АНУ-ын Виржиниа мужийн Виржиниа-Бич хотын долоон настай хүү ээж нь гэнэт ухаангүй болж, таталт өгсөн үед сандарч тэвдэлгүй түргэн тусламжийн 911 дугаарт залган, ээжийнхээ амийг аврахад чухал үүрэг гүйцэтгэжээ.

Түүний энэ үйлдлийг Виржиниа-Бичийн Цагдаагийн газар өндрөөр үнэлж, “Иргэний амь аврагч" шагнал гардуулсан байна. Зайден Карран Хердон хэмээх бяцхан хүүд уг шагналыг наймдугаар сарын 11-нд Виржиниа-Бич хотын цагдаагийн газрын дарга Пол Нойдгейт гардуулжээ.

Ээж нь гэнэт ухаангүй болжээ

Энэ явдал долдугаар сарын 21-ний өглөө болсон байна. Зайдений ээж Кайлен Карран Хердон хүүхдүүддээ өглөөний цай бэлдэж, бага охиноо хоолны сандалд суулгаад, гэр бүлээрээ өглөөний цайгаа уухаар бэлтгэж байжээ.

Удалгүй ээж нь таталт өгч, ухаангүй болсон байна. Кайлен өөрөө болсон явдлын талаар юу ч санахгүй байгаа бөгөөд дараагийн санаж байгаа зүйл нь эмнэлэгт сэрсэн мөч байсан гэж ярьжээ. Харин тэр үед долоон настай Зайден юу хийхээ маш сайн мэдэж байсан аж.

Тэрбээр ээжийгээ хариу үйлдэл үзүүлэхээ болиход 911 рүү залгаж, гэрийнхээ хаягийг тодорхой хэлэн, диспетчерийн асуултад тайван хариулжээ. Тухайн үед дүү нь уйлж байсан ч Зайден сандарч балмагдалгүй, ээжийнхээ дэргэд байж, тусламж иртэл түүнийг тайвшруулахыг хичээсэн байна.

Дүүгээ ч бас хамгаалжээ

Зайден зөвхөн ээждээ тусламж дуудаад зогсохгүй, бага насны дүүдээ ч анхаарал хандуулжээ. Ээжийнх нь ярьснаар, хүү дүүгээ өргөж, хоолны ширээн дээр тавьж, ээж нь зүгээр байгаа эсэхийг шалгасан байна.

Тэрбээр ээждээ “Зүгээр ээ, ээж ээ. Зүгээр” хэмээн тайвшруулж байсан талаар Кайлен эмнэлэгт сэрснийхээ дараа мэджээ.

Кайлен “Надад хэлсэн зүйлээс нь харахад тэр дүүгээ өргөж аваад, намайг зүгээр байгаа эсэхийг шалгахын тулд ширээн дээр тавьсан. Дараа нь надтай ярьж, намайг тайвшруулж байсан байна” хэмээн ярьсан байна.

Ээж нь түүнд багаас нь зааж сургажээ

Зайден ийм нөхцөлд хэрхэн хандахаа мэдэж байсан нь тохиолдлын зүйл биш аж. Ээж нь түүнийг хоёр настайгаас эхлэн онцгой байдал үүссэн үед хэрхэн зөв үйлдэл хийх, шаардлагатай үед 911 рүү хэрхэн залгах талаар зааж, дадлага хийлгэдэг байжээ.

Кайлен “Ийм зүйл хэзээ тохиолдохыг бид мэдэхгүй. Тиймээс бид олон удаа дадлага хийсэн. 911 рүү залгах нь тоглоом биш ч яаралтай нөхцөлд үүнийг хийх шаардлагатайг тэр мэддэг байх ёстой” хэмээн ярьжээ. Тэрбээр хүүгийнхээ үйлдлээр маш их бахархаж буйгаа мөн илэрхийлсэн байна.

Цагдаагийн офицер хүүг шагналд нэр дэвшүүлжээ

Зайдений хийсэн үйлдлийн талаар мэдсэн Виржиниа-Бичийн цагдаагийн газрын офицер Жеймс Хилтон түүнийг “Иргэний амь аврагч" шагналд нэр дэвшүүлсэн байна.

Офицер Хилтоны хэлснээр, Зайден болсон явдлын талаар маш тайван ярьж, ээждээ юу тохиолдсон, дүү нь хоолны сандал дээрээс унасан зэрэг бүхнийг тодорхой тайлбарлажээ.

Офицер Хилтон “Долоон настай хүүхдийн хувьд энэ бүхнийг даван туулсан нь үнэхээр гайхалтай” хэмээн үнэлсэн байна. Тэрбээр Зайден зөвхөн зоригтойгоор зөв шийдвэр гаргасан төдийгүй дүүгээ хамгаалж, ээжийнхээ төлөө санаа зовж, энэрэнгүй хандаж чадсаныг онцолжээ.

Виржиниа-Бичийн Цагдаагийн газрын дарга Пол Нойдгейт шагналыг гардуулах үеэр Зайден болон түүний эцэг эхэд талархал илэрхийлсэн байна.

Цагдаагийн дарга “Долоон настай хүүхэд зөв зүйл хийх ёстойгоо мэддэг болоход тусалсан эцэг эх болон түүнд зөв зүйл хийх боломжийг бүрдүүлсэн бүх хүмүүст бид талархаж байна. Тэрбээр энэ шагнал, олон нийтийн талархлыг бүрэн хүртэх эрхтэй” хэмээн хэлжээ.

Ийнхүү долоохон настай Зайден хүнд нөхцөлд сандарч тэвдэлгүй зөв шийдвэр гарган, ээждээ яаралтай тусламж дуудсан төдийгүй бага дүүгээ хамгаалж чадсан үйлдлээрээ цагдаагийн байгууллагаас “амь аврагч” хэмээн үнэлүүлжээ.

Энэ үйл явдал хүүхдэд багаас нь онцгой нөхцөлд хэрхэн зөв, тайван үйлдэл хийхийг зааж сургах нь ямар чухал болохыг харуулсан жишээ болов.

Эх сурвалж: PEOPLE