Монгол Улсын Ерөнхийлөгчийн зарлигаар төрийн тахилгатай болсон Хөвсгөл нуурыг тахих их ёслолын хүрээнд зохион байгуулагдаж буй Хөвсгөл нуурын тахилгын хурал номын үйл ажиллагаа өнөөдөр (2026.08.02) Чөчү хайрхны оройд болж байна.
Тахилгын үйл ажиллагааг иргэд, олон нийтэд хүртээмжтэй хүргэх зорилгоор Хөвсгөл нуурын зүүн эрэг дэх Чулуутын аманд байрлуулсан LED дэлгэцээр шууд дамжуулж байгаа аж. Ингэснээр орон нутагт зорин очиж чадаагүй иргэд ч төрийн ёслолын үйл ажиллагааг хамтдаа үзэх боломж бүрджээ.
Хөвсгөл нуурыг тахих төрийн их ёслол нь Монгол Улсын байгаль, түүх, соёлын үнэт өв болсон тус нуурын ариун дагшин чанарыг дээдлэх, байгаль хамгааллын үзэл санааг түгээн дэлгэрүүлэх зорилготой. Тус ёслолын нэгдсэн хөтөлбөрт эрдэм шинжилгээний хурал, уламжлалт зан үйл, хүндэтгэлийн арга хэмжээнүүд багтжээ.
Хөвсгөл нуур Монгол орны хамгийн том цэнгэг уст нуур бөгөөд улсын нийт цэнгэг усны нөөцийн томоохон хэсгийг бүрдүүлдэг онцгой экосистемтэй газар нутаг юм. Нуур орчмын ой тайга, ан амьтан, ургамлын төрөл зүйл нь Монгол орны байгалийн ховор нандин өвийн нэгт тооцогддог.
Төрийн тахилгын арга хэмжээ нь Хөвсгөл нуурыг хамгаалах, бохирдлоос сэргийлэх, иргэдийн байгаль хамгаалах ухамсрыг нэмэгдүүлэхэд чиглэсэн өргөн хүрээний ажлуудтай уялдаж байна. Сүүлийн жилүүдэд Хөвсгөл нуурын сав газрын хамгаалалт, цэвэрлэгээний ажлыг эрчимжүүлж, усны экосистемийг хамгаалах олон арга хэмжээ хэрэгжүүлж байгаа аж.
Мөн өмнөх жилүүдэд Хөвсгөл нуурын бохирдлыг бууруулах зорилгоор нуурын ёроолд живсэн тээврийн хэрэгсэл, техник хэрэгслийг татан гаргах зэрэг байгаль хамгааллын томоохон ажлууд хийгджээ.
Хөвсгөл нуурын тахилгын төрийн ёслол нь монголчуудын байгаль дэлхийгээ дээдлэх уламжлал, өв соёлыг сэргээн таниулахын зэрэгцээ дэлхийд ховор цэнгэг усны нөөцөө хамгаалах үйлсэд олон нийтийн анхаарлыг хандуулсан чухал үйл явдал болж байна.
