бид хариуг нь мэдэж байна - энэ бол Рози” гэжээ.
Мөн өөр нэг сэтгэгдэлд “Рози, үүнд маш их баярлалаа. Миний бодлоор хамгийн том урам хугаралт нь эрчүүд биш, харин тухайн үед бусад эмэгтэйчүүд болон хүүхдүүдийг дэмжих ёстой байсан эмэгтэйчүүд байсан. Энэ бичлэг намайг уйлууллаа. Би та бүхнийг дэмжиж байна” гэжээ.
Өөр нэг үзэгч “Рози! Энэ үнэхээр сэтгэл хөдөлгөм байна. Хелен Реддигийн алдарт дуу! Тэр яг хажууд чинь зогсоод та нартай хамт дуулж байгаа мэт санагдлаа. Эдгээр эмэгтэйчүүдийн хүч үнэхээр гайхалтай” хэмээн бичсэн байна.
Эх сурвалж: PARADE
